Pagbaha ng lahar sa Albay, dahil sa quarrying

ni Ronalyn Seminiano Reonico | November 4, 2020

Sinuspinde ng Department of Environment and Natural Resources (DENR) ang quarrying operations sa paligid ng Bulkang Mayon matapos umagos ang lahar sa kasagsagan ng pananalasa ng Bagyong Rolly na ikinamatay ng ilang residente sa Albay.

Daan-daang kabahayan ang natabunan ng lahar sa Guinobatan, Albay at isinisisi ang insidente sa quarrying operations.

Sa utos ni Pangulong Rodrigo Duterte, nagsagawa ng imbestigasyon ang DENR at ilan pang ahensiya ng pamahalaan.

Ayon kay DENR Secretary Roy Cimatu, iniwan umano ng mga quarry operators ang ilan sa mga kagamitan nila sa gitna ng ilog.

Aniya, “Kaya noong bumababa ang tubig, malakas, dala-dala 'yung lahar pati 'yung mga stockpiles nila doon, boulders ay kasama na. And nag-swollen ‘yung river, umabot doon sa residential houses.”

Ayon naman kay DENR Undersecretary Jonas Leones, aabutin ng 15 araw bago makumpleto ang imbestigasyon sa insidente.

Aniya, “Titingnan namin kung ano ang magandang recommendation.”

May permit din umano ang quarrying operations mula sa local government unit (LGU).

Handa naman umanong makipagtulungan ang LGU sa utos ni P-Duterte ngunit umaapelang tapusin muna ang imbestigasyon bago itigil ang operasyon.

Ayon naman kay Albay Governor Al Bichara, kakailanganin ang mga kagamitan sa quarrying operations para sa rehabilitasyon ng mga bahay at establisimyento sa probinsiya.

Aniya, “If they will stop quarrying, we will run out of aggregates for reconstruction, rehabilitation of our province, not only that of the region because most of the aggregates come from Albay.”

Bagyong Siony, lalong lumakas

ni Ronalyn Seminiano Reonico | November 4, 2020

Ganap nang Severe Tropical Storm ang Bagyong Siony na lalo pang lumakas at ayon sa Philippine Atmospheric, Geophysical and Astronomical Services Administration (PAGASA), may posibilidad na lalo pa itong lumakas bago mag-landfall.

Ayon sa tala ng PAGASA ngayong Miyerkules nang hapon, may hanging taglay ang Bagyong Siony na may lakas na 95 kilometers per hour (kph).

Huling namataan ang Bagyong Siony sa 735 kilometers east ng Basco, Batanes.

Inaasahang kikilos ito pa-kanluran at patungong extreme Northern Luzon areas ng Batanes at Babuyan Islands bukas nang gabi o sa Biyernes nang umaga.

Sa ngayon ay nakataas ang Tropical Cyclone Wind Signal No. 1 sa mga sumusunod na lugar:

• Hilagang bahagi ng Cagayan (Santa Ana, Gonzaga)

• Silangang bahagi ng Babuyan Islands (Balintang Island, Babuyan Island, Didicas Island, at Camiguin Island)

Maaapektuhan din ng malakas na hanging dala ng Bagyong Siony ang Cagayan Valley at Ilocos Norte.

“Light to moderate with at times heavy rains” naman ang mararanasan sa Bicol Region at ilang lugar sa Aurora, Quezon, at silangang bahagi ng Cagayan at Isabela.

Nagbabala rin ang PAGASA sa posibilidad ng pagbaha at landslides.

32 katao pinatay, 20 bahay sinunog ng gunmen

ni Ronalyn Seminiano Reonico | November 3, 2020

Patay ang 32 katao at 20 bahay naman ang sinunog ng mga gunmen sa western Ethiopia noong Linggo, ayon kay Regional Administrator Elias Umeta.

Aniya, ang mga armadong lalaki ay mula sa grupo ng OLF Shane ng Western Wollega Zone, rehiyon ng Oromiya.

Aniya, "We buried today 32 of them. About 700 to 750 people were also displaced from the area."

Ang grupong OLF Shane ay humiwalay sa Oromo Liberation Front, isang opposition party.

Samantala, hindi pa malinaw ang dahilan ng pagpatay ng naturang grupo, ayon kay Elias.

Aniya, "They were executed after they were told by the armed group they want to have a meeting with them."

Ayon naman sa Ethiopian Human Rights Commission, target ng mga gunmen ang mga taong mula sa ethnic Amharic group.

Pahayag ni Chief Commissioner Daniel Bekele, "They were dragged from their homes and taken to a school where they were killed.

" These gruesome killings of civilians are unconscionable and flout basic principles of humanity."