Lady Booters, dinurog ang Cambodia; 3x3 at Kurash, lalarga

ni GA / Anthony E. Servinio - @Sports | May 11, 2022

Nagpadala ng malaking mensahe ang Pilipinas at dinurog ang Cambodia, 5-0, sa pagbubukas ng 31st Southeast Asian Games Women’s Football Tournament, Lunes nang gabi sa Cam Pha Stadium ng Quang Ninh, Vietnam. Saglit lang ang pahinga at sasabak muli ang Filipinas ngayong Miyerkules kontra sa host at defending champion Vietnam simula 8 p.m. sa parehong palaruan.

Mabagal ang simula ng mga Pinay hanggang naipasok ni bunso Isabella Flanigan ang unang goal sa ika-27 minuto. Kinailangang magbalasa ng manlalaro si Coach Alen Stajcic sa second half at ito ang nagbigay-buhay sa kanilang laro.

Pumasok si Sarina Bolden sa ika-56 minuto kapalit ni Carleigh Frilles at wala pang isang minuto ay pinasahan si Eva Madarang para sa dapat ay pangalawang goal, subalit hindi ito binilang ng reperi. Bumawi si Bolden at inulo papasok ang bola sa ika-64 minuto upang madoble ang lamang.

Samantala, sisimulan ng PBA 3X3 First Conference champion Limitless App Masters ang misyon na maipagtanggol ang korona ng bansa sa basketball 3X3 event sa paglipad ng quartet patungong 31st SEAG sa Hanoi. Nagtungo na nitong Lunes ang grupo nina Jorey Napoles, Marvin Hayes, Reymar Caduyac at PBA draft No.1 pick prospect Brandon Ganuelas-Rosser kasama si Coach Willie Wilson at ang iba pang mga staff, bitbit ang bandera ng Gilas Pilipinas men's 3x3.

Susubukan ng apat na players na matapatan ang nakamit na tagumpay nina PBA 5-on-5 mainstays na sina Mo Tautuaa at CJ Perez ng San Miguel Beer, Chris Newsome ng Meralco Bolts at Jayson Perkins ng Phoenix Super LPG sa inaugural 3x3 competition sa nagdaang SEAG sa Maynila noog 2019.

Samantala, susubukang makasungkit ng dalawang Kurash athletes ng medalya ngayong Miyerkules sa magkahiwalay na preliminary matches para sa women’s 87kgs at men’s 60kgs category sa Hoia Duc Gymnasium.

Tatangkain ng parehong 2019 SEAG medalists at playing Coach Al Rolan Llamas at Sydney Sy Tancontian na mahigitan ang nakamit nilang mga medalya sa pagsabak sa preliminary rounds ng men’s extra-lightweight category at women’s heavyweight class sa magkahiwalay na tagpo, ayon sa pagkakasunod.

Unang sasalang sa preliminary round ang dating Asian Indoor Martial Arts Game (AIMAG) bronze medalist na si Llamas kalaban ang Thailand fighter at sunod na makakatapat ang host country na ang Vietnam sa kanyang bracket.

'Pinas, tinabla ang laban sa Vietnam, lider pa rin

ni Anthony E. Servinio - @Sports | May 10, 2022

Tiniis ng Philippines Men’s Football Team na mabugbog nang 90 minuto bago maiuwi ang dumadagundong na 0-0 tabla sa defending champion at host Vietnam sa pagpapatuloy ng 31st Southeast Asian Games, Linggo nang gabi sa maulan na Viet Tri Stadium ng Phu Tho, Vietnam. Dahil sa resulta, nanatili ang Azkals sa liderato ng Grupo A sa ikalawang sunod na araw at bumuti ang pag-asa na mapabilang sa semifinals.

Nasa Vietnam ang bola sa 75% ng panahon kaya sunod-sunod ang kanilang bomba sa goal, subalit nagtrabaho nang husto ang depensa na nakaangkla kay goalkeeper Quincy Kammeraad na walang duda na Man of the Match. May dagdag din na swerte at lumihis ang mga sipa bunga ng hangin at basang palaruan.

