Santiago at Valdez, bumida sa panalo kontra Malaysia

ni GA - @Sports | May 14, 2022

Sinimulan ng Philippine women’s volleyball team ang kanilang kampanya sa idinaraos na 31st SEAG sa bisa ng 25-14, 25-20, 25-15 paggapi sa Malaysia kahapon sa Quang Ninh Gymnasium sa Hanoi, Vietnam.

Pinangunahan nina Jaja Santiago, Alyssa Valdez, Ria Meneses, Mylene Paat at Ces Molina ang nasabing unang panalo ng koponan pagkaraang mabigong makapagtala ng panalo noong 2019 SEA Games.

Ipinamalas ni Santiago ang nakayayanig na quick hits at matinding net defense sa pagbabalik sa national team matapos hindi makalaro noong 30th edition sa Pilipinas. Nakatuwang nila si setter Kyle Negrito, ang last minute replacement para kay Deanna Wong upang ibigay ang panalo sa kanilang Brazilian coach na si Jorge Souza de Brito.

Ang panalo ang una para sa Philippine women’s volleyball team mula noong preliminary round ng 2017 SEA Games sa Malaysia. Nagbanta pang tatabla ang Malaysia sa second set makaraang humabol mula sa 1-8 na pagkakaiwan sa second set at tuluyang agawin ang bentahe, 17-14. Dito nagsanib-puwersa sina Valdez, Santiago at Kat Tolentino upang maibalik sa kanila ang kalamangan, 20-19 na hindi na nila binitawan para sa 2-0 bentahe sa laban.

Sinimulan ng mga Pinay ang third frame sa pamamagitan ng 18-5 na pag-agwat sa mga Malaysians at hindi na tumingin pa hanggang selyuhan ng spike ni Paat ang tagumpay.

Susunod na makakalaban ng Team Philippines ang defending champion Thailand ngayong 3 p.m. Manila time.

Escarpe, gold sa Kurash; bronze naman kay Bianca

ni GA - @Sports | May 14, 2022

Buong-pusong ibinuhos ni Davaoeño Jackielou 'Jack' Escarpe ang kanyang lakas at determinasyon upang maibigay sa Pilipinas ang ikalawang gintong medalya mula sa Kurash event kahapon sa pagtatapos ng naturang event sa 31st Southeast Asian Games sa Hoai Duc Gymnasium sa Hanoi, Vietnam.

Patuloy na nanindigan ang dating national judo athlete mula University of Mindanao para kunin ang gold medal sa men’s 73kgs category nang talunin si Apicha Boonrangsee ng Thailand sa bisa ng 1-0 at maibigay ang nag-iisang ginto para sa national Kurash team. Nakuha nina Mohamad Razlan Rozaidi ng Malaysia at Soe Myint Tun ng Myanmar ang parehong bronze medals.

Hindi nagpatinag ang tubong Generoso, Davao Oriental sa unang laban pa lamang ng silatin ang ang defending champion na si Ngoc Son Vu ng Vietnam sa preliminary round at sinunod na pinatumba si Soe Myint Tun ng Myanmar.

Nahigitan ni Escarpe ang bronze medal performance sa men’s judo team event noong 2019 SEAG sa 'Pinas. Hindi pinalad si Estie Gay Liwanen na muling magkampeon matapos makuntento sa bronze medal sa women’s 57kgs, habang kinubra ni Bianca Estrella ang isa pang bronze medal sa women’s 70kgs category.

Napagwagian ni Liwanen ang titulo sa women’s 63kgs noong nagdaang tatlong taon, ngunit tinanggal ang kategorya ng host country, habang bumagsak sa third place si Estrella na dating runner-up ng naturang weight category.

Wagi ng gold sa women’s 70kgs si Thi Thanh Trm Nguyen, habang silver si Phyo Swe Zin Kyaw ng Myanmar. Nauna nang nagsipagwagi ng 3 silvers mula kina Charmea Quelino (women’s 52kgs), Helen Aclopen (women’s 48kgs) at Sydney Sy Tancontian (women’s +87kgs), habang may na bronze mula kina playing coach Al Llamas (60kgs), Renzo Cazenas (81kgs) at George Baclagan (90kgs).

Sa kabuuan ay may 1 gold, 3 silver at 5 bronze medals ang Kurash Sports Federation of the Philippines na hinigitan ang 1 silver noong 2019.

3 silver at 3 bronze, dinamba ng Kurash

ni GA - @Sports | May 13, 2022

Tiwala ang Kurash Sports Federation of the Philippines na makukuha nila ang gintong medalya sa nalalabing tatlong kategorya ngayong hapon matapos sumungkit ng anim na medalya sa unang dalawang araw ng kompetisyon sa 31st Southeast Asian Games sa Hoai Duc Gymnasium sa Hanoi, Vietnam.

Inihayag ni national head coach Dennis Catipon na malaki ang tsansa na makukuha nila ang inaasam na gold medals mula kina 2019 SEAG lone gold medal winner Estie Gay Liwanen, silver medalist Bianca Estrella at beteranong si Jack Escarpe.

Nanghinayang ang dating SEA Games medalists turn national coach sa hindi pagkakapanalo ng ginto nina Charmea Quelino sa women’s 52kgs at Sydney Sy Tancontian sa women’s +87kgs category.

“Medyo okay naman 'yung naging performance nila, kaso nabitin lang tayo sa gold medal. Medyo pumabor talaga sa host country kaya sayang 'yung dalawang silver kahapon (Martes). Pero panigurado malalakas na naman 'yung mga lalaro sa atin sa Friday at malaki ang chance for gold medal,” pahayag ni Catipon.

Bumaba ng timbang ang dating two-time SEAG judo bronze medalist na si Liwanen na sasabak sa women’s 57kgs division. Tatangkain ng dating UAAP judo gold medalist na si Estrella na makuha ang ginto sa women’s -70kgs, habang magpapakitang-gilas si Escarpe sa men’s 73kgs class.

Bukod kina Quelino at Tancontian, nagwagi rin ng silver medal si Helen Aclopen sa women’s -under 48kgs, at mga bronze medalists na sina George Angelo Baclagan (men’s 90kgs), Renzo Cazeñas (men’s -81kgs) at playing-coach Al Rolan Llamas sa men’s -60kgs category. Tanging si Adrian Josef Perillo ng men’s 66kgs ang nabigong mag-uwi ng medalya.