Majority bloc, no show sa Senado

ni Mylene Alfonso @News | June 2, 2026

Photo: Sen. Risa Hontiveros

No show ang majority senators kaya hindi nakumpleto ang kinakailangang quorum para maituloy ang plenary session sa Senado kahapon.

Bandang alas-5 ng hapon sana ang sesyon ng Senado na itinakda ngunit wala ni isang miyembro mula sa mayorya ang nagpakita.

Bunsod nito, ang 11 miyembro mula sa minority senators lamang ang pumasok at matiyagang naghintay.

Alas-7 ng gabi nang magdesisyon ang minority senators na umalis na lamang.

Hanggang sa alas-7:30 ng gabi nang kumpirmahin ng staff mula sa opisina ni Senate President Alan Cayetano na wala nang sesyon.

Mga ebidensya, ilalabas — SP Alan... Majority bloc, tinatakot ng Marcos admin

ni Mylene Alfonso @News | May 31, 2026

Photo: Senate PH

Inakusahan ni Senate President Alan Peter Cayetano na tinatakot umano ang ilang miyembro ng Senate majority ng administrasyong Marcos upang mapilitan silang lumipat sa minority at makabuo ng panibagong liderato sa Senado.

Ayon sa live stream post ni Cayetano nitong Biyernes, ilalabas ng mga senador ang ebidensya ng umano’y pananakot upang mapigilan ang pagbuo ng isang “independent Senate”.

Ani Cayetano, may mga alegasyon umano na pinipilit ang ilang mambabatas na lumipat ng grupo kapalit ng hindi pagsasampa ng kaso, habang ang mga hindi lilipat ay kakasuhan.

“Wala kaming problema kung sa korte ay patunayan na sila ay guilty o hindi. Ang problema po namin 'yung gagamitin 'yung threat na 'pag lumipat ka dito, wala ka nang kaso. ‘Pag d'yan ka, tutuluyan ka namin," diin ni Cayetano.

"In the next few days, option po ng mga senador na maglabas ng ebidensya ng pananakot para hindi namin mabuo 'yung independent na Senate," wika pa ni Cayetano.

Sa gitna ng mga isyu sa Senado, ilang miyembro ng majority bloc ang nahaharap sa mga kasong kriminal.

Kabilang dito si Sen. Jinggoy Estrada na kinasuhan ng plunder at graft kaugnay ng umano’y P573 milyong anomalya sa insertions at kickbacks. Nakapagpiyansa siya ng P90,000 para sa kasong graft.

Ayon sa Office of the Ombudsman, susunod na kakasuhan si acting majority leader Joel Villanueva sa korte, habang may mga reklamong plunder din na kinakaharap sina Sen. Francis Escudero at Rodante Marcoleta.

Mariing itinanggi ng mga senador ang mga nabanggit na paratang.

Pamamaril sa Senado, fake! — PBBM

ni Mylene Alfonso @News | May 30, 2026

Photo: Courtesy Eloisa Lopez-Reuters

Matinding ikinabahala ni Pangulong Ferdinand Marcos Jr. ang tumitinding tensyon sa Senado sa nakalipas na mga linggo, kabilang ang kontrobersyal na insidente ng pamamaril na kanyang tinawag na “fake”.

Sa press conference sa sidelines ng kanyang state visit sa Japan, sinabi ni Marcos na dating nagsilbing senador, na ang mga diskusyon sa Senado ay tila naging mababaw at personal na ang atake.

Nagbigay din ng komento ang Chief Executive sa barilan sa Senado na kinasasangkutan ng Office of the Sergeant-at-Arms at ang National Bureau of Investigation.

“Tapos narating pa tayo sa putukan. Tapos fake pala ‘yung putukan… Hindi ko maintindihan. Walang nangyayaring kagaya n’yan nu’ng panahon ko sa Senado,” punto ni PBBM.

“I never imagined that the Senate would descend into this kind of what’s happening right now,” patuloy niya.