Serye ni Kylie, tinapatan pa… SEN. ROBIN, IPINASARA ANG ABS-CBN NOON, PASOK SA BLOOD VS. DUTY NGAYON

ni Nitz Miralles @Bida | April 28, 2026

Photo: FB Robin Padilla

Muslim pala ang karakter ni Robin Padilla sa Blood vs. Duty (BVD), kaya siguro tinanggap niya ang offer. Mapapanood na siya at ang karakter niya simula this Monday at dahil dito, makakatapat niya ang anak na si Kylie Padilla na napapanood naman sa Sang’gre ng GMA-7.

Makakatapat naman ng dalawang series ang A Secret in Prague (ASIP) ng TV5 na tampok sina Andrea Brillantes at Enrique Gil. Kaya tama ang comment ng isang netizen na masaya ang tapatan ng tatlong series.

And speaking of Robin, may Kapamilya na hindi pabor sa pagge-guest niya sa BVD. Dahil ito sa isyung isa siya sa mga nag-apruba na mapasara ang ABS-CBN noon. 

May mga tanong kung bakit siya kinuha at kahit guesting lang, mapapanood pa rin daw siya sa istasyon na isa siya sa mga tumulong para maipasara.

May tanong pa kung wala na raw bang ibang aktor na puwedeng gumanap sa role na kanyang gagampanan? Hindi pa raw nila nakakalimutan ang ginawa nito sa ABS-CBN kaya may tampo pa rin sila rito.

May nagtanggol naman kay Sen. Robin Padilla. Special guest lang daw ito kaya hayaan na lang. Saka bagay raw sa kanya ang role at hindi naman siya ang bida sa series kaya okay na sa kanila.

---

Dahil sa Pagdating ng Panahon, career nabuhay…

ICE, UMAMING NALUNGKOT NANG MALAOS

TWENTY-FIVE years na pala mula nang ma-release ang timeless song ni Ice Seguerra na Pagdating ng Panahon (PNP). To celebrate its anniversary at milestone sa singing career ni Ice, nakipag-collab si Ice at ang Fire & Ice Music sa Vicor Music Corporation to re-release the single with a new version.

Nag-recording uli si Ice at mas haunting ang bagong version niya sa song, mas may emosyon than the original version. 

Kuwento ni Ice, pinalabas niya ang mga tao sa recording para mas makapag-focus at the result is magic.

Ang PNP ay kasama sa highlight ng 39 years niya sa entertainment industry. 

“Nabuhay ang career ko sa song na ‘to, ang laki ng nagