Suplay ng tangke ng oxygen, tagilid — Duque

ni Ronalyn Seminiano Reonico | August 14, 2021

Siniguro ng Department of Health (DOH) na sapat ang suplay ng oxygen sa bansa ngunit ayon kay Secretary Francisco Duque III, posible umanong magkaroon ng kakulangan sa suplay ng tangke.

Aniya sa isang panayam, “Okay naman (ang oxygen supply) kasi palagi kaming nagpupulong ni Secretary Ramon Lopez ng DTI dahil siya ang nakikipag-ugnayan sa mga oxygen manufacturing companies.

“Ang sinasabi nila nu’ng huli kaming nag-usap, kung 203 tons of oxygen per day ang nagagamit, kaya nilang triplehin o kaya nilang gawing 605 tonnage per day ang isu-supply nila.”

Samantala, nanawagan din si Duque sa publiko na huwag mag-hoard ng mga oxygen tanks dahil posible umanong magkaproblema sa suplay ng mga tangke.

Aniya pa, “Inaantay ko pa rin ang pag-aangkat ng karagdagang tangke na walang kargang oxygen. ‘Yung tangke lang. Kasi ‘yung oxygen, meron, eh. Pero baka sa tangke, magkaproblema.”

Samantala, panawagan din ni Duque sa publiko, “Nananawagan ako sa ating mga kababayan na huwag kayong mag-hoard ng mga oxygen, unless meron kayong prescription ng mga doktor. Hayaan n’yo po 'yung mga tangke na umikot, hindi puwedeng nakaistasyon sa bahay ninyo ang mga tangke. Kailangan pong may sirkulasyon ang mga tangke na tuluy-tuloy na kapag naubos, ire-refill.”

Safety Seal sa mga malls, tindahan, pasyalan, etc. sa QC, start na

ni Mary Gutierrez Almirañez | June 5, 2021

Inirekomenda ni Quezon City Mayor Joy Belmonte sa mga business establishments na i-comply sa national government ang COVID-19 Safety Seal certification na magsisilbing katibayan na sumusunod sila sa minimum health protocols laban sa virus.

Ayon pa kay Belmonte, "We hope our businesses will take this as an opportunity to prove that they carry out the necessary measures to ensure the safety of their customers. And in turn, we expect that this will increase customer confidence and positively affect everyone's livelihood and our economy."

Dagdag nito, puwedeng mag-apply o kumuha ng Safety Seal certification sa lokal na pamahalaan at kapag nagawaran na ng certificate ang business owner ay puwede niya iyong i-display sa kanyang tindahan o kainan.

Nakasaad din sa Executive Order No. 13 Series of 2021 ang bawat mall, wet markets, retail stores, restaurants, fast food, coffee shops, karinderya, bangko, pawnshops, money changers, remittance centers, car washes at laundry service centers na hinihikayat na mag-apply ng Safety Seal certification. Kasama rin dito ang mga pasyalan katulad ng art galleries, libraries, museums, zoos, sports centers, gyms, spas, tutorial, testing at review centers, pati ang sinehan at gaming arcades.

Sa ngayon ay SM City North EDSA ang kauna-unahang shopping mall sa Quezon City na nag-display ng Safety Seal certification.

Ang pagdidikit nito ay pinangunahan ni Department of Trade and Industry (DTI) Secretary Ramon Lopez.

Kasama rin sa launching ng Safety Seal certification sa SM North sina Department of Interior and Local Government (DILG) Undersecretary Jonathan Malaya at DTI Undersecretary Ireneo Vizmonte.

No Vaccine, no entry sa mga establisimyento, 'di aprub sa DTI

ni Mary Gutierrez Almirañez | May 16, 2021

Hindi sang-ayon ang Department of Trade and Industry (DTI) na gawing mandatory requirement ang COVID-19 ‘vaccine pass’ bago makapasok sa isang establisimyento ang mga konsumer, ayon sa pahayag ni DTI Secretary Ramon Lopez ngayong araw, May 16.

Paliwanag niya, "Kami ho, hindi ho kami sang-ayon sa vaccine pass na gagawing mandatory... Hindi po siguro talaga puwede ‘yun. May issue sa discrimination, pangalawa napakababa pa ng ating percentage na na-vaccinate na population."

Dagdag pa niya, "Siguro, 2% pa lang kasi over 2 million pa lang tayo ng nabakunahan... Kailangan pag-aralan ‘yan ‘pag medyo mataas na ang porsiyento."

Matatandaan namang inihirit kamakailan ni Presidential Adviser for Entrepreneurship Joey Concepcion ang pagkakaroon ng standard vaccine pass na maaaring i-require ng mga establisimyento para maengganyo ang publiko na magpabakuna.

Kumbaga, tatanggapin lamang ng mga restaurants ang customer na may vaccine pass o ‘yung mga nabakunahan na kontra COVID-19.

Sa ngayon ay tinatayang 2,623,093 indibidwal pa lamang ang mga nabakunahan laban sa virus, kabilang ang 565,816 na mga nakakumpleto sa dalawang dose ng bakuna, habang 2,057,277 naman sa unang dose.