Mga ayaw magpabakuna, ibalik sa loob ng bahay 'pag lumabas — P-Du30

Larawan

ni Ronalyn Seminiano Reonico | July 29, 2021

Inatasan ni Pangulong Rodrigo Duterte ang awtoridad na siguraduhing mapapanatili sa loob ng bahay ang mga indibidwal na hindi pa bakunado laban sa COVID-19 dahil sa banta ng COVID-19 Delta variant.

Saad ni P-Duterte, "Itong mga ayaw magpabakuna, sinasabi ko sa inyo, 'wag kayong lumabas ng bahay. Kasi 'pag lumabas kayo ng bahay, sabihin ko sa mga pulis na ibalik kayo sa bahay n'yo. You'll be escorted back to your house because you are a walking spreader."

Aniya pa, "Kaya kung ayaw ninyong makatulong by having the vaccines, 'wag na lang kayong lumabas ng bahay. "Ayaw mong magpabakuna tapos, eh, sabihin ko ako na mismo ang sasagot niyan, kung may idemanda, ako na. 'Yan ang utos ko, ibalik ka roon sa bahay mo. 'Yan ang utos ni Mayor. Kung magdemanda ka balang-araw, idemanda mo siya. Harapin ko 'yan. I assume full responsibility for that."

Aniya, trabaho ng mga barangay kapitan ang alamin kung sinu-sino ang mga residenteng nasasakupan nila na hindi pa bakunado at dapat din umanong siguraduhin nilang hindi makakalabas ng bahay ang mga unvaccinated.

Samantala, inatasan din ng pangulo ang mga local government units na ibigay na lang ang bakunang nakalaan para sa mga indibidwal na ayaw namang magpaturok sa mga nais mabakunahan. Saad pa ni P-Duterte, "'Yung ayaw, 'wag nang hintayin."

Gumewang sa SONA habang naglalakad P-Duterte, nadulas lang, walang sakit – Roque

ni Lolet Abania | July 27, 2021

Tiniyak ng Malacañang na walang dapat ikabahala ang publiko sa kalusugan ni Pangulong Rodrigo Duterte matapos maiulat na nawalan ito ng balanse nang naglalakad na papasok ng podium kahapon para ibigay ang kanyang ikaanim at huling State of the Nation Address (SONA).

“I don’t think it’s anything to worry about kung ang iniisip ng taumbayan ay ang kanyang kalusugan,” ani Presidential Spokesperson Harry Roque sa isang interview ngayong Martes. “Parang nadulas lang siya kahapon,” dagdag ng kalihim.

Ayon kay Roque, ang 76-anyos na si Pangulong Duterte sa kabila ng pagiging isang senior citizen ay wala namang “ekstraordinaryong problema.” “Alam n’yo, wala naman po siyang extraordinary na problema. He is who he is, he is a senior citizen, at mukhang nadulas lang naman siya kahapon,” sabi ni Roque.

Samantala, isa sa mga nabanggit ni Pangulong Duterte sa kanyang 3-oras na SONA kahapon ay hindi na niya kayang i-pronounce nang tama ang mga salita sa inihandang speech at nagbirong baka tinamaan ng COVID-19.

Tinanong din ng Punong Ehekutibo kung mayroong ambulansiya na nakaantabay sa kanya. Marami sa mga nasa loob mismo ng plenary sa Batasang Pambansa Session Hall ay natawa sa naging pahayag ng pangulo. Gayunman, nakumpleto na ang two-dose ng COVID-19 vaccines at fully vaccinated na si Pangulong Duterte noon pang Hulyo 12.

Sara-P-Du30, No. 1 sa survey sa pagka-pangulo at VP sa 2022

ni Lolet Abania | July 13, 2021

Parehong nanguna sina Davao City Mayor Sara Duterte-Carpio at Pangulong Rodrigo Duterte sa pinakabagong survey ng Pulse Asia na posibleng pumasok sa pagka-pangulo at pagka-bise-presidente sa eleksiyon sa 2022.

Sa isinagawang survey ng Pulse Asia noong Hunyo 7 hanggang Hunyo 16, lumabas na nakakuha ng 28% na suporta si Mayor Sara mula sa 2,400 matatandang Pinoy na tinanong sa nais nilang susunod na lider ng bansa.

Kasunod si Manila Mayor Francisco “Isko Moreno” Domagoso na may 14%, dating Senador Ferdinand “Bongbong” Marcos, Jr. na may 13%, at Senador Grace Poe na may 10% suporta.

Nakabilang din sa listahan sina Senador Manny Pacquiao na may 8%, Vice-President Maria Leonor “Leni” Robredo na may 6%, at Senador Panfilo Lacson, 4% suporta.

Pasok din sa listahan sina Senador Bong Go na may 3%, dating Vice-President Jejomar “Jojo” Binay, dating Speaker Alan Peter Cayetano at dating Sen. Antonio Trillanes IV, na nakakuha ng tig-2% suporta.

Mababa naman sa 1% ang nakuha nina Sen. Richard Gordon, dating Associate Justice Antonio Carpio, dating House Speaker Pantaleon Alvarez, at dating Defense Secretary Gibo Teodoro. Para sa Second Choice Presidential Preference ng survey, nanguna pa rin si Mayor Sara na sinundan nina Poe, Marcos, Pacquiao at Go, sa top five.

Sa mga posibleng tumakbong bise-presidente, nanguna sa listahan si Pangulong Duterte na may 18% na puntos. Sumunod sina Mayor Isko na may 14%, Senate President Vicente Sotto III na may 10%, dating Sen. Marcos na may 10%, Sen. Pacquiao na may 9%, dating Speaker Cayetano na may 8%, at Sorsogon Governor Francis Escudero na may 7% puntos.

Pasok din sa listahan sina Senador Bong Go na may 5%, ang host ng ‘Wowowin’ na si Willie Revillame na may 4% at Senador Sonny Angara na may 3% suporta. Kapwa nakakuha naman ng tig-2% sina Trillanes at Public Works Secretary Mark Villar at 1% si Teodoro. Mababa naman sa 1% ang nakuha nina Rep. Alvarez at human rights lawyer Chel Diokno.

Ayon sa Pulse Asia, face-to-face interviews ang paraan ng survey para sa 2,400 adult Filipinos na botante, habang may ±2% error margin na may 95% confidence level. “Subnational estimates for each of the geographic areas covered in the survey (i.e., Metro Manila, the rest of Luzon, Visayas and Mindanao) have a ± 4% error margin, also at 95% confidence level,” pahayag pa ng Pulse Asia.