Mala-bangungot na panaginip, babala na may sakit sa puso o walang ganang mabuhay

ni Seigusmundo Del Mundo - @Panaginip, salamin ng inyong buhay | December 1 , 2020

Salaminin natin ang panaginip ni Aurora na ipinadala sa Facebook Messenger.

Dear Professor,

Gusto kong malaman ang kahulugan ng panaginip ko dahil palaging ganu’n ang napapanaginipan ko. Sa panaginip ko, gusto akong patayin ng asawa ko, tapos gusto niya akong itulak sa isang bangin, ngunit bago niya pa ako naitulak, may isang tao na tumulong sa akin at hindi ako nahulog.

Pagtingin ko sa asawa ko, nakita ko siyang patay at nasusunog siya, tapos nakita ko na siyang nasa kabaong, pero hindi naman sunog ang katawan. Nang matapos siyang ilibing at nang matutulog na kami ng anak ko, may nakitang sulat ang anak ko at dali-dali kong kinuha at itinago ‘yung sulat. Tapos binuhat ko ang anak ko at pumunta kami sa bahay ng biyenan ko, tapos nakita ko ang bahay namin ng asawa ko na maliwanag pero walang tao.

Nang magising ako, habol ko ang hininga ko at parang totoo ang panaginip ko. Sa totoong buhay, buhay pa ang asawa ko pero hiwalay na kami. Sana ay masagot n’yo ako. Maraming salamat!

Naghihintay,

Aurora

Sa iyo, Aurora,

Una, dahil mahalaga ang kalusugan ng isang tao kaysa sa anumang bagay dito sa mundo, mas magandang pagtuunan natin ng pansin ay kapag ang nanaginip ay nagising at ang hininga ay hinahabol na parang totoo ang napanaginipan, ang payo ay magpatingin sa tunay na doktor dahil ang paghingal ay babala ng mahinang heart o puso.

Minsan, may pagkakataon na wala namang sakit ang nanaginip, kaya lang, mali ang kanyang sleep position o istayl ng pagtulog. Kapag nakatulog na sa gawing kanan nakahilig, madalas na siya ay makararanas ng mga panaginip na tulad ng sa iyo na parang nakakatakot na pangyayari at siya rin ay magigising na hinahabol ang hininga. Ito rin, iha, ay puwedeng palatandaan ng sakit sa digestive system.

Kapag naman nakatulog nang may katagalan na nakahiga, as in, diretso ang katawan, mananaginip din ng mala-bangungot at nahihirapang huminga. Puwedeng wala siyang sakit, pero sa ganu’ng klase ng pagtulog, lumiliit ang daluyan ng hangin papalabas at papasok sa lungs kaya hindi makahinga.

Ang pinakamagandang paraan o istayl ng pagtulog ay sanayin ang sarili na pabiling-biling o paiba-iba ang puwesto dahil kapag matagal sa iisang puwesto sa pagtulog, ang tao ay puwedeng bangungutin.

Ang isa pa sa inirerekomenda ay ang pagtulog na nakahilig sa kaliwa dahil sa ganitong paraan, hindi nahihirapan ang puso o heart kaya hindi makakapanaginip na siya ay parang dinadaganan o may dumadagan sa kanya.

Pagkatapos mong malaman ang ilang mahahalagang isyu tungkol sa iba’t ibang posisyon ng pagtulog, ang panaginip mo sa kanyang kabuuan ay nagsasabing kulang na kulang ka sa pagkilos o nawawalan ka ng sigla na mabuhay. Kumbaga, nananamlay ka at ganundin ang iyong kapalaran.

Dahil dito, ikaw ay pinapayuhan na gumawa ng mga bagay na makabuluhan tulad ng pagsisikap na paunlarin pa ang iyong buhay sa pamamagitan ng mga bago at kakaibang proyekto na hindi mo pa nasusubukan.

