WPS, bawal nang pag-usapan — Duterte

ni Ronalyn Seminiano Reonico | May 18, 2021

Pinagbawalan ni Pangulong Rodrigo Duterte ang mga opisyal ng bansa na maglabas ng sariling pananaw tungkol sa sigalot sa West Philippine Sea (WPS) sa pagitan ng Pilipinas at China.

Pahayag ni P-Duterte, "So, this is my order now to the Cabinet and to all - all and sundry... talking for the government to refrain discussing West Philippine Sea with...anybody.

"If we have to talk, we talk and it would just be among us and there is one spokesman - (Presidential Spokesman) Secretary Harry (Roque) will do it. Now you get the picture."

Sa naganap naman na press briefing ni Roque, kinumpirma niya na tanging sila lamang ni Department of Foreign Affairs (DFA) Secretary Teodoro Locsin Jr. ang maaaring maglabas ng pahayag tungkol sa isyu sa WPS.

Aniya, "That’s the decision of the president... And as I said, it’s covered by traditional exception to freedom of information."

Madalas maglabas ng updates ang National Task Force (NTF) WPS tungkol sa presensiya ng mga barko ng China, kabilang na ang mga militia vessels sa WPS.

Nang matanong si Roque tungkol sa pag-a-update ng NTF-WPS, aniya, “Well, you know, reports of the NTF are forwarded to the DFA and they would determine if they will file diplomatic protest. So, these are matters, facts, which are relevant to diplomatic communications covered by executive privilege.

"So, although there is transparency, an exception to transparency are diplomatic communications and that includes also inputs which form the basis of diplomatic communication.”

Samantala, nilinaw naman ni P-Duterte na mananatili pa rin ang pagpapatrolya ng awtoridad sa WPS.

Aniya pa, “Our agencies have been directed to do what they must and should to protect and defend our nation’s interest.

“We will not waver in our position.”

Ayaw magpabakuna, 'wag lumabas – P-Du30

ni Lolet Abania | May 18, 2021

Nagbigay ng pahayag si Pangulong Rodrigo Duterte sa mga mamamayan na sakaling tumanggi na magpabakuna kontra-COVID-19, ayon sa kanya, dapat ay mag-“stay home” o manatili sa kanilang tahanan sa dahilang nahihirapan ang mga awtoridad na kumbinsihin ang publiko na magtiwala sa pagpapabakuna.

Sa kanyang taped speech ngayong Martes, sinabi ni Pangulong Duterte na ang nabubuong pangamba ng marami sa epekto ng vaccines ay ‘walang basehan’ dahil wala pa aniyang namatay sa COVID-19 vaccines.

"Maniwala kayo sa gobyerno, maniwala kayo sa mga tao na inilagay n'yo d'yan sa opisina nila... Maniwala kayo, Diyos ko po kasi kung hindi, hindi kayo makatulong," ani P-Duterte.

"We cannot force you. But then, sana, kung ayaw n'yong magpabakuna, huwag na kayong lumabas ng bahay para hindi kayo manghawa ng ibang tao," dagdag ng Pangulo.

Iginiit din ng Pangulo na kapag hindi pa nabakunahan, madali itong mahahawahan ng COVID-19.

"Maghawahan talaga 'yan,” ani P-Duterte.

Ayon kay P-Duterte, dapat na sundin ng publiko ang payo ng mga doktor na magpabakuna na laban sa coronavirus, lalo na ngayong dumarami ang mga new variants ng COVID-19, kaysa umabot pa sa puntong infected na ng nasabing virus at hindi na talaga makahinga.

"'Pag hindi ka na makahinga, dalhin ka sa ospital, walang makalapit sa pasyente, doktor lang, nakabalot pa to avoid being infected,” ayon sa Pangulo.

"'Pag namatay kayo, diretso kayo sa morgue. 'Di mo mahalikan, ma-realize mo ang sakit. You will not be able to kiss your loved ones goodbye)," dagdag pa niya.

Samantala, ayon sa ginawang survey ng OCTA Research Group, isa lamang sa apat na residente ng Manila ang pumapayag na magpaturok ng COVID-19 vaccines, habang sa hiwalay na survey naman ng Pulse Asia, 6 sa 10 Pilipino ay hesitant o alanganin na magpabakuna ng COVID-19 vaccines.

Subalit para magkaroon ng herd immunity, kailangan na 70 porsiyento ng populasyon ng bansa ang mabakunahan. Ito rin ang tinatawag na indirect protection mula sa nakahahawang sakit, dahil kapag ang populasyon ay na-immune sa pamamagitan ng vaccination, madali nang malalabanan ang naturang impeksiyon, ayon sa World Health Organization.

Pangulo naghamon, umatras dahil wa' 'wenta raw… Spox Roque: P-DU30, mapapahamak sa debate kay Carpio

ni Ronalyn Seminiano Reonico | May 7, 2021

Umatras si Pangulong Rodrigo Duterte sa debate laban kay dating Supreme Court Justice Antonio Carpio tungkol sa isyu sa West Philippine Sea (WPS) dahil sa payo ng mga gabinete, ayon sa Malacañang ngayong Biyernes.

