Vaxx kontra-COVID-19 ng mga minors sa San Juan, kumpleto na

ni Lolet Abania | November 18, 2021

Ipinahayag ni San Juan City Mayor Francis Zamora na natapos na nila ang pagbabakuna kontra-COVID-19 sa tinatayang 5,000 kabataan na edad 12 hanggang 17 kung saan umabot sa 235% ng kanilang target na populasyon.

Sa isang television interview ngayong Huwebes, sinabi ni Zamora na bukod sa mga batang residente ng San Juan, nakumpleto na rin nila ang pagbabakuna sa mga non-residents na nag-aaral sa lungsod na nag-register sa kanilang vaccination program.

Sa ngayon, ayon kay Zamora tumutulong na ang lokal na pamahalaan sa pagbabakuna ng mga minors na edad 12 hanggang 17 na mula sa ibang lugar.

“We are just waiting for the announcement, hopefully in the next few months, for the vaccination of those below 11 years old because this has already been done in the United States,” sabi ni Zamora sa isang interbyu.

Gayundin, sinimulan na ng San Juan ang pag-administer ng booster shots ng kanilang healthcare workers, kung saan umabot sa 400 ang nabakunahan nitong Miyerkules.

Sinabi rin ni Zamora na mayroong 1,200 medical frontliners na nagseserbisyo sa lungsod at 3,000 mula naman sa Cardinal Santos Medical Center.

“I’m optimistic [that] by the end of next week, we should be done with all of them,” ani pa Zamora.

9-anyos, tinamaan ng Delta variant ng COVID-19

ni Lolet Abania | July 27, 2021

Kinumpirma ng San Juan City na may dalawang kaso ng mas nakahahawang Delta variant ng COVID-19 sa kanilang lokalidad, isa rito ay menor-de-edad.

Sa Facebook page, sinabi ni Mayor Francis Zamora na kabilang sa dalawang Delta variant cases ay isang 9-anyos na lalaki at isang 25-anyos na babaeng empleyado.

Ang 25-anyos na babae ay nagtatrabaho sa isang call center sa ibang siyudad sa Metro Manila at nagpositibo sa test sa virus noong Hulyo 1.

“She was asymptomatic and finished her quarantine on July 13,” ani Zamora. Ang ikalawang Delta variant patient ay nakaranas ng lagnat, maging ang kanyang mga magulang ay tinamaan din ng COVID-19. Ang ama ng bata ay naging close contact at officemate ng 25-anyos na babaeng pasyente na infected ng nasabing variant. “The family underwent quarantine at the Kalinga Center starting July 1 and were released on July 15,” sabi ni Zamora.

Ayon sa alkalde, naipaalam lamang sa city government ang sequenced samples ng mga pasyente nitong Lunes, na halos isang linggo na matapos na makumpleto ang kanilang quarantine.

Sinabi ni Zamora na para mas maiwasan ang maaaring transmissions, ang lokal na pamahalaan ay nagsagawa ng mas masidhing contact tracing. “We are taking all necessary precautions against the spread of the COVID-19 Delta variant,” diin ni Zamora.

“All health and safety protocols are being strictly implemented while stringent contact tracing is being conducted to make sure we arrest the spread of the virus,” sabi ng mayor. Sa ngayon, ang San Juan City ay nakapagtala ng 110 active cases ng COVID-19. Gayundin, ang San Juan ay isa sa mga lungsod na nakakumpleto na ng first dose ng COVID-19 vaccines para sa 100% ng kanilang populasyon na 18-anyos pataas.

Shopping center, gagawing vaccination center

ni Lolet Abania | May 26, 2021

Isang mall ang gagawing vaccination center ng lokal na pamahalaan ng San Juan City para ihanda sa pagbabakuna ng mga A4 priority list o economic frontliners at mga indigent na magsisimula sa Hunyo.

Ayon kay Mayor Francis Zamora, ang mga sinehan at iba pang stall sa Greenhills Shopping Center ang gagamitin para mas malaking lugar habang marami ang mababakunahan araw-araw.

“Ang Greenhills Shopping Center ang ating main commercial area sa ating lungsod at marami po sa A4 economic frontliners ay dito nagtatrabaho,” ani Zamora. Umaabot na sa 1,800 kada araw ang natuturukang indibidwal ng COVID-19 vaccines sa lungsod.

“They will simply walk dito sa ating Theater Mall, gagamitin natin ‘yung mga movie theaters, ‘yung mga areas ng shopping center na pinabakante muna natin for a while upang magsilbi bilang vaccination center,” sabi ni Zamora.

Ayon sa alkalde, dahil sapat pa hanggang sa loob ng 8 araw ang supply ng bakuna, tiwala siya na agad mabibigyan ng Department of Health ang San Juan City government ng karagdagang COVID-19 vaccines sakaling maubos na ito.

Matatandaang inanunsiyo ng Inter-Agency Task Force on COVID-19 response na magsisimula ang pagbabakuna ng mga nasa A4 at A5 category o ang economic frontliners at mga mahihirap sa Hunyo.

Samantala, nasa 4,305,575 mamamayan na ang nabakunahan kontra-COVID-19. Sa bilang na ito, 3,318,646 ang naturukan ng first dose habang 986,929 ang nabakunahan ng second dose. Target ng pamahalaan na mabakunahan ang 58 milyong Pilipino para makamit ang herd immunity ng bansa.