Aprub ni P-Du30... General public at menor-de-edad, next na babakunahan kontra-COVID-19

ni Lolet Abania | September 28, 2021

Inaprubahan na ni Pangulong Rodrigo Duterte ang pagbabakuna kontra-COVID-19 para sa general population at menor-de-edad simula sa Oktubre, ayon sa Malacañang.

Sa kanyang regular press briefing, sinabi ni Presidential Spokesperson Harry Roque na ito ay dahil sa malaking bilang ng mga doses ng COVID-19 vaccine ang dumating kamakailan sa bansa habang maraming pang inaasahang bakuna na darating sa mga susunod na linggo.

“Ang good news, inaprubahan na ni Presidente ang pagbabakuna ng general population simula po sa buwan ng Oktubre,” ani ni Roque.

Ayon pa kay Roque, aprubado na rin kay Pangulong Duterte ang pagbabakuna sa mga minors laban sa COVID-19 habang hinimok din ang mga magulang na ipalista na ang pangalan ng kanilang mga anak.

“Ating hinihikayat ngayon ay magpa-masterlisting na po ang mga magulang ng mga kabataan para mapalista na ‘yung mga kabataan ‘pag nagsimula na po tayo,” ani opisyal.

“Inaasahan natin na magsisimula rin tayo sa buwan ng Oktubre, aprubado na rin po iyan ng ating Presidente,” dagdag niya.

Sinabi ng kalihim, ito ay base sa rekomendasyon ng National Task Force Against COVID-19 chief implementer at vaccine czar Secretary Carlito Galvez Jr. “Vaccine is your best defense for yourself and your community,” saad ni Roque.

Matatandaang binigyan ng Food and Drug Administration (FDA) ng bansa ng emergency use authorization (EUA) ang Moderna at Pfizer-BioNTech vaccine na gamitin para sa mga edad 12 hanggang 17.

Ang Sinovac ay naghain na rin nito sa FDA para sa kanilang approval na gamitin ang naturang vaccines sa mga kabataan.

Nabanggit naman ni Galvez na mahigit sa 61 milyon doses ng COVID-19 vaccine ang darating sa bansa ng Setyembre at Oktubre.

Nitong Setyembre 6, ang lahat ng local government units (LGUs) ay nagbaba na ng direktiba hinggil sa pagbabakuna sa priority sectors A1 hanggang A5.

Sa ilalim ng A1 priority category, sila ang mga nasa frontline health services, A2 naman ay mga senior citizens, A3 ay persons with comorbidities, A4 ay frontline personnel na nasa essential sectors kabilang na ang mga uniformed personnel, at A5 ay ang mga indigent population.

P-Duterte, nagbabalang pakikilusin ang militar sa eleksiyon 2022

ni Jasmin Joy Evangelista | September 26, 2021

Nanawagan si Pangulong Rodrigo Duterte para sa isang mapayapang halalan sa 2022.

Bagama't walang binanggit na grupong posibleng manggulo, nagbabala ang presidente na pakikilusin niya ang militar para mapanatili ang kaayusan sa eleksyon.

"Nobody wants trouble, nobody wants cheating. . . . Nakikiusap na ako, I am pleading, almost praying that people will really stick to the rule of law and avoid violence kasi ‘pag hindi, unahan ko na kayo. Then I will be forced to use the might of the military not for any purpose but to see to it that the election is peaceful and violence-free," sabi niya sa kanyang speech sa inauguration and unveiling of marker ng bagong Sultan Kudarat Provincial Hospital nitong Biyernes.

"Either we have an election that is free or I will use the military to see that the election is free. The military is the guardian of our country and I could call them anytime to see to it that people are protected and election’s freely, orderly exercised," dagdag niya.

Sertipikasyon ng PDP-Laban para sa VP, pinirmahan ni P-Du30

ni Lolet Abania | September 23, 2021

Pormal nang tinanggap ni Pangulong Rodrigo Duterte ang nominasyon ng PDP-Laban Cusi faction para sa pagtakbo niya bilang bise-presidente sa 2022 elections.

Naglabas ng isang larawan ang PDP-Laban Cusi faction habang makikitang pinipirmahan ni Pangulong Duterte ang Certificate of Nomination Acceptance (CONA) para kumpirmahin ang pagtanggap niya sa nominasyon.

Nang tanungin naman sa kanyang regular na press briefing ngayong Huwebes kung ang desisyon ni Pangulong Duterte na tumakbo sa pagka-bise presidente ay pinal na, ayon kay Presidential Spokesperson Harry Roque, wala siyang physical access sa Pangulo sa ngayon dahil siya ay isinailalim sa facility quarantine.

Gayunman, ipinahayag ni Roque sa publiko na hintayin na lang ang magiging development nito sa Oktubre 8, ang huling araw ng paghahain ng certificate of candidacy hanggang Nobyembre 15, ang huling araw naman ng substitution o pagpapalit ng opisyal na kandidato.

Matatandaan na noong Setyembre 8, verbal na tinanggap ni Pangulong Duterte ang nominasyon sa ginanap na national assembly ng PDP-Laban faction na pinamunuan ni Department of Energy Secretary Alfonso Cusi.

Para sa pagka-pangulo, pinili naman ng naturang faction si Senador Bong Go subalit tinanggihan niya ito. Si Go ay isang long-time aide ng mga Duterte.