COVID-19 vaccines, balasahin.. ‘Wag kayong mamili — P-Du30

ni Lolet Abania | October 20, 2021

Naglabas ng direktiba si Pangulong Rodrigo Duterte na i-shuffle o balasahin ang pamamahagi ng COVID-19 vaccines sa iba’t ibang lugar sa bansa.

Sa isang public address, muling nagbabala si Pangulong Duterte sa mga opisyal ng gobyerno na namimili umano ng ibibigay na bakuna kontra-COVID-19.

“Huwag kayong mamili. Sabi ko kay Secretary [Carlito] Galvez… ibabalasa ninyo. Iyong isang karton, itapon mo sa isa dito… So ang magdating sa inyo, halo,” pahayag ni P-Duterte.

Ayon sa Pangulo, kahit na mas pinapaboran ng karamihan ang COVID-19 vaccines na nagmula sa Western countries aniya, lahat ng mga bakuna ay ginawa at dinibelop ng mga taong may kakayahan at husay sa paggawa nito.

“If they are not effective and if they are not good, eh bakit ngayon halos wala nang patay?” saad ng Pangulo. Sa ngayon, nasa pitong brands ng COVID-19 vaccine ang ginagamit na sa bansa. Ito ay Pfizer, Moderna, Sinovac, AstraZeneca, Johnson & Johnson, Sinopharm at Gamaleya Institute.

Samantala, hanggang nitong Oktubre 18, nasa tinatayang 24.5 milyong Pilipino na ang fully vaccinated, kung saan higit 31 porsiyento sa year-end target ng gobyerno na mabakunahan.

Sinimulan ang pagbabakuna kontra-COVID-19 noong Marso 1. Aabot naman sa 53,315,069 ang kabuuang vaccine doses na na-administer ng pamahalaan. Halos 17 milyon dito ay sa Metro Manila, kasunod ang Calabarzon na nakapagbakuna na ng halos 8 milyong doses ng COVID-19 vaccines.

Ayon naman kay vaccine czar Carlito Galvez Jr., dapat ay nasa 50 milyon na ang nabakunahan upang makamit na ng bansa ang herd immunity at para magkaroon na rin ng ligtas na pagdiriwang ng Kapaskuhan.

Quitain, bagong chief presidential legal counsel – P-Duterte

ni Lolet Abania | October 19, 2021

Itinalaga ni Pangulong Rodrigo Duterte si Jesus Melchor Vega Quitain bilang bagong chief presidential legal counsel, kapalit ni Salvador Panelo, na tatakbo sa pagka-senador sa 2022 elections.

Ito ang inanunsiyo ni Presidential Spokesperson Harry Roque ngayong Martes, 10 araw matapos na si Panelo ay maghain ng kanyang certificate of candidacy (COC) para sa eleksyon sa susunod na taon, kung saan binakantehan ang kanyang puwesto bilang chief presidential legal counsel.

Una nang nagsilbi si Quitain bilang undersecretary sa ilalim ng Office of the Special Assistant to the President.

Gayunman, ayon kay Roque, wala pang napili si Pangulong Duterte na ipapalit kina dating Department of Information and Communications Secretary Gregorio Honasan at dating Department of Agrarian Reform Secretary John Castriciones.

Parehong sina Honasan at Castriciones ay naghain din ng COC sa pagka-senador sa 2022 elections.

Pag-regulate sa industriya ng LPG, ganap nang batas – P-Du30

ni Lolet Abania | October 19, 2021

Nilagdaan na ni Pangulong Rodrigo Duterte ang isang batas na magtatatag ng regulatory framework hinggil sa pagkakaroon ng ligtas na operasyon ng liquefied petroleum gas (LPG) industry.

Ayon sa Republic Act 11592, kailangang i-apply ang mga sumusunod:

* importing, refining, storing, exporting, refilling, transportation, distribution and marketing of LPG

* importation, manufacture, requalification, repair, exchange, swapping improvement at scrappage ng LPG pressure vessels, whichever is applicable

* safe operations of the entire LPG industry including all LPG facilities and the residential, commercial, industrial, and automotive use of LPG.

Kinakailangan ding isagawa ng Executive department na i-formulate at ilathala ito sa loob ng anim na buwan mula sa effectivity ng batas ang isang LPG Cylinder Exchange and Swapping Program, kung saan dapat nakabilang, bukod pa rito, ang procedure at timeline for exchange, swapping, at buyback ng LPG cylinders, at ang computation ng depreciated value ng LPG cylinders, at ang establishment ng accredited LPG cylinder swapping centers.

Ang mga guidelines ay bubuuin naman ng Department of Energy (DoE), katuwang ang Department of Trade and Industry (DTI) at isinangguni ito sa lahat ng LPG participants, consumer groups, at iba pang pampubliko at pribadong stakeholders.

May mandato rin ang bagong batas sa pulisya at ibang law enforcement agencies na kailangang asistihan ang DOE sa pag-inspeksyon ng LPG facilities at ang mga motor vehicles na magta-transport ng LPG na bultuhan at maramihan o mga nasa LPG cylinders at cartridges.

Ipinagbabawal naman sa naturang batas, ang tinatawag na importing used o second-hand LPG pressure vessels, pagbebenta ng adulterated LPG ng maramihan at ng pressure vessels, at pagtataglay ng ilegal o pekeng LPG seals, at iba pa.

Noong Oktubre 14 nilagdaan ng Pangulo ang nasabing batas subalit, ito ay nai-post lamang sa Official Gazette ngayong Oktubre 19.