Pagpapadala ng domestic workers sa Saudi Arabia, suspendido – DOLE

ni Lolet Abania | November 28, 2021

Isinuspinde pansamantala ng Department of Labor and Employment (DOLE) ang pagpoproseso at deployment ng mga bagong hired na mga household service workers (HSWs) sa Kingdom of Saudi Arabia.

Sa ulat, ang kanilang mga deployments ay sinuspinde dahil sa nangyaring labor abuse incident, kung saan sangkot ang isang retiradong Saudi general na minamaltrato umano ang maraming overseas Filipino workers (OFWs) sa naturang teritoryo.

Ang iba’t ibang pangalan naman ng mga employer ay inilagay na rin sa employment contract ng HSWs.

Si DOLE Secretary Silvestre Bello III ang siyang nag-isyu ng nasabing memorandum habang inatasan na rin ang Philippine Overseas Labor Offices na ihinto muna ang beripikasyon ng mga newly-hired domestic workers.

Ayon pa sa report, ang domestic workers at skilled workers na nagre-renew ng contracts ay exempted sa ipinapatupad na deployment ban.

Rooftop ng Phil. Consulate General sa Saudi Arabia, nasunog

ni Lolet Abania | July 30, 2021

Sumiklab ang sunog sa rooftop ng isang gusali ng Philippine Consulate General sa Jeddah, Saudi Arabia nitong Huwebes nang umaga.

Sa isang interview kay acting Head of Post ng Philippine Consulate General sa Jeddah na si Consul Mary Jennifer Dingal, nag-umpisa ang sunog bandang alas-7:00 ng umaga, kung saan nagliyab umano ang rooftop ng Building 4 na inookupahan ng iba’t ibang attached agencies ng gobyerno ng Pilipinas gaya ng Department of Social Welfare and Development (DSWD), Pag-IBIG Fund at Social Security System (SSS).

Ayon kay Dingal, ang naturang rooftop ng gusali ang ginawang prayer room ng mga staff nilang Muslim.

“Sa initial naming pag-iimbestiga, lumalabas na posibleng nagsimula ang apoy sa natunaw na wiring na nakadikit sa mga carpet ... dala marahil ito ng mainit na panahon,” pahayag ni Dingal.

Agad namang naapula ang apoy ng kanyang mga security personnel dahil sa ginamit na mga bago nilang fire extinguishers habang mabilis na rumesponde ang mga bumbero at mga pulis sa lugar.

Iniimbestigahan pa sa ngayon ng mga awtoridad ang naging sanhi ng sunog habang hindi muna ipinagamit ang nasabing gusali.

Sinabi pa ni Dingal na wala namang nasaktan matapos ang sunog habang balik na sila sa kanilang normal na operasyon sa Consulate.

Pagpapadala ng mga OFWs sa Saudi Arabia, stop muna

ni Ronalyn Seminiano Reonico | May 28, 2021

Sinuspinde ng pamahalaan ang deployment ng mga overseas Filipino workers (OFWs) sa Saudi Arabia.

Sa inilabas na memorandum ni Department of Labor and Employment (DOLE) Secretary Silvestre Bello III, ipinag-utos niya sa Philippine Overseas Employment Administration (POEA) ang pansamantalang suspensiyon ng deployment ng mga OFWs sa Saudi Arabia matapos makatanggap ang ahensiya ng ulat na pinasasagot umano ng mga employers/foreign recruitment agencies sa mga manggagawang Pilipino ang mga kailangan upang makapasok sa naturang bansa.

Saad pa ni Bello, “In the interest of the service, you are hereby instructed to effect the temporary suspension of deployment of OFWs to the Kingdom of Saudi Arabia effective immediately and until further notice.

"The department received reports that departing OFWs are being required by their employers/foreign recruitment agencies to shoulder the costs of the health and safety protocol for COVID-19 and insurance coverage premium upon their entry in the Kingdom."

Samantala, ayon sa DOLE, maglalabas sila ng official statement kung kailan muling magpapatuloy ang deployment ng mga OFWs sa Saudi Arabia kapag nalinaw na ang naturang isyu.