Ex-Rep. Reynaldo Umali, pumanaw na sa edad 63

ni Ronalyn Seminiano Reonico | January 7, 2021

Pumanaw na sa edad 63 si former Oriental Mindoro Representative Reynaldo Umali ngayong Huwebes dahil sa cardiac arrest, ayon sa kanyang kapatid na si Rep. Alfonso Umali ng Oriental Mindoro.

Sa radio interview, ayon kay Rep. Alfonso, na-diagnose sa COVID-19 at Stage 3 liver cancer ang dating abogado noong December 2020. Aniya pa ay umabot sa Stage 4 ang cancer nito.

Nagsilbi bilang representative ng second district ng Oriental Mindoro si Umali noong 15th, 16th at 17th Congress, simula 2010 hanggang 2019.

Noong 17th Congress, naging chair ng House Committee on Justice si Umali at nanguna sa impeachment proceedings laban kay dating Chief Justice Maria Lourdes Sereno.

Habang isinusulat ito, wala pang inilalabas na ibang detalye ang pamilya kaugnay ng pagkamatay niya.

1 patay sa rally sa US Capitol

ni Ronalyn Seminiano Reonico | January 7, 2021

Patay ang isang babae na kabilang sa mga supporters ni US President Donald Trump matapos mauwi sa engkuwentro laban sa pulis ang isinagawang kilos-protesta sa US Capitol noong Miyerkules.

Sa inisyal na ulat, nabaril umano ng Capitol police ang hindi pa nakikilalang babae dahil napilitang gumamit ng dahas ang pulisya nang sirain ng mga raliyista ang barikada ng kapitolyo bilang protesta sa pagkapanalo ni President-elect Joe Biden.

Samantala, nagsasagawa na rin ng imbestigasyon ang awtoridad kaugnay ng insidente.

Twitter account ni Trump, ini-lock dahil sa 3 tweets

ni Ronalyn Seminiano Reonico | January 7, 2021

Ni-lock ng Twitter ang account ni United States President Donald Trump at pinagbantaan din ng permanenteng pagkaka-ban dahil umano sa mga naging tweets nito na lumalabag sa “Civic Integrity policy.”

Ayon sa Twitter Safety, mananatiling naka-lock ang account ni Trump sa loob ng 12 oras.

Pahayag ng Twitter Safety, "As a result of the unprecedented and ongoing violent situation in Washington, DC, we have required the removal of three @realDonaldTrump tweets that were posted earlier today for repeated and severe violations of our Civic Integrity policy.

“This means that the account of @realDonaldTrump will be locked for 12 hours following the removal of these tweets. If the tweets are not removed, the account will remain locked.

“Future violations of the Twitter Rules, including our Civic Integrity or Violent Threats policies, will result in permanent suspension of the @realDonaldTrump account.”