20 sugatan sa karambola ng mga sasakyan sa South Cotabato

ni Ronalyn Seminiano Reonico | March 12, 2021

Sugatan ang halos 20 katao sa karambola ng mga sasakyan sa Tupi, South Cotabato noong Huwebes.

Ayon kay Rolly Doane Aquino, South Cotabato Provincial Disaster Risk Reduction and Management Council officer, kaagad na isinugod sa ospital ang mga biktima.

Sa inisyal na ulat, nabangga ng isang pampasaherong jeep ang van-type truck sa highway dahil sa madulas na kalsada dahil sa pag-ulan at sa lakas ng pagbangga ay nadamay din ang isang motorsiklo at puting kotse.

Ligtas ang driver ng delivery truck at ang dalawang pahinante nito pati rin ang mga sakay ng kotse ngunit kabilang sa mga sugatan ang driver ng motor. Patuloy na nagsasagawa ng imbestigasyon ang Tupi PNP matapos tumakas ang driver ng jeep.

Ipinatigil sa ibang bansa… AstraZeneca COVID-19 vaccine, tuloy sa 'Pinas

ni Ronalyn Seminiano Reonico | March 12, 2021

Tuloy pa rin ang paggamit ng AstraZeneca COVID-19 vaccine sa Pilipinas, ayon sa Department of Health (DOH) at Food and Drug Administration (FDA) sa kabila ng pagsuspinde ng ilang bansa sa Europe matapos maiulat ang insidente ng pamumuo ng dugo o pagkakaroon ng blood clot.

Pahayag ng ahensiya, “At present, the DOH and FDA emphasize that there is no indication for the Philippines to stop rollout of AstraZeneca vaccines.

“The public is assured they will closely monitor all deployed vaccines.”

Nilinaw naman ng European Medicine Authority (EMA) na walang indikasyon na ang AstraZeneca COVID-19 vaccine ang dahilan ng pamumuo ng dugo ng mga nabakunahan at patuloy pa rin ang kanilang imbestigasyon.

May namatay sa pamumuo ng dugo…

Pagturok ng AstraZeneca vaccine, ipinatigil sa Thailand, Denmark, Norway at Iceland

ni Ronalyn Seminiano Reonico | March 12, 2021

Itinigil ang paggamit ng AstraZeneca COVID-19 vaccine sa Thailand, ayon sa health official matapos isuspinde ng ilang bansa sa Europe ang pagturok nito dahil sa naiulat na pagkakaroon ng “blood clot” o pamumuo ng dugo.

Pahayag ni Piyasakol Sakolsatayadorn, adviser ng COVID-19 vaccine committee ng naturang bansa, "Vaccine injection for Thais must be safe, we do not have to be in a hurry.

"Though the quality of AstraZeneca is good, some countries have asked for a delay. We will delay (as well)."

Kabilang sa mga bansang nagpatigil ng paggamit ng AstraZeneca ay ang Denmark, Norway at Iceland.

Inihinto rin ang paggamit nito sa Austria noong Linggo matapos mamatay ang isang nurse dahil sa umano'y "severe blood coagulation problems" ilang araw pagkatapos maturukan ng naturang bakuna.

Samantala, wala pang kasiguraduhan kung isa sa side effects ng nasabing bakuna ang pagkakaroon ng blood clots.

Saad naman ng virologist na si Yong Poovarawan, "We are waiting for Denmark and Austria to make a conclusion. We are delaying to let others prove (the side effects) of whether or not it is because of the vaccine or if it is only on that specific batch."