PHL Football, sasalang na vs. Timor Leste sa SEAG

ni Anthony E. Servinio - @Sports | May 6, 2022

Unang sasalang sa aksiyon ang Pilipinas sa simula ng 31st Southeast Asian Games Men’s Football Tournament sa Viet Tri Stadium sa Phu Tho sa Vietnam. Haharapin ng Azkals ang hamon ng Timor Leste, isang koponan na nagbigay ng maraming magagandang laban sa mga nakalipas na taon, simula 4:00 p.m.

Pangungunahan ang atake ng Azkals ng beteranong si Stephan Schrock na magbabalik para sa ikalawang sunod na SEAG. Kasama niya sina Jovin Bedic ng Kaya FC Iloilo at Enrique Linares bilang pinapayagang tatlong manlalaro na lampas sa itinakdang edad na 23.

Karamihan sa mga kasapi ng pambansang koponan ay naglalaro para sa Azkals Development Team sa Philippines Football League (PFL) sa gabay ni Coach Norman Fegidero. Mula sa ADT ay nariyan sina Oliver Bias, Scott Woods, Dennis Chung, Jayve Kallukaran, Jaime Rosquillo, Francis Tacardon, Martini Rey, Jermi Darapang, Lance Ocampo at mga goalkeeper Quincy Kammeraad at Enrico Mangaoang.

Kinuha mula sa iba pang koponan sa PFL sina Oskari Kekkonen at Sandro Reyes ng Kaya at Jacob Pena ng Stallion Laguna FC. Magbabalik din sa Azkals sina Yrick Gallantes, Christian Rontini at Miguel Mendoza matapos lumiban sa mga nakalipas na ilang torneo.

Sa huli nilang pagtatagpo sa 2022 AFF Under-23 Championships sa Cambodia noong Pebrero, nagtapos ang Azkals at East Timor sa 2-2 tabla. Asahan na magbabago ang timpla ng laro ngayon at nandiyan na sina Schrock, Linares at Bedic upang palakasin ang opensa.

Samantala, inilabas din ang opisyal na listahan ng Women’s Team na isa sa mga maagang paborito para sa gintong medalya. Kabilang dito ang mga beterana ng 2022 AFC Women’s Asian Cup India na sina kapitana Tahnai Annis, bise-kapitana Hali Long, Sarina Bolden, Quinley Quezada, Camille Rodriguez, Dominique Randle, Inna Palacios, Jessica Miclat, Olivia McDaniel, Eva Madarang, Sofia Harrison, Carleigh Frilles, Isabella Flanigan, Malea Cesar, Anicka Castaneda, Ryley Bugay at mga idinagdag na sina Alisha del Campo, Kaya Hawkinson, Jaclyn Sawicki at Chantelle Maniti.

Ladon, kapalit ni Paalam, para sumabak sa SEAG

ni VA - @Sports | April 28, 2022

Dahil sa iniindang injury sa kanyang kaliwang balikat,hindi isinama sa national boxing team na sasabak sa 31st Southeast Asian Games si Tokyo Olympics silver medalist Carlo Paalam.

Sa halip, pinalitan siya ni Rogen Ladon, ang kanyang naging sparring partner noong nakaraang Tokyo Games na siyang nasa kondisyon upang sumabak sa laban. "Bigayan lang kami, noong nasa Tokyo kami tinulungan niya ako. Siya ang naging sparring partner ko. Ngayong siya ‘yung nasa top form para sa SEAGames, ako naman ang tutulong sa kanya," ani Paalam.

Kasalukuyan ngayong magkakasama ang mga national boxers na nagsasanay sa training camp nila sa Thailand. Parehas ng weight class sina Ladon at Paalam. Kapapanalo lang ng 28-anyos na si Ladon ng flyweight gold sa nakaraang Thailand Open kasama ng mga kapwa SEA Games bound na sina women’s lightweight Risa Pasuit at middleweight Hergie Bacyadan.

Magpo-focus na lang si Paalam sa darating na Hangzhou 19th Asian Games na idaraos sa Setyembre at sa posibleng isa pang stint sa Paris 2024 Olympics. Ayon kina Association of Boxing Alliances in the Philippines Secretary General Marcus Jarwin Manalo at Australian training director Don Abnett, pagkakataon na ni Ladon na magpakitang gilas sa Hanoi. “Carlo (Paalam) is not ready to compete yet while Rogen Ladon is in good form,” ani Abnett. “Rogen has been performing well in training and sparring since the start of the year,” wika naman ni Manalo. “He also won gold in the Thailand Open while Carlo is still catching up with his conditioning.” Ang iba pang sasabak sa SEAGames ay sina Tokyo Olympics bronze medalist Eumir Felix Marcial (middleweight), Ian Clark Bautista (featherweight), James Palicte (light welterweight) at Marjon Piañar (welterweight) sa men's division at sina light flyweight Josie Gabuco, flyweight Olympian Irish Magno, featherweight Nesthy Petecio, Pasuit at Bacyadan naman sa women's.

Gilas, pinaghahandaan na ang mga katunggali sa SEAG

ni MC - @Sports | April 26, 2022

Dumaraan na sa matinding training ang Gilas Pilipinas Women dahil target nilang depensahan ang korona sa nalalapit na 31st Southeast Asian Games sa Mayo 12 -23 sa Hanoi, Vietnam.

Ang kanilang paghahanda sa torneo ay nagsimula pa noong Pebrero na pinangungunahan nina Afril Bernardino, Janine Pontejos, Clare Castro, Khate Castillo, Chack Cabinbin, Andrea Tongco, Camille Clarin, Ella Fajardo, Kristine Cayabyab, at Karl Ann Pingol.

Nagbalik sa lineup si Angel Surada, parehong sa 3×3 at 5×5 tournaments. Sumabak din sa lineup ang bagong recruits na sina Stefanie Berberabe, Gabi Bade, at Katrina Guytingco.

Dalawa sa players ang hindi makalalahok, sina Mai-Loni Henson ay may torneo pa sa France, habang si Jack Animam ay nagpapagaling pa sa ACL injury.

"They would know how to play together and the chemistry and everything just being together for a longer time," ayon kay Gilas Women head coach Patrick Aquino, mula sa official SBP website. "Hopefully, all those time na magkakasama kami, magawa namin lahat ng kailangan naming gawin."

Sinabi ni Aquino na pinaghahandaan na nila nang husto ang mabibigat na katunggali upang maipagtanggol ang unang gold na nasungkit noong 2019, parehong pinagharian ng Philippine men's at women's teams ang SEA Games podium.

Kinokonsiderang underdogs ang Gilas Women laban sa Thailand sa finals, pero kumapit sila sa kumpiyansa at tiwala sa sarili sa kompetisyon para masungkit ang 91-71 na tagumpay.