Hanggang sa muli,

Professor Seigusmundo del Mundo

Singsing, simbolo ng bagong kabanata ng buhay na darating

ni Seigusmundo Del Mundo - @Panaginip, salamin ng inyong buhay | November 30 , 2020

Salaminin natin ang panaginip ni Mary Jane na ipinadala sa Facebook Messenger.

Dear Professor,

Gusto kong malaman kung ano ang kahulugan kapag nanaginip ng singsing? Ngayong umaga, nanaginip ako na nasa isang lugar ako na maraming nagtitinda sa lapag. Nakaupo ako at nasa aking kandungan ang isang singsing na panlalaki na silver at sabi ko sa sarili ko, “Saan ito nanggaling?” Naisip ko na baka sa kinain kong bulalo dahil nakita kong parang galing sa nilutong ulam ang singsing.

Tapos, may umiikot na tumitingin ng mga alahas kung tunay o hindi, at napatingin ako sa kandungan ko at sabi ko, “Patingnan ko kaya ito?” Kaya lang, nawala na ‘yung tumitingin ng singsing.

At sa panaginip ko, napunta ako sa manugang ko. Naglilipat sila ng bahay at nakita ko ang bahay na pangkaraniwan lang at hindi sementado ang paligid, tapos tiningnan ko at may mga kurtina pero kulang pa. Sabi ko sa manugang ko, “Medyo maraming kurtina ang mailalagay dito.”

Tapos, bago ako magising sa panaginip ko, parang kasama ako roon, bata pa ako sa panaginip at may dumating na lalaking medyo may edad na, pero parang may kaya sa buhay. Siya ang susundo sa amin, tapos may kasama akong aalis pero mauuna ako at sabi ng nanay ko, mauna na ako. May naghihintay sa amin na sasakyan. Iyak ako nang iyak at yakap-yakap ko ang nanay ko at sabi ko, “Mama ko, mahal na mahal ko kayo!” Sa panaginip ko, bata pa ang nanay ko pero matagal na siyang patay.

Ano ang ibig sabihin ng mga panaginip kong ito?

Naghihintay,

Mary Jane

Sa iyo, Mary Jane,

Ang singsing sa panaginip mo ay sumisimbolo ng bagong mga kabanata ng buhay mo na darating sa iyo kung saan ang sabi ng panaginip mo, habang abala ka sa paghahanapbuhay, magdaratingan ang maraming magagandang pagkakataon.

Ang mga kakilala mo at malalapit sa iyo ay makikitang hindi agad-agad maniniwala na papaganda ang buhay mo, kumbaga, patuloy silang mag-aalinlangan kahit kitang-kita nila ang mga paunang palatandaan.

Nagbabalita rin ang panaginip mo na dahil gaganda ang kapalaran mo, gaganda rin ang lahat ng nasa iyo, kabilang dito ang bahay, buhay-pamilya at iba pang mga personal na aspeto ng buhay mo.

Kaya iyak ka nang iyak sa panaginip ay dahil sa pagkakaroon mo ng bagong magandang buhay, parang ayaw mo ring iwanan ang iyong nakaraan at kasalukuyan. Kaya lang, sabi ng panaginip mo, ang mga ito ay noon pa nakatakda na maganap sa buhay mo. At dahil nakatakda, ibig sabihin, ayaw mo man o kahit nag-aalinlangan ka, tuloy pa rin na guguhit sa iyong kapalaran ang nasabing pagbabago – isang pagbabago patungo sa tiyak na pag-unlad.

Hanggang sa muli,

Professor Seigusmundo del Mundo

Nakontrol ang sunog sa kahuyan, pahiwatig na kumilos kahit walang ideya sa mga kaganapan sa buhay

ni Seigusmundo Del Mundo - @Panaginip, salamin ng inyong buhay | November 29 , 2020

Salaminin natin ang panaginip ni Wilma na ipinadala sa Facebook Messenger.

