'Pag napatunayan daw guilty sa war on drugs…Duterte kay Trillanes: Kung makulong, eh di makulong

ni Ronalyn Seminiano Reonico | December 17, 2020

Handang makulong si Pangulong Rodrigo Duterte kung sakaling mapatunayan ng International Criminal Court's Office of the Prosecutor na may kriminalidad na naganap sa kanyang ipinatupad na war on drugs.

Pahayag ng pangulo, "Ba't mo ako takutin na magpreso? If it's my destiny magpreso ako, then magpreso ako. Kung may ginawa kami, sige. Kung makulong, eh, di makulong.”

Ito'y kaugnay ng naging pahayag ni former Senator Antonio Trillanes sa Twitter na, “Statement re: latest ICC report: “The time for reckoning is near for Mr. Duterte, his cohorts and enablers. They have to answer for the thousands of Filipino lives killed during his brutal war on drugs.

“Duterte may try to ignore the jurisdiction of ICC over him, but deep inside he knows that he cannot get away from this one. Having profiled Duterte, I am sure nanginginig na 'yan sa takot.”

Buwelta naman ni P-Duterte kay Trillanes, “Trillanes, alam mo, ‘pag nakita ko ‘yung pangalan mo, nakikita ko tae ng aso. Everytime I look at you, you’re shit of a dog.”

Aniya pa, “Tapos, sabi niya, tuturo rito, drug lord dito, drug lord doon. Pati ‘yung anak ko na maliit, dalagita. Ano’ng nangyari? Wala, ni isa. May napakulong ka ba, Trillanes? Sino, sino napakulong mo? Nandiyan pa rin sila.

“Ako, wala akong ipinakulong pero wala na sila. Ikaw, daldal, nandiyan pa sila. Ako, nagdadaldal, tapos wala na sila. Ewan ko kung saan pumunta ang mga p—ng inang ‘yan.”

Panawagan din ng pangulo sa publiko, “‘Wag kayong maniwala riyan sa opposition.

Walang ginawa ‘yan, gusto lang ‘yan bumalik kasi kung maaari lang ibigay ko na lang para hindi na sisirain ang Pilipino, hindi na tayo masira. Ibigay ko na lang.

“Tama ang sabi ni Bong [Go], 'If you want to appear white, you paint the other person black.' Pinturahan mo ng itim at ika’y puputi… ‘yan ang ginagawa nila. Pinipinturahan kami ng itim para bumango sila, maputi sila.”

Duque, sinisi sa delay sa COVID-19 vaccine, todo-paliwanag

ni Ronalyn Seminiano Reonico | December 17, 2020

Dumepensa si Department of Health Secretary Francisco Duque III ngayong Huwebes laban sa mga akusasyong siya umano ang dahilan ng pagkaantala ng pagdating sa bansa ng COVID-19 vaccine na gawa ng Pfizer.

Ayon kay Duque, ang required na confidentiality disclosure agreement (CDA) kasama ang Pfizer ay nakatakdang lagdaan ng Office of the President (OP) sa pamamagitan ng Office of the Executive Secretary (ES) at hindi ng Department of Health (DOH).

Aniya, “August 11, Pfizer sent a draft, 'yun na 'yung CDA. But that draft was meant to be signed by the Office of the ES on behalf of all government agencies.

“That would have spared Pfizer from signing a confidentiality agreement with many other government agencies, so isa na lang dapat.”

Noong September 24, sa DOH na lamang umano pinapipirmahan ng ES ang naturang CDA, ayon kay Duque. Ngunit aniya ay hindi maaaring lumagda ang DOH para sa buong pamahalaan kung kaya pumirma ang Department of Science and Technology (DOST) at ang vaccine czar na si Secretary Carlito Galvez, Jr. sa CDA nang magkahiwalay noong Nobyembre. Noong October 20 naman ay nilagdaan ni Duque ang CDA.

Aniya pa, “I have the chronology of events, so that this is all documented. There's no such thing that I did not act quick enough.

“When you go through a process, you cannot just be hurrying up things just like that. You have to be prudent and cautious especially because you are talking about a novel vaccine.”

Dagdag pa ni Duque, “Hindi ito simpleng parang gagawa ka lang ng dokumento.”

