Para sa private at gov’t transactions.. National ID, institusyonal na ang pagtanggap — P-Du30

ni Lolet Abania | February 16, 2022

Nilagdaan ni Pangulong Rodrigo Duterte ang isang executive order para gawing institutionalize o institusyonal na ang pagtanggap ng Philippine Identification System (PhilSys) ID o National ID bilang “sufficient proof” o sapat na katibayan ng pagkakilanlan at edad sa lahat ng pribado at mga transaksyon sa gobyerno.

Sa ilalim ng Executive Order 162 ni Pangulong Duterte nakasaad na ang PhilSys, “shall be the government’s central identification platform for all citizens and resident aliens of the country.”

“An individual’s record in the PhilSys shall be considered as sufficient proof of identity and age in all public and private transactions,” pagdidiin ng Punong Ehekutibo.

Ayon sa Pangulo ito ay kinakailangan, “to improve efficiency in the delivery of social services, strengthen financial inclusion and promote ease of doing business.”

Ang mga government transactions kung saan maaaring magamit ang national ID, kabilang na ang aplikasyon para sa marriage license, student driver’s permit, enrollment ng mga estudyante, at voter’s registration, at iba pa.

Ipinag-utos din ni Pangulong Duterte sa mga pribadong establisimyento na ipaalam sa publiko ang mga guidelines sa paggamit ng national ID o mga pagbabago sa mga identification requirements.

Tinatayang nasa 55 milyong Pilipino mula sa 109 milyong indibidwal ang naka-registered na sa ilalim ng national ID system.

Habang mayroong 6 milyong ID cards ang kanila nang nai-release sa ngayon, ayon sa Philippine Statistics Authority (PSA) nitong Huwebes.

Marcos, ‘umaasa’ sa endorsement ni P-Du30 — spox

ni Lolet Abania | February 11, 2022

Umaasa umano si presidential aspirant Ferdinand “Bongbong/BBM” Marcos Jr. na matatanggap ang pag-endorso ni Pangulong Rodrigo Duterte para sa May 9 elections, ayon sa kanyang spokesperson.

Sinabi ni Atty. Vic Rodriguez na ang makuha ang suporta ni Pangulong Duterte ay “big boost” o malaking tulong para mailuklok si Marcos sa Malacañang.

“Well, kami ay hopeful. Kagaya ng sinabi rin naman I think ng nakararami kundi man lahat ng presidential candidate, it could be a big boost to get the endorsement of President Rodrigo Roa Duterte,” sabi ni Rodriguez sa isang interview ngayong Biyernes.

“Hindi kami inosente sa ganu’n. Gusto rin namin makuha ang endorsement ni Pangulong Duterte but hanggang nga sa ngayon eh, siguro nag-iisip pa ang ating Pangulo.”

“Maghihintay kami at patuloy na aasa na makuha namin ang kanyang matamis na oo,” sabi pa ni Rodriguez. Una nang binanggit ng anak ni Pangulo Duterte, na si Davao City Mayor Sara Duterte-Carpio, na umaasa siya na makukuha ang suporta ng kanyang ama sa kanilang kandidatura.

Si Mayor Sara ang running mate ni BBM para sa UniTeam. Ang Marcos-Duterte tandem ang nangunguna umano sa kanilang mga katunggali, batay sa mga isinagawang surveys.

Sa isang taped public briefing na ipinalabas nitong Lunes, ipinahayag ni Pangulong Duterte na wala pa siyang napipisil na susuportahan na presidential candidates para sa darating na national elections.

Subalit, sa kabila ng hindi pagsuporta sa sinuman, naniniwala ang Pangulo na kuwalipikado ang lahat ng mga kandidato na tumakbo sa eleksyon.

‘Negative ang lumabas sa lahat ng COVID tests ni P-Du30’ — Nograles

ni Lolet Abania | February 8, 2022

Mariing itinanggi ni acting presidential spokesperson Karlo Nograles na nagpositibo sa test sa COVID-19 si Pangulong Rodrigo Duterte.

Ito ang naging pahayag ni Nograles matapos na banggitin ni Atty. Victor Rodriguez, ang spokesperson ni presidential aspirant Ferdinand “Bongbong” Marcos Jr., sa isang ambush interview ng mga reporters na si Pangulong Duterte ay na-infect ng COVID-19.

“PRRD tested and all his COVID-19 tests have come out negative. Results state ‘not detected’,” giit ni Nograles sa mga reporters ngayong Martes. Sa Philippine Arena, sa Bulacan, tinanong si Rodriguez hinggil sa kung dadalo si Pangulo Duterte sa proclamation rally ng BBM-Sara UniTeam, dahil sa ang anak nito na si Davao City Mayor Sara Duterte, ay running mate ni Marcos.

Ayon kay Rodriguez, hindi nila nakuhang makausap si P-Duterte dahil aniya, ang Pangulo ay tinamaan umano ng COVID-19.

“Hindi na kami nakapag-reach out na kay PRRD dahil alam naman ninyo, kaka-positive lang ni PRRD. I think hindi naman tama na obligahin natin ang ating Pangulo na ma-involve sa political exercises,” sabi ni Rodriguez.

“At the same time mindful din kami sa health and safety of the President sapagkat ilang araw lamang ang nakalipas, siya ay nagpositibo sa COVID-19,” dagdag pa ni Rodriguez.

Matatandaang, sumailalim si Pangulong Duterte sa mandatory quarantine matapos na ma-exposed sa isang household staff member na nagpositibo sa test sa COVID-19.