Ibinulgar ang away nila… VICE, NIRESBAKAN NI ANNE SA SOCMED

ni Rohn Romulo - @Run Wild | October 26, 2022

Pinatulan at hindi talaga pinalampas ni Anne Curtis ang nakakaaliw na litanya ni Phenomenal Unkabogable Star Vice Ganda noong Lunes sa kanyang Twitter account, kung saan sinagot nito ang paratang ng isang netizen na siguro raw ay nag-aaway ang mga It's Showtime hosts kaya dalawang linggo nang wala sa noontime show ang komedyante.

Isa nga sa mga naging pasabog na post ni Vice na kinaaliwan ng mga netizens ang nakatutuwang pag-amin niya ng, “TOTOONG MAGKAAWAY KAMI NI ANNE. Matagal na 'tong alitan na 'to na 'di naayos. It’s been 13 yrs. na 'di ma-resolve ang issue kung sino sa 'min ang chaka.

"And last week nga ay umabot na sa sampalan. Nalunok niya ang kamay ko at till now, 'di ko pa nababawi. I hate Anne for life!”

Nauna nang nilinaw ni Vice na naging abala siya sa shooting ng upcoming Metro Manila Film Festival (MMFF) entry niya kasama si Ivana Alawi, ang Partners in Crime.

Kaya marami ang naaliw sa pagpatol at pagresbak ni Anne, “Ikaw talaga. Sa edad mong 57, ulyanin na, ha? Hindi kamay nalunok ko, paa. Paa na may bakal. Pero ok lang 'yun, sez!

May 3 ka pa namang natitira.”

Mukhang pasok na pasok nga ito sa mga netizens dahil nakakaaliw talaga ang mga kalokohan nina Vice at Anne, na palaging nag-aaway sa kanilang social media accounts.

In na in nga ito ngayon dahil ilang araw na ring trending ang salpukan ng mga vloggers dahil sa mga rebelasyon nina Wilbert Tolentino at Zeinab Harake, kung saan marami talagang nadamay at napuyat noong Linggo nang gabi.

May silbi raw ang pagpapa-sexy… KYLIE, PHILIPPINE'S ACTRESS OF THE YEAR AWARDEE SA DIAFA AWARDS

ni Rohn Romulo - @Run Wild | October 22, 2022

Winner ang former Miss International na si Kylie Verzosa dahil siya lang naman ang tatanggap ng Philippine's Actress of the Year award sa DIAFA Awards in Dubai.

Dahil ito sa kakaiba at mahusay niyang pagganap sa Philippine adaptation ng 2010 South Korean hit thriller na The Housemaid.

Inaasahan na dadalo si Kylie sa kanilang award ceremony at rarampa sa kanilang red carpet sa Nobyembre 4 sa Dubai Creek Harbour Marina, United Arab Emirates.

Sabi sa announcement ng naturang award-giving body, “Announcing one of this year’s honorees, Actress and beauty queen Kylie Verzosa will grace the DIAFA Red Carpet and Awards Ceremony and receive her #DIAFA Award for her outstanding role in #TheHousemaid live November 04 from Dubai.”

Ang Vivamax nga ang nag-produce ng Philippine adaptation ng acclaimed South Korean film na idinirek ni Roman Perez, Jr. na ipinalabas noong 2021. Kasama sa movie sina Albert Martinez, Jaclyn Jose, Louise delos Reyes at Alma Moreno.

Of course, tuwang-tuwa si Kylie dahil hindi nasayang ang pagpapa-sexy niya sa pelikula dahil na-prove niya na marunong siyang umarte.

Actually, sa mga nagawa niya sa Vivamax, pansin talaga na lumilitaw ang pagiging aktres niya, na ayon sa mga interviews niya, 'yun talaga ang goal niya, kahit kailangan niyang magpa-sexy.

Gusto rin namin ang My Husband, My Lover na idinirek ni Mac Alejandre kung saan nagtagisan sila ni Cindy Miranda na isa pang beauty queen na sumabak din sa pagpapa-sexy tulad niya.

For sure, kung sila pa ni Jake Cuenca, proud na proud din ito sa latest achievement ni Kylie, dahil isa nga ang actor sa mga nag-push sa pagsabak ni Kylie sa pag-aartista.

Congrats, Kylie!

INIHIRIT NI ARJO: QC, GAWING FILM AND TV ARTS CAPITAL OF THE PHILIPPINES

ni Rohn Romulo - @Run Wild | October 21, 2022

Naging matagumpay ang pagdalo ng award-winning actor at Quezon City District 1 representative na si Arjo Atayde sa international premiere ng six-part drama series ng ABS-CBN na Cattleya Killer sa MIPCOM Cannes, France.

Ang premiere screening ay ginanap noong Miyerkules, Oktubre 19, sa Palais Auditorium na pinangunahan ng Asian Academy Creative Awards 2020 Best Actor, kasama ang co-star na kapatid na aktres at producer din na si Ria Atayde, ina at premyadong aktres na si Sylvia Sanchez, at negosyanteng ama na si Art Atayde.

Sila nga ang nasa likod ng Nathan Studios Inc. na kasosyo sa drama series. Nagsimula na nga silang mag-produce ng shows (Becoming Ice), series at films.

Ang MIPCOM (Marché International des Programs de Communication), o ang International Market of Communications Programs, ay isang taunang trade show na ginaganap sa movie capital ng France na tumatakbo sa loob ng apat na araw sa Oktubre.

Ang Cattleya Killer ang unang mainstream starring role ni Atayde mula nang manalo bilang congressman sa unang distrito ng Quezon City sa pamamagitan ng landslide victory last May 2022 elections.

Si Cong. Atayde ay nakapag-propose na ng mahigit 41 na panukalang batas, kabilang ang House Bill 457, na naglalayong ideklara ang Quezon City bilang Film and TV Arts Capital of the Philippines.

Samantalang ang HB 459 ay tungkol sa occupational safety para sa mga artista at manggagawa sa sektor ng pelikula at telebisyon.

Bilang vice-chairman ng Creative Industry and Performing Arts Committee ng 19th Congress, kabilang sa mga responsibilidad ni Arjo ang pag-promote ng mga pelikulang Pinoy at serye sa pandaigdigang komunidad.

At sa unang pagpapalabas ng Cattleya Killer sa Cannes ay opisyal na minarkahan ang unang pagkakataon na ang isang seryeng Filipino ay ipapakita sa mga gumagawa ng desisyon sa industriya sa pag-aasam na makakuha ng kasosyo para sa global distribution.

Mula ito sa mabusising direksiyon ni Dan Villegas, kasama rin sa serye sina Jake Cuenca, Christopher de Leon, Jane Oineza, Ricky Davao at Zsa Zsa Padilla.

Proud na proud naman si Sylvia (na inirampa ang mga creations ni Frankie de Leon) sa latest achievement na ito ng kanyang mga anak na sina Arjo at Ria (na maraming pumupuri sa kanyang litaw na litaw na kagandahan), na for sure, mapapansin sa pag-uusapang serye.

Good luck sa Cattleya Killer at sa Nathan Studios!