Dear Professor,

Nag-aalala ako dahil nanaginip ako na nasa dagat ako, as in, sa gitna ng karagatan. Lumalangoy ako at masyadong maalon sa gitna ng dagat, tapos lumangoy ako nang lumangoy hanggang nakarating ako sa pampang. Tapos, lakad ako nang lakad paakyat ng bukid dahil may paparating na tsunami. Noong nasa kahuyan na ako, hindi ako makapunta sa itaas dahil may sunog doon, as in, malaking sunog at parang impiyerno tulad ng mga nakikita natin sa palabas sa TV o pelikula.

Tapos, may nagsabi sa akin sa panaginip ko na kaya kong kontrolin ang aking isip para mahinto ‘yung sunog. Parang magic, nakontrol ko ang utak ko at huminto ang sunog hanggang umaliwalas na ‘yung paligid.

Naghihintay,

Wilma

Sa iyo, Wilma,

Sa kasalukuyan, ayon sa panaginip mo, dumaraan ka sa isang pagsubok kung saan hindi mo malalaman kung iyong kakayanin o ikaw ay matatalo. Pero ang tao, ‘di ba hindi naman nawawalan ng mga pagsubok? Kumbaga, normal lang ang pagdating at pag-alis ng mga pagsubok sa ating buhay.

Ang iba, nag-aakalang kapag ginagamitan ng talino ang pagsubok, matatalo na niya. Ang iba naman, nag-aakalang kapag hinaharap nang mukhaan ang mga pagsubok, sila ay mananalo. Ang iba pa nga, nag-aakalang kapag humingi sila ng tulong sa malalapit sa buhay nila, mareresolba na nito ang mga pagsubok. Karamihan, ipinauubaya kay Lord ang lahat, kumbaga, iba’t iba ang inaakala ng tao na panlaban sa mga pagsubok.

Mayroong lumang kuwento na paulit-ulit na ikinukuwento ng lola ko, at ito ay tungkol sa matanda at batang palaka na nahulog sa timba na may gatas ng kalabaw. Noong mga bata pa kami, maraming palaka rito samin sa Bulacan at marami ring gatas ng kalabaw. Kaya ang kuwento ni lola ay gustung-gusto naming pakinggan dahil naglalarawan ito ng buhay sa probinsiya.

Sabi ni lola, sa dalawang palakang nahulog sa timba ng gatas, matandang palaka ang makakaligtas dahil may talino siya dahil sa kanyang edad. Pero wala ring nangyari dahil nasa loob pa rin ng timba ang dalawang palaka. Kaya ang ginawa ng matandang palaka, nagrosaryo at tinawag ang lahat ng santo, pero nandu’n pa rin sila sa timba.

Pero ‘yung batang palaka ay kilos nang kilos at wala siyang ginawa kundi magkikilos. Sa kakikilos niya, naging keso ang gatas sa timba at dahil solid ang keso, nakatalon silang dalawa at tuwang-tuwa sila dahil sa sila ay nakaligtas.

Dito sa Maynila, wala namang gatas ng kalabaw, keso at palaka, pero rito sa siyudad, ang mga pagsubok ay hindi nawawala. Kung susuriin natin ang kuwento ni lola, may aral tayong makukuha — kapag hindi tayo pumayag na matalo ng pagsubok at kilos tayo nang kilos kahit hindi tayo nakapag-aral o wala tayong alam sa nangyayari sa atin, mas malamang na malagpasan natin ang kahit na anong malaking pagsubok.

Sa pagkilos, lalabas ang ating tunay na lakas, kumbaga, ang todong puwersa natin ay lilitaw kung saan siya mismong sinasabi ng iyong panaginip na nakontrol mo ang sunog. Oo, parang magic ang epekto ng pagkilos dahil mahimalang malulutas nito ang ating mga suliranin.

Pero kung hindi tayo kikilos, para na ring sinabing talo na tayo, kumbaga, game over na. ‘Yan ang hindi puwedeng mangyari sa iyo ngayon, kaya kilos na at kilos pa kahit hindi mo nauunawaan ang mga nangyayari sa iyong buhay sa kasalukuyan.

Hanggang sa muli,

Professor Seigusmundo del Mundo