Bagong klase ng COVID, mas matindi at delikado…Face-to-face classes sa 2021, ‘di tuloy — P-Duterte

ni Ronalyn Seminiano Reonico | December 26, 2020

Binawi ni Pangulong Rodrigo Duterte ang kanyang pag-apruba sa pagsasagawa ng dry run ng face-to-face classes sa January 2021 sa mga low COVID risk na lugar dahil sa bagong klase ng COVID-19 na pinaniniwalaang mas matindi at mas delikado.

Pahayag ni P-Duterte, “I have allowed kasi the face-to-face classes as a pilot project all over the country. With the new strain, true or not, maybe it's true because it’s being validated by Germany, South Africa, UK, eh, iyong order ko noon kay (Education Secretary Leonor) Briones, I’m calling back the order.

“I will not allow face-to-face classes for children until we are through with this [strain].”

"We have to know the nature of the germ we are confronting. We don't know anything and I cannot take the risk of allowing the children. That would be a disaster actually.”

Aniya ay aatasan niya si DepEd Sec. Leonor Briones na isuspinde ang lahat ng aktibidad ng mga batang mag-aaral lalo na ang face-to-face classes.

Ang bagong uri ng COVID-19 ay unang naitala sa United Kingdom at isinailalim ang bansa sa mas mahigpit na restriksiyon dahil ayon kay British Prime Minister Boris Johnson, "(It) Maybe up to 70% more transmissible than the original version of the disease."

Na-detect na rin ang bagong klase na ito sa Rome, Denmark, Netherlands, Australia at France.

Ayon naman kay P-Duterte, na-detect na rin ito sa Sabah, Malaysia na malapit sa Sulu.

Samantala, ipinag-utos na ang suspensiyon ng mga flights sa UK simula pa noong December 24 hanggang sa December 31.

Nuezca, tutuluyan — Sinas

ni Ronalyn Seminiano Reonico | December 24, 2020

Humingi ng tawad si Philippine National Police (PNP) Chief Gen. Debold Sinas sa pamilya ng mag-inang tinadtad ng baril at pinatay ng isang pulis sa Tarlac kamakailan.

Ayon kay Sinas, pumunta siya sa burol ng mag-inang Sonya Gregorio, 52, at Frank Anthony, 25, noong Martes upang makiramay sa kanilang mga naulila.

Aniya, “Una, pumunta po ako roon para makiramay po, at of course manghingi po ng sorry sa nangyari sa kanila.

“Pangalawa po ay [para] i-update po sila ng progress ng investigation at para malaman nila na ang PNP po, ako na lalo, ay hindi po kami nagto-tolerate sa ginawa ni Staff Sergeant Nuezca, and assured them of PNP support and security of their family. Nagbigay po kami sa kanila para maski papano maibsan po ang lungkot po nila.”

Mayroon na ring pulis na inatasan ang PNP para siguruhin ang kaligtasan ng pamilya Gregorio at kinausap din umano ni Sinas ang asawa ni Sonya na si Florentino Gregorio.

Pahayag ni Sinas, “In-assure namin sila na ang buong kapulisan ay nasa kanila po at tutulong po para sa kaso.”

Paglilinaw din ni Sinas, “Walang settlement or anything. We will not compromise. Tuloy po ang kaso. Tuloy po ang dismissal ni Staff Sergeant Nuezca.”

Ninja cops, mañanita cops, land grabber, illegal logger, berdugong pulis...

Kahihiyan ng mga pulis, tapusin na! - Binay

ni Ronalyn Seminiano Reonico | December 21, 2020

Pagsasailalim sa values re-orientation ng lahat ng miyembro ng Philippine National Police (PNP) ang naging panawagan ni Senator Nancy Binay matapos ang insidente ng pamamaril at pagpatay ng isang pulis sa mag-ina sa Tarlac noong Linggo.

Pahayag ni Binay, “Kailangan ng matinding across-the-board values re-orientation ang buong hanay ng PNP natin, dahil tila nakakalimutan na ng marami ang sagradong tungkulin nila na maglingkod at protektahan kahit 'yung pinakaabang Pilipino.

“May ninja cops, mañanita cops, ex-cop na land grabber at illegal logger, berdugong pulis—buong taon may nakakahiyang headline tungkol sa pulis. Ano na ba ang ginagawa ng liderato tungkol dito? The people expect the police to be their defenders, not their offenders."

Hindi rin pinalagpas ni Binay ang isyu ng paglabag sa batas ng may matataas na posisyon sa hanay ng kapulisan na na-promote pa katulad ni PNP Chief Debold Sinas na matatandaang sangkot sa "mañanita controversy" sa kabila nang mahigpit na pagpapatupad ng health protocols dahil sa COVID-19 pandemic.

Aniya, "Wala nang takot, dahil tila hindi naman na yata sila napaparusahan. Kadalasan napo-promote pa nga.”

Saad pa ni Binay, "Rather than being the people’s assurance of law and order, lately many of our cops are becoming the face of terror and impunity, blatantly disregarding the rule of law and spitting on our values. Tama na, sobra na, kailangang itigil na ang pang-aabuso.”