Naglabas ng huling baraha si Coach Norman Fegidero at isa-isang ipinasok ang mga reserbang sina Yrick Gallantes, Lance Ocampo at Sandro Reyes kapalit sina Scott Woods, Dennis Chung at Jovin Bedic sa nalabing 15 minuto upang maka-goal, subalit nabitin ang Azkals. Matapos ang huling pito ng reperi ay nagdiwang ang Azkals habang nakatungo ang Vietnam sabay tahimik ng tinatayang 14,000 nilang kababayan.

Parehong umakyat sa apat na puntos ang Pilipinas at Vietnam, subalit lamang ang mga Pinoy dahil sa kanilang 4-0 panalo sa Timor Leste, habang 3-0 lang ang tagumpay ng Vietnam sa 2019 silver medalist Indonesia noong unang araw ng torneo noong Biyernes. Susunod para sa Azkals ang 2019 bronze medalist Myanmar ngayong Martes sa Viet Tri pa rin simula 5 p.m., oras sa Pilipinas.

Samantala, lalong naging mahigpit ang karera para sa semifinals ng 2022 Copa Paulino Alcantara matapos ang 1-1 tabla ng Stallion Laguna FC at Maharlika FC Manila noong Linggo nang gabi sa PFF National Training Center sa Carmona, Cavite. Sa unang laro, winakasan ng United City FC ang apat na sunod-sunod na panalo ng Dynamic Herb Cebu FC at nagtapos din sa 1-1 tabla.

Ganado na ang U-23 Azkals, naisahan ang T. Leste sa SEAG

ni Anthony E. Servinio - @Sports | May 8, 2022

Tinambakan ng Pilipinas ang Timor Leste sa Men’s Football, 4-0, sa pagsisimula ng aksiyon sa 31st Southeast Asian Games Biyernes nang gabi mula sa Viet Tri Stadium sa Phu Tho, Vietnam. Dahil sa malaking panalo, todo-ganado na ang Azkals papasok sa mahalagang laban ngayong araw ng Lunes kontra sa host at defending champion Vietnam sa parehong palaruan, simula 8:00 ng gabi, oras sa Pilipinas.

Bitbit ang sariwang alaala ng mga hindi magandang resulta sa kanilang mga nakalipas na tapatan sa Timorese, naglaro nang agresibo ang Azkals at nagbunga ito ng maagang goal ni Christian Rontini sa ika-11 minuto. Tumanggap ng bola si Rontini mula sa free kick ni kapitan Stephan Schrock at inulo ito papasok sa goal.

Patuloy na pumukpok ang mga Filipino sa second half at dumating ang pangalawang goal, salamat kay Dennis Chung sa ika-56 minuto. Isa pang beterano na si Jovin Bedic ang nagparamdam at lalong pinalayo ang Azkals sa ika-78 minuto galing sa assist ni reserba Lance Ocampo.

Hindi pa kuntento ang Pilipinas at humirit ng pang-apat na goal si Oskari Kekkonen sa ika-81. Kahit lumalapit sa goal ay ipinasa pabalik ni Oliver Bias ang bola sa humahabol na si Kekkonen para sa malakas na sipa na hindi naharang ni goalkeeper Junildo Perreira.

Sa isa pang laro, nagwagi ang Vietnam sa 2019 silver medalist Indonesia, 3-0, sa likod ng mga goal sa second half nina Nguyen Tien Linh (55’), kapitan Do Hung Dung (74’) at Le Van Do (88’).

Pansamantalang hawak ng Pilipinas ang liderato sa Grupo A dahil mas marami silang goal kumpara sa Vietnam. Bago ang laro sa Timor Leste, mataas ang paniniwala ni Coach Norman Fegidero na may pag-asa na pumasok ang Azkals sa semifinals kung gagamiting batayan ang nakita niya sa kanilang ensayo at paano nabubuo ang samahan ng mga manlalaro.

Huling nakapasok sa semis ang Pilipinas sa semis noong 1991 SEA Games sa Rizal Memorial Stadium kung saan naglaro ang ngayon ay 52-anyos na si Fegidero.