P1.72M halaga ng ilegal na kargamento, nasabat ng BOC

ni Ronalyn Seminiano Reonico | December 15, 2020

Nakumpiska ng Bureau of Customs - Port of Davao (BOC) ngayong Martes ang kargamentong naglalaman ng agarwood, isa sa world’s most expensive raw materials, na idineklarang wood frames para sa souvenirs.

Sa pisikal na eksaminasyon at sa pamamagitan ng x-ray scanning, nakita ang 671 piraso ng agarwood na nagkakahalagang P1.72 million na nakatakdang i-export nang walang kaukulang permits.

Pahayag ni Erastus Austria, Port of Davao District Collector, "The Port would like to thank the DENR, the PNP Aviation Security Group and Customs NAIA’s collaborative work with us, led by District Collector, Carmelita Talusan.

“We will continue to closely coordinate with them to ensure that our borders are efficiently protected from potential illegal exports of endangered trees… Certainly, we will not tolerate these acts of illegal trade in any of our airports and seaports.”

Samantala, ite-turn over ng BOC ang naturang kargamento sa Department of Environment and Natural Resources (DENR).

Unang Pinoy nurse na naturukan ng COVID vaccine, nakaramdam ng side effects

ni Ronalyn Seminiano Reonico | December 14, 2020

Nakaranas ng ilang “very common” side effects ng pagpapabakuna ang isang Filipino nurse sa United Kingdom na naturukan ng Pfizer-BioNTech COVID-19 vaccine noong Miyerkules.

Kinilala ang naturang nurse na si Leo Quijano at aniya ay marami na ring Pinoy nurses ang naturukan ng naturang bakuna.

Aniya, “So far, this is my pang-apat na araw ko na po after nag-vaccination ako ng COVID-19 vaccine. Wala naman akong nararamdaman so far.”

Saad pa ni Quijano, “A day after ng injection, nagkaroon ako ng mild body pain, tiredness, at saka mild fever. Pero, nawala rin po the next day because I took some paracetamol.”

Hinikayat din ni Quijano ang mga kapwa-Pinoy na magpabakuna kontra COVID.

Aniya, “The reason why I'm doing this interview is to spread awareness para ma-share rin po 'yung mga experiences ko para mawala po 'yung anxiety at saka agam-agam noong mga kababayan natin.

“Nakakatakot kasi marami nang nangyari before na mga reaction to a certain vaccination diyan sa atin. Pero, I bet this one so far is safe kasi pinag-aralan naman po before it becomes available to the public.”

Sa December 31 naman ang susunod na dose ng vaccine kay Quijano.

WALLY BAYOLA, NAGKA-COVID, PAGSINOK ANG SINTOMAS

ni Ronalyn Seminiano Reonico | December 12, 2020

Ibinulgar ng komedyanteng si Wally Bayola na nagpositibo siya sa COVID-19 sa segment ng “Eat Bulaga!” na “Bawal Judgmental” ngayong Sabado at aminado siyang dahil ito sa kanyang kapabayaan.

Aniya, “Relax-relax lang. Masyado akong naging paniwalain sa social media na ay, wala namang COVID. ‘Di naman totoong may COVID. Parang nadala ako, so hindi na ako nag-mask. Napagod na akong mag-mask, mag-face shield.”

Kuwento pa ni Wally, kapag lumalabas daw siya at may nagpapa-picture, nagtatanggal daw siya ng mask at dumidikit pa sa mga tao.

Dagdag pa ni Wally, “Na-relax ako. Hindi ako nag-iingat.

“Naging mentalidad ko na walang COVID.”

Kuwento pa ni Wally, nu’ng nag-taping sila ay nawalan siya ng boses at tinukso siya umano ng kanyang co-host sa “Eat Bulaga!” na si Paolo Ballesteros na mayroon siyang COVID kaya nagpa-swab test siya kung saan lumabas ang positive result nito.

Nang malaman umano ni Wally na positibo siya ay hinimatay siya at nagpaospital dahil bumaba ang kanyang oxygen level. Wala naman umano siyang naramdaman na iba pang sintomas ng COVID-19 maliban sa pagsinok.

Aniya, “Hindi ko na maintindihan. Wala naman akong nararamdaman... wala naman akong lagnat, wala akong ubo.

“Pagdating sa ospital, doon lumabas mga symptoms ko.

“Hindi naman ako nawalan ng panlasa, pang-amoy, pero sinok ako nang sinok ng dalawang araw, walang tigil.”

Inamin din ni Wally na dumating siya sa punto na inisip niyang mawawala na siya at naiisip niya kung sino ang mag-aalaga sa kanyang ina.

Saad pa ni Wally, limang araw daw siyang nanatili sa ospital.

Aniya, “Kasi ‘di ko na talaga kaya ‘yung ospital kasi parang wala namang nangyayari sa akin. Nakiusap ako, ru’n na lang ako sa bahay magku-quarantine. Pinayagan naman ako kasi okay naman ako, wala namang mga symptoms na malala sa akin. Lahat ng mga test na ginawa naman sa akin is clear.”

Ginawa umanong inspirasyon ni Wally ang kanyang ina kaya naging maingat na siya, nag-ehersisyo at kumain nang tama.

Payo naman ni Wally sa publiko, “‘Wag n’yo pong ilagay sa isip n’yo na walang pandemya kasi meron po. Naramdaman ko meron pong COVID virus. ‘Wag tayong maging relax.

“Nangyari po sa ‘kin... Nagpabaya ako. ‘Wag kayong magpabaya.”