Cayetano kay Matibag: Hindi n'yo natibag ang Senado

ni Mylene Alfonso @News | May 19, 2026

Photo: Senate of the Philippines / Atty. Mel Matibag / FB

"During my watch, hindi n'yo natibag ang Senado. If papalitan ako, sana hindi matibag ang Senado," ito ang sagot ni Senate President Alan Peter Cayetano sa panawagan ni National Bureau of Investigation (NBI) Director Melvin Matibag na panagutin siya sa nangyaring gulo sa Senado.

Iginiit din niya na ang Senado ang last line of defense pagdating ng patas na impeachment, budget, charter change, at sa kung sino man ang nais sumira ng demokrasya.

Kung sino umano ang pumasok sa Senado at namaril, dapat sila umano ang magbitiw sa puwesto at hindi siya.

Pag-abstain nina Zubiri at Ejercito sa Senate vote, pinalagan

ni Gina Pleñago @News | May 18, 2026

Photo: Miguel Zubiri at JV Ejercito - Senate PH

Mayroon umanong hidden agenda ang botong abstain nina Senador Juan Miguel Zubiri at JV Ejercito sa pagpapalit ng liderato ng Senado. 

Ito ay matapos na umugong ang balitang papalitan diumano ni Zubiri ang bagong halal na si Senate President Alan Peter Cayetano at kukuha ng suporta mula sa miyembro ng mayorya at minorya. 

Matatandaang sa sinasabing biglaang rigodon sa Senado ay pinalitan ni Cayetano si Sen. Vicente “Tito” Sotto III sa botong 13-9-2. Ipinagtataka umano ng publiko na sa halip na pumili sina Zubiri at JV Ejercito sa dalawa ay pinili pang walang iboto.

Sa isang panayam sa political scientist na si Cleve Arguelles sa programang Ted Failon and DJ Chacha sa 105.9 True FM, tahasan niyang sinabi na ang hakbangin ng dalawa ay nakadidismaya. Itinuturing umano ni Arguelles na ang pag-iwas ng dalawang beteranong senador ay nagpapakita ng hindi magandang indikasyon sa pananagutan ng mga lider ng bansa. Binigyang-diin pa na ang pag-atras ng mga mambabatas sa panahon ng malalaking pagbabago sa institusyon ay nag-iiwan ng malaking tanong sa mga botante kung nasaan nga ba ang tunay na prinsipyo ng kanilang mga inihalal kapag dumarating ang mga kritikal na desisyon. 

Kaugnay nito sinabi Atty. Ruphil Fernandez Bañoc sa programang Straight to the Point sa DYHP RMN Cebu na ang pagpili ng liderato sa Senado ay usaping konstitusyonal na hindi puwedeng daanin sa “safe play.”

10 iniimbestigahan sa pamamaril sa Senado — PNP

ni Jeff Tumbado @News | May 15, 2026

Photo Courtesy Eloisa Lopez / Reuters

Iniimbestagahan na ng Philippine National Police (PNP) ang hindi bababa sa 10 indibidwal kaugnay ng insidente ng pamamaril at kaguluhan sa loob ng gusali ng Senado nitong gabi ng Miyerkules.

Ayon kay PNP Spokesperson Police Brig. Gen. Randulf Tuaño, lumabas sa paunang imbestigasyon na hindi nag-iisa ang lalaking naaresto sa loob ng Senate complex na si Mel Oragon, 40, at sinasabing NBI volunteer.

“Sa initial report natin, hindi lang naman nag-iisa 'yung indibidwal na nahuli,” ani Tuaño sa isang press briefing sa Camp Crame.

Dagdag pa niya, may hindi bababa sa 10 iba pa umano na namataang kasama sa grupo na nagtangkang pumasok sa ikalawang palapag ng gusali ng Senado noong Miyerkules ng gabi, ngunit napigilan sila ng mga armadong tauhan ng Senate Office of the Sergeant-at-Arms (OSAA).

Patuloy pa umanong inaalam ng mga otoridad kung kabilang nga sa grupo ang mga naturang indibidwal o kung ilan sa kanila ay mga empleyado lamang sa loob ng complex.

Hindi naman agad maipaliwanag ng PNP kung paano nakatakas o nawala ang mga hinihinalang kasama sa grupo.

Gayunman, iniutos na umano sa Police Security and Protection Group (PSPG) na magsagawa ng imbestigasyon upang matukoy kung nagkaroon ng pagkukulang ang kanilang hanay o ang OSAA sa seguridad ng Senado.

Nauna nang kinumpirma ng Southern Police District (SPD) ang pagkakaaresto kay Oragon sa gitna ng kaguluhan.

Nagbigay na rin umano ng testimonya at mga pangalan si Oragon, ngunit bineberipika pa ito ng mga imbestigador.

Dagdag pa niya, wala ring nakuhang lehitimong government-issued ID mula kay Oragon kaya’t hindi agad pinaniniwalaan ng mga imbestigador ang mga impormasyong ibinibigay nito.

Inatasan na rin umano ang PNP Directorate for Intelligence at Directorate for Investigation and Detective Management (DIDM) na magsagawa ng hiwalay na background investigation laban kay Oragon.