Ayon din sa kanya, nakipag-coordinate sila sa Pfizer kaugnay ng mga revisions sa CDA.

Noong June 24 ay nag-send umano ang Pfizer ng overview ng kanilang vaccine kontra COVID-19. Noong June 29 naman ay ini-refer ng DOH ang proposal sa DOST-Philippine Council for Health Research and Development upang makapagsagawa ng evaluation.

Nagpadala rin umano ng sulat ang DOH sa Pfizer noong August 6 kung saan binigyang-diin na kailangang dumaan sa evaluation ng DOST ang naturang vaccine.

Noong September 4, nagkaroon umano ng meeting ang DOH, DOST, Pfizer at si ES Salvador Medialdea para sa update sa vaccine development.

Noong September 14 naman, natanggap umano ni Duque ang revised CDA kasama ang revision mula sa Office of ES. Noong September 24, sinabi ng ES na ang DOH umano ang lumagda sa CDA kasama ang Pfizer.

Dumepensa si Duque kaugnay ng naging pahayag ni Senator Panfilo Lacson kamakailan.

Ayon kay Lacson, nagkaroon ng negosasyon sa pagitan nina U.S. Secretary of State Mike Pompeo at Foreign Affairs Secretary Teodoro Locsin Jr. upang makakuha ang Pilipinas ng 10 million doses ng Pfizer COVID-19 vaccines sa Enero, 2021.

Aniya, “They could have secured the delivery of 10 million Pfizer vaccines as early as January next year, way ahead of Singapore but for the indifference of Sec. Duque who failed to work on the necessary documentary requirement namely the Confidentiality Disclosure Agreement (CDA) as he should have done.”

Samantala, siniguro rin naman ni Duque na patuloy pa rin ang pakikipag-ugnayan ng DOH sa Pfizer para sa COVID-19 vaccine.

"Twitter Killer" sa Japan ng 9 katao, sinentensiyahan ng kamatayan

ni Ronalyn Seminiano Reonico | December 15, 2020

Sinentensiyahan ng kamatayan ng Tokyo district court ngayong Martes ang isang lalaking tinaguriang “Twitter Killer” na nasa likod ng pagpaslang sa 9 katao noong 2017.

Sa pamamagitan ng Twitter, humahanap ang suspek na kinilalang si Takahiro Shiraishi, 30, ng kanyang mabibiktima sa kanyang apartment sa Zama City, Kanagawa, Tokyo.

Ayon sa Jiji News Agency, ang mga biktima ni Shiraishi ay may suicidal thoughts o mga nag-iisip ng pagpapakamatay at iniimbitahan umano sila ng suspek sa kanyang apartment upang tulungan ang mga ito na isagawa ang kanilang binabalak.

Ayon naman sa defense lawyers ni Shiraishi, mayroon umanong approval ng mga biktima ang pagpatay sa kanila ng suspek.

Ngunit pahayag ni Presiding Judge Naokuni Yano, hindi sang-ayon ang mga biktima sa pagpaslang sa kanila ni Shiraishi at nasa tamang pag-iisip umano ito upang maging responsable sa kanyang mga ginawang pagpatay.

Aniya, “None of the victims agreed to be killed. The defendant was found to be fully responsible.”

Ayon sa mga impormasyong natanggap ng awtoridad, 8 kababaihan at isang lalaki umano na edad 15 hanggang 26 ang mga nabiktima ni Shiraishi simula noong Agosto hanggang Oktubre, 2017 at dumanas din umano ng pang-aabusong seksuwal ang lahat ng mga babaeng biktima. Upang masigurong hindi aatras ang mga ito, pinaiinom umano ng suspek ang mga biktima ng alcohol, tranquilizers at sleeping pills at saka hinahalay at pinapatay.

Nadiskubre rin ng pulisya ang ulo ng mga biktima at ang kanilang mga buto na nakatago sa cooler boxes sa kanyang apartment.

Samantala, humingi ng paumanhin si Shiraishi sa mga pamilya ng kanyang mga biktima at aniya, “I am sorry for having killed some of the victims, with whom I spent a lot of time, and would like to apologize to these families.”

Hindi rin umano aapela si Shiraishi sa ipinataw sa kanyang death penalty, ayon sa Japanese media.