Imbestigasyon sa drug war.. Tolentino, abogado ni Bato sa ICC

ni Mylene Alfonso | March 30, 2023

Tatayo bilang legal counsel ni Senador Ronald “Bato” dela Rosa si Sen. Francis Tolentino para kumatawan kaugnay sa imbestigasyon ng International Criminal Court (ICC) hinggil sa war on drugs noong administrasyon ni dating Pangulong Rodrigo Duterte.

“I accept the proposal of Sen. Dela Rosa to lawyer for him,” ani Tolentino, chairperson ng Senate committee on justice and human rights, sa online news conference kahapon kaugnay sa hiling ni Dela Rosa, na dating chief ng Philippine National Police na nahaharap sa kasong crimes against humanity.

Nanindigan din si Tolentino na dapat dito sa Pilipinas gawin ang imbestigasyon at hindi sa Netherlands.

Kaugnay nito, hindi pa rin umano niya nakakausap si Duterte hinggil sa posibleng kinatawan ng huli sa international tribunal.

"If he wants, I’m just having my papers fixed now for my proper accreditation if that will come to that point,” aniya pa.

“My role would be to ensure the protection of Sen. Dela Rosa, not just within the confines of the ICC. Because we’re claiming that they do not have jurisdiction, but even locally,” wika pa ni Tolentino.

Matatandaang pumasa si Tolentino sa Philippine Bar Exams noong taong 1984 at New York State Bar Exams noong 1991.

Tumangging sumaklolo sa biktima.. Doktor, ‘wanted’ sa Salilig-hazing

ni Mylene Alfonso | March 21, 2023

Hiniling ni Senador Francis Tolentino sa National Bureau of Investigation (NBI) na imbestigahan ang doktor na umano’y tumanggi na magbigay ng medical assistance kay John Matthew Salilig na hinihinalang biktima ng hazing.

Sa pagdinig ng Senado, sinabi ni Tolentino na batay sa affidavit ng isa sa limang suspek sa kasong Salilig na boluntaryong sumuko sa NBI na si Ralph Benjamin Tan alyas Scottie, tumanggi ang doktor na tulungan si Salilig.

“Nu’ng araw po na ‘yon, nu’ng alas nueve ng gabi, ‘yung [kasama in Salilig na si] Lee ay sinundo ng kanyang pinsan na isa ring doktor. Buhay pa po nito si Matthew subalit tinanong ni Ralph Benjamin Tan si Lee kung pwede tumulong ‘yung kanyang pinsan na doktor para asistihan si Matthew. Ang sabi po ng doktor hindi puwede,” pahayag ni Tolentino.

“Inimbestigahan po natin ito, kung sino itong doktor na ito na tumanggi sumaklolo at magbigay ng medical assistance? Kaharap na niya ang naghihingalong si Matthew.

Palagay ko po sa NBI dapat malaman natin kung sino ang doktor na ito. Ito po ay lisensyado ng [Professional Regulatory Commission], ito po ay medical practitioner.

Wala po akong alam na doktor na hindi nagbibigay ng tulong sa nangangailangan pero ito kaharap niya na oh, ayaw niya,” usisa pa ni Tolentino.

Sinabi ni NBI agent Joseph Martinez, na kumuha ng salaysay ni Tan, sinusubukan pa nilang kilalanin ang doktor.

“We are already trying to identify the person involved, the doctor. Apparently, si Ralph Benjamin Tan, he cannot identify kung sino talaga ‘yung doktor. So, we are trying to pursue other information kung sa’n po namin ma-identify ‘yung doktor,” ani Martinez.

Kaugnay nito, inirekomenda ni Tolentino sa NBI na mag-imbestiga sa pamamagitan ni Lee.

Gayunman, sinabi ni Martinez na wala sa kanilang kustodiya si Lee.

Bagama’t nangako ang NBI agent ng karagdagang aksyon sa usapin, sinabi pa rin ni Tolentino na dapat kasuhan ang doktor dahil sa paglabag sa Hippocratic Oath.

Nabatid na tinapos ng Senate Justice and Human Rights panel ang imbestigasyon kaugnay sa pagkamatay ni Salilig pagkatapos ng dalawang pagdinig.

Matatandaang sa unang pagdinig, nabunyag na nagpasya ang mga miyembro ng Tau Gamma na huwag dalhin si Salilig sa ospital matapos niyang magkaroon ng seizure sa welcome rites ng fraternity.

Kamara, naghahanda na sa bilangan ng boto sa Mayo 9

ni Zel Fernandez | May 3, 2022

Patuloy ang ginagawang paghahanda ng Kamara para sa gaganaping “canvassing” o pagbibilang ng mga boto para sa mahahalal na presidente at bise presidente sa papalapit nang 2022 national elections sa Mayo 9.

Ayon kay House Secretary General Mark Llandro Mendoza, nakikipag-uganayan na umano sa Senado ang kanilang panig, maging sa mga opisyal ng Commission on Elections (Comelec) para sa mas maayos na bilangan ng mga boto ngayong halalan.

Aniya, inihahanda na rin ang magiging “set-up” para sa media at iba pang mga pangangailangan, kaakibat ng malaking pagbabago sa sitwasyon dulot ng COVID-19 pandemic.

Samantala, ang Kamara at Senado ay ioorganisa umano bilang National Board of Canvassers o NBOC-Congress para sa pagbibilang ng mga boto ng presidential at vice presidential candidates.

Gayundin, inihahanda na umano ang maaatasan sa pagpoproklama ng mga mahahalal na opisyal at lider ng bansa sa plenaryo.