Ina at 4-month-old na baby, nagpositibo sa COVID-19

ni Ronalyn Seminiano Reonico | February 23, 2021

Nagpositibo sa COVID-19 ang isang ina at 4-month-old nitong baby sa Pasay City kaya lalong pinaigting ng lokal na pamahalaan ang health protocols.

Pahayag ni Pasay Mayor Emi Calixto-Rubiano, “Doblehin po natin ang pag-iingat sapagkat wala po talagang sinasanto ang sakit na ito at hindi namimili kung bata o matanda ang magiging biktima.”

Ayon sa nurse ng City Disaster Risk Reduction and Management Office na si Mark Anthony Castillo, inilipat na ang mag-ina sa Mall of Asia Quarantine Facility.

Samantala, noong Sabado, matatandaang isinailalim sa enhanced community quarantine (ECQ) ang 33 barangay at isang establisimyento sa Pasay City dahil sa paglobo ng kaso ng COVID-19.

Noong Lunes ay mayroon nang 395 active COVID-19 cases sa naturang lugar.

14 guro nagka-COVID, Bohol high school ini-lockdown

ni Ronalyn Seminiano Reonico | February 23, 2021

Isinailalim sa lockdown ang isang eskuwelahan sa Tagbilaran City, Bohol matapos magpositibo sa COVID-19 ang 14 guro.

Itinuturing na “most populated school” sa Bohol ang Dr. Cecilio Putong National High School (DCPNHS), at 14 araw itong ila-lockdown simula noong February 18.

Ayon sa school principal na si Maurine Castaño, 10 sa mga guro ang mula sa Tagbilaran City, kabilang na ang unang nagpositibo sa COVID-19 at ang iba pa ay mula sa iba’t ibang lugar sa Bohol.

Isa sa mga nagpositibo ay naka-admit sa ospital at ang 13 ay nasa quarantine facilities.

Ayon kay Castaño, ang unang guro na nagpositibo ay nakitaan ng sintomas ng COVID noong February 6 at nagpunta pa rin sa eskuwelahan noong Pebrero 8 at 9.

Ang 13 iba pang guro ay nakasalamuha ng unang nagpositibo sa loob ng airconditioned Grade 7 faculty room habang nagdi-distribute ng learning modules.

Pansamantalang itinigil ang pamamahagi ng modules at nanawagan si Castaño ng kooperasyon mula sa mga magulang ng mga estudyante.

Aniya, “The modules can wait. We have to ensure everyone’s safety first. We have to remember that life, once lost, cannot be recovered.”

Samantala, nagsagawa na ng disinfection ang City Disaster Risk Reduction Management Office (CDRRMO) sa naturang paaralan at muli itong bubuksan kapag nabigyan na ng clearance mula sa Inter-Agency Task Force (IATF).

Walang bakuna, walang face-to-face classes – P-Du30

ni Ronalyn Seminiano Reonico | February 22, 2021

Hindi inaprubahan ni Pangulong Rodrigo Duterte ang pagsasagawa ng face-to-face classes sa bansa hangggang wala pang bakuna, ayon kay Presidential Spokesperson Harry Roque.

Saad ni Roque, “Nagdesisyon na po ang Presidente, wala pa rin po tayong face-to-face classes sa bansa.

“Tumawag po ang Presidente kagabi sa akin at sabi niya, ayaw po niyang malagay sa panganib ang buhay ng ating mga mag-aaral at mga guro habang wala pa pong nababakunahan sa bansa.”

Gayunpaman, umaasa rin umano ang pangulo na makapagsasagawa na ng face-to-face classes sa mga low-risk na lugar sa Agosto.

Aniya, “Sabi niya, may awa naman po ang Panginoon, baka naman po pagkatapos natin malunsad ang ating vaccination program, eh, pupuwede na tayong mag-face-to-face sa Agosto lalung-lalo na sa lugar na mababa ang COVID cases.”