Sa public address ni P-Duterte noong Miyerkules, aniya ay sangkot si Carpio sa pagpapaalis ng barko ng Pilipinas sa standoff sa mga barko ng China sa Scarborough Shoal noong 2012.

Nangako rin ang pangulo na magbibitiw siya sa puwesto kung mapapatunayan na mali ang kanyang pahayag kasabay ng paghahamon ng debate kay Carpio.

Pinabulaanan naman ni Carpio ang mga sinabi ni P-Duterte at aniya ay dapat na itong magbitiw sa puwesto sa lalong madaling panahon “to keep his word of honor.”

Pahayag naman ni Presidential Spokesperson Harry Roque, “Alam ko po lahat kayo ay naghihintay kung ano ang mangyayari sa debate sa panig po ng presidente at ni retired Justice Antonio Carpio. “Totoo po, hinamon po ni Presidente si Justice Carpio sa debate pero ang pagdedebate po ay dalawang bagay. Sino ba ho ang responsable sa pagkawala ng Scarborough Shoal? Eh, ‘yung detalye po na sinabi ni Antonio Carpio sa kanyang gustong maging debate, eh, kung kabahagi raw po si retired Justice Carpio sa pagkawala ng Scarborough Shoal.

"Hindi naman po ‘yun ang subject matter ng debate. Ang subject matter po ng debate ay sino at ano’ng administrasyon ang naging dahilan kung kailan nawala po sa Pilipinas ang possession sa Scarborough Shoal at kung gusto ninyo, tanungin na rin natin, sino at ano’ng administrasyon nawala sa atin ang Mischief Reef.”

Saad pa ni Roque, “Handang-handa po sana ang presidente na dumebate pero kagabi po, eh, tinanggap po niya ang advise ng ilang mga miyembro ng gabinete kasama na po si Executive Secretary (Salvador) Medialdea. Ang sabi po ng ating mga gabinete, at sinusundan po ito ng dalawang senador… si Senate President Sotto at si Senator Pimentel na unang-una, wala pong mabuting magiging resulta itong debateng ito para sa sambayanang Pilipino.”

Ang pangalawang rason ay hindi umano tabla at hindi patas na ang isang pangulo ay makikipagdebate sa ordinaryong mambabatas.

Saad pa ni Roque, “Nanindigan po ang mga miyembro ng gabinete na bakit papayag sa debate, eh, nakaupong presidente naman si President Duterte at si Antonio Carpio po, bagama't siya’y dating mahistrado ay ordinaryong abogado na ngayon. Parang hindi naman po yata tabla na ang Office of the President, ang presidente mismo ay haharap sa isang ordinaryong mambabatas. Parang hindi po patas.”

Mahirap din umanong mag-participate sa debate ang isang pangulo dahil makaaapekto umano sa polisiya ng gobyerno ang mga posibleng sabihin ni P-Duterte.

Saad pa ni Roque, “Sinabihan po ang presidente ng ating mga miyembro ng gabinete na napakahirap po na mag-participate ang presidente sa ganyang debate. Bakit po? Kasi nakaupo pa siyang presidente. Ibig sabihin, lahat po ng masasabi ng presidente sa debateng iyon ay makakaapekto po sa mga polisiya ng gobyerno. Hindi na po mababawi ang pupuwedeng sabihin ng presidente sa debateng iyon bukod pa sa katotohanan na… kaya nga po tayo may tinatawag na executive privilege ‘no, ‘yung mga bagay-bagay na hindi dapat isapubliko para makagawa ng mga tamang desisyon bagama’t hindi pa po nagdedesisyon ang isang presidente.

"Mako-compromise po ang mga bagay-bagay na ito, ang mga impormasyon na ito kung papayag po at ituloy ng presidente ang pagdebate kay dating Supreme Court Justice Antonio Carpio.”

Bagama’t umatras sa debate si P-Duterte, ayon kay Roque, siya ang itinalaga bilang maging kapalit nito.

Saad ni Roque, “Tuloy po ang debate. Eh, ang sabi po ni Presidente, kung papayag si Antonio Carpio, tuloy po ang debate dahil importante naman na marinig ‘yung mga ideas para ang taumbayan ang makagawa ng konklusyon.

“Ang sabi po ng presidente, itinatalaga niya po ang inyong abang lingkod na makipagdebate kay retired Justice Antonio Carpio at tinanggap ko naman po ang pagtatalaga ni Presidente.”

Handa namang magsilbing host ng debate ang Philippine Bar Association (PBA) at saad ni Roque, sabihin lang umano ng organisasyon kung kailan at saan at sisipot siya.

Aniya pa, “Pero ang pagdedebatehan po, malinaw. Unang-una, sino ang responsable sa pagkawala ng teritoryo ng Pilipinas — si President Duterte o ang ibang administrasyon?

“Pangalawa, tama ba ang sinasabi ni Antonio Carpio na binalewala ni Presidente ang panalo natin doon sa Hague tribunal at kung gusto niya, pangatlo ay tama ba po na namimigay ng teritoryo ang Presidente Duterte?”

Mensahe rin niya kay Carpio, “Retired Supreme Court Justice Antonio Carpio, it would be a pleasure to debate against you. I’ll see you at the designated time and place.”