Turistang positibo sa bagong Covid, nakapasok sa Vietnam

ni Ronalyn Seminiano Reonico | January 2, 2021

Nakapagtala ang Vietnam ng unang kaso ng bagong variant ng COVID-19 mula sa United Kingdom, ayon sa health ministry ng naturang bansa.

Na-detect ang bagong variant ng COVID-19 sa babaeng 44-anyos na galing sa Britain. Sumailaim sa quarantine ang naturang pasyente at nakumpirmang positibo ito sa COVID-19 noong December 24.

Ayon din sa health ministry, "Researchers ran gene-sequencing on the patient's sample and found the strain is a variant known as ‘VOC 202012/01’".

Ayon sa mga siyentipiko, ang bagong variant ng COVID-19 ay pinaniniwalaang mas mabilis kumalat nang 40-70% kumpara sa orihinal na virus.

Samantala, tuloy pa rin ang repatriation flights ng Vietnam para makauwi ang kanilang mga kababayan mula sa UK.

P800 M utang ng PhilHealth sa Red Cross, sinisingil na ni Gordon

ni Ronalyn Seminiano Reonico | January 2, 2021

Umabot na sa P800 million ang utang ng Philippine Health Insurance Corp. (PhilHealth) sa Philippine Red Cross (PRC), ayon kay Senator Richard Gordon ngayong Sabado sa isang radio interview.

Aniya, “Ayaw ko sanang pinag-uusapan ‘yan pero nasa P800 million na naman. ‘Di puwede kasi kung kelan lang nila gustong magbayad dahil lalaki nang lalaki, baka mapilitan kaming itigil dahil bibili pa kami ng gamit tapos ime-maintain naman ang mga tao sa laboratoryo.”

Saad pa ni Gordon, “Siguro darating ‘yun sa Monday... nakikiusap [kami] sa kanila na mag-up-to-date sila dahil tutumba ang Red Cross dahil sa kanila.”

Matatandaang noong Oktubre, itinigil ng PRC ang pagsasagawa ng COVID-19 testing dahil sa utang ng PhilHealth na umabot sa mahigit P930 million. Itinuloy lamang ng PRC ang testing nang makabayad ang PhilHealth ng kalahati ng kanilang utang.

Pahayag ni Gordon, “Kailangang ‘wag tigilan ang pagte-testing dahil manghahawa ‘yan. Extraordinary diligence dapat ang gawin, bantayan nating maigi para ‘di na magkalat ‘yan.

“Ang nakakalungkot, dapat sila ang mag-a-advance, minsan lang nag-advance, ‘di na kami makatigil dahil marami ang dapat i-test at sa amin ipinadadala lahat. Kami ang nagte-test... OFW (overseas Filipino workers) okay lang naman sa akin basta ‘wag ilagay sa alanganin ang economic situation ng Red Cross.”

Una nang sinabi ng Malacañang na babayaran ng national government ang naturang utang ng PhilHealth.

Pahayag ni Presidential Spokesperson Harry Roque, “Magbabayad po ang national government. Napatunayan naman po ng national government na hindi po tumatalikod sa obligasyon ang national government.

“[K]inakailangan lang po i-verify. At kinakailangan po ‘yan sang-ayon pa rin doon sa three-tiered payment scheme ng PhilHealth.”

Samantala, diin ni Gordon, dapat magbayad ng utang ang PhilHealth.

Aniya, “Dapat lang dahil ang utang dapat binabayaran. ‘Pag um-order ka, magbayad ka, mahihirapan ang nagbibigay ng serbisyo.

“Unang-una, dapat ang gobyerno ang nanguna sa testing, eh, kami nasa 1.5 million na ang tine-test namin… natutuwa ako nakakapagserbisyo kami pero ‘di namin kaya na malaki ang utang.”

Mga balik-Manila pagkatapos mag-out of town, i-swab test — Mayor Isko

ni Ronalyn Seminiano Reonico | January 2, 2021

Kailangang sumailalim sa COVID-19 testing ang mga residente ng Manila na babalik sa kani-kanyang tahanan matapos ang holiday break, ayon sa Manila Health Department.

Sa inilabas na memorandum noong December 29 para sa mga opisyales ng barangay, ayon sa Manila Barangay Bureau, kailangang dumiretso sa mga testing facilities sa kanilang distrito ang mga residente ng Manila bago makauwi sa kani-kanyang bahay at epektibo ang naturang polisiya simula ngayong araw, January 2, upang maiwasan ang lalong pagdami ng kaso ng COVID-19.

Ang lahat ng mga sasailalim sa COVID-19 testing ay kailangang manatili sa quarantine facility ng isa o dalawang araw para sa kanilang resulta.

Maaari namang makapagpa-test ang mga residente ng Manila sa mga sumusunod na quarantine facilities:

• District 1 – T. Paez Quarantine Facility (09618977816.09286731715)

• District 2 – Patricia Sports Complex Quarantine Facility (09179609112)

• District 3 – Arellano Quarantine Facility (09184044627)

• District 4 – Dapitan Sports Complex Quarantine Facility (09516729122)

• District 5 – San Andres Sports Complex Quarantine Facility (09178031925)

• District 6 – Bacood Quarantine Facility (09461430364/09086877105)

Ang mga positibo sa COVID ay dadalhin sa quarantine facilities para sa mga pasyente at ang mga negatibo ay bibigyan ng medical certificate kasama ang kanilang test result na ipapakita sa kanilang barangay.

Paglilinaw naman ni Dr. Arnold Pangan, acting City Health Officer, “If returnee will come from within Metro Manila: Returnees may volunteer to get tested, Manila Health Department will accommodate them.

“If returnee will come from outside Metro Manila: Returnees are required to undergo swab testing.”

Ayon naman kay Manila City Public Information Office Chief Julius Leonen, ang testing cost ay sasagutin ng local government.

Aniya, “Case-to-case basis naman po, if isang araw lang or overnight, and resident naman po talaga siya ng Manila City, then no need na [magpa-swab], unless magpa-voluntary swab test siya. Dr. Pangan said they will accommodate them.”

Samantala, ayon kay Manila Mayor Isko Moreno, nakipag-ugnayan na ang kanilang city government sa Pfizer Inc. ng United States at Moderna Inc. para sa COVID-19 vaccines.

Gumawa rin ang Manila government ng website para makapag-pre-register ang mga residente para sa COVID-19 vaccination.