Scammers sa Bagyong Ulysses ipinahahanap na sa NBI at PNP

ni Ronalyn Seminiano Reonico | November 19, 2020

Ipinahahanap ni Samar 1st District Rep. Edgar Sarmiento sa Philippine National Police (PNP) at National Bureau of Investigation (NBI) ang mga scammers na nanghihingi ng pera na ginagamit ang sitwasyon ng mga sinalanta ng bagyo.

Binalaan din ni Sarmiento ang publiko matapos makarating sa kanya na mayroong isang grupo na nagpapanggap na mula sa kanyang opisina na humihingi ng pera sa kanyang mga kaibigan, supporters at ilang businessmen bilang parte raw umano ng fundraising activity para sa mga biktima ng bagyo.

Aniya, “The office of one of our colleagues called to verify if I’m seeking assistance in the form of cash donation for the victims of the calamity. Please be informed that there is no such activity or any donation drive.”

Ginagamit umano ng mga scammers ang pangalan ng mga pulitiko, showbiz personalities at ilan pang kilalang tao upang makakalap ng malaking halaga.

Saad pa ni Sarmiento, “While we are appealing for help for tens of thousands of families who lost their homes, properties and the lives of their loved ones, we should make sure that our donations do not end up in the hands of these unscrupulous syndicates who are preying on the misfortunes of other people.”

Dobleng pensiyon sa Senior Citizens, inihirit ni Sen. Pacquiao

ni Ronalyn Seminiano Reonico | November 17, 2020

Isinusulong ni Senator Manny Pacquiao na doblehin ng Department of Social Welfare and Development (DSWD) ang monthly pension ng mga senior citizens.

Aniya, "Paano naman makaka-support ang P500 na pension nila sa mga needs nila? Ang gusto ko nga sana, minimum, at least P1,000 para sa senior citizen dahil kawawa sila, eh."

Sang-ayon naman si Senator Imee Marcos sa nais ni Sen. Pacquiao.

Aniya, "Totoo, sobrang baba kasi. Ano naman ang magagawa mo sa P500 a month? Tapos ibibigay kada tatlong buwan, P1,500 din lang. Napakakaunti po.”

Sa ilalim ng Republic Act (RA) 9994 o ang Expanded Senior Citizens Act of 2010, ang mga may sakit at disability na walang pension mula sa ibang ahensiya ng gobyerno at wala ring permanenteng pagkakakitaan o souce ng financial assistance ay kuwalipikado upang makatanggap ng social pension mula sa DSWD sa pamamgitan ng Social Pension for Indigent Senior Citizens Program.

Patay kay ‘Ulysses’ 73 na

ni Ronalyn Seminiano Reonico | November 17, 2020

Umakyat na sa 73 ang bilang ng mga namatay sa Bagyong Ulysses, ayon sa National Disaster Risk Reduction and Management Council (NDRRMC).

Sa Region 2, naitala ang 24 bilang ng mga nasawi; 17 sa Calabarzon; 10 sa Cordillera Administrative Region; walo sa Metro Manila; 8 din sa Bicol Region; at 6 sa Central Luzon.

Sugatan ang 24 katao at nawawala ang 19 mula sa Regions 2, 5, CAR, Calabarzon at Metro Manila.

Ayon naman sa NDRRMC, ibeberipika pa nila ang naiulat na bilang ng mga sugatan at nawawala.

Tinatayang aabot naman sa P2.7 billion ang agricultural damage na naidulot ng Bagyong Ulysses at P5.2 billion infrastructure damage.

Ayon sa NDRRMC, hindi pa rin madadaanan ang 73 road sections at 55 tulay dahil sa baha, mudflow, landslide at pag-apaw ng ilog.