Sinovac, pinagdudahan... P-Duterte, niresbakan si Leni

ni Lolet Abania | March 9, 2021

Galit na tinugon ni Pangulong Rodrigo Duterte si Bise-Presidente Leni Robredo dahil sa mga pahayag nito na nagdulot pa ng pagdududa sa publiko tungkol sa Sinovac vaccine na gawa ng China.

"Imbes na magtulong to convince the people, here she comes and making it appear that government has failed in its mandate of securing... Ma'am, hindi ako napikon. Hindi ako mapikon kay (dahil) hindi ko sarili ito," ani Pangulong Duterte sa kanyang weekly Talk To The People briefing para sa COVID-19.

Ayon sa Pangulo, ang mga inilabas na pahayag ni Robredo ay isang lamang "half-truth", kung saan sinabi nitong ang Sinovac vaccine ay nangangailangan ng rekomendasyon mula sa health technology assessment council (HTAC).

Ipinaliwanag naman ni Department of Health (DOH) Secretary Francisco Duque III na hindi na kailangan ng Sinovac vaccine ng pag-apruba ng HTAC dahil ito ay isang donasyon at hindi isang investment.

"Hindi ho kailangan ng recommendation, kasi nakalagay dito [sa Universal Health Care Law] investment, wala naman tayong in-invest, donated 'yun eh. So, EUA [emergency use authorization] lang po ang kinailangan," sabi ni Duque.

Nakasaad sa Section 34 ng Universal Health Care Act, "investments on any health technology or development of any benefit package by the DOH and PhilHealth shall be based on the positive recommendations of the HTA."

Nagbigay ng donasyon ang China ng 600,000 doses ng Sinovac vaccine ng CoronaVac, na dumating sa bansa noong Pebrero 28. Ito ang unang legal na batch ng mga bakuna sa bansa at sinimulan ang vaccinations sa mga ospital sa National Capital Region noong Marso 1.

"Imbes na makatulong ang Vice President, she created confusion, thereby creating doubts and uncertainty in the minds of the people," ani P-Duterte. "'Yan ang ginalitan ko because we are running against time," dagdag ng Pangulo.

Mga bansang nag-donate sa COVAX, pinasalamatan ni P-Duterte

ni Mary Gutierrez Almirañez | March 5, 2021

Pinasalamatan ni Pangulong Rodrigo Duterte sa kanyang talumpati ang mga bansang nag-donate ng AstraZeneca COVID-19 vaccines sa COVAX facility upang maging matagumpay ang pagdating ng bakuna sa ‘Pinas kagabi, Marso 4.

Kabilang sa mga bansang binanggit niya ay ang Norway, France, Italy, Spain, The Netherlands, Sweden, Denmark, Belgium, Austria, Greece at Australia. Iginiit din ni Pangulong Duterte na ang hindi nila pagkalimot sa mga mahihirap na bansa katulad ng Pilipinas ay maituturing na “plus for humanity”.

Lumapag sa Ninoy Aquino International Airport (NAIA) ang KLM flight mula sa Belgium na naghatid ng 487,200 doses ng AstraZeneca at inaasahang makakatanggap ang bansa ng mahigit 5.5 million hanggang 9.2 million doses nito mula sa COVAX facility ngayong taon.

Ayon naman kay Vaccine Czar Carlito Galvez Jr., unang makakatanggap ng AstraZeneca COVID-19 vaccines ang UP-Philippine General Hospital (UP-PGH) at iba pang referral hospitals na naunang pinadalhan ng bakunang Sinovac.

P-Duterte, may National ID na

ni Mary Gutierrez Almirañez | March 4, 2021

Natanggap na ni Pangulong Rodrigo Duterte ang kanyang National ID na iniabot ni National Economic and Development Authority (NEDA) Acting Secretary Karl Kendrick Chua sa Palasyo ng Malakanyang kahapon, Marso 3.

Matatandaang isinabatas ni Pangulong Duterte ang National ID System noong August, 2018 kung saan isang government ID na lamang ang puwedeng gamitin sa pakikipagtransaksiyon. Layunin din nito na pagbutihin ang pamamahala sa gobyerno, bawasan ang katiwalian, wakasan ang red tape at itaguyod ang madaling paggawa ng negosyo at iba pa.

Ayon kay Presidential Spokesperson Harry Roque, "P3.52-billion additional budget for 2021 to register 20 million more individuals to the Philippine Identification System."

Dagdag pa niya, mahigit 50 milyon indibidwal ang kabuuang target ng Philippine Statistics Authority (PSA) na maiparehistro sa bagong ID system ng bansa.

Inatasan ng pamahalaan ang Philippine Statistics Authority (PSA) na pamunuan ang Philippine Identification System (PhilSys) at suportado naman ito ng National Economic and Development Authority (NEDA). Sa ngayon ay patuloy pa rin ang registration para sa National ID kung saan umabot na sa 20,133,869 indibidwal ang nakapagparehistro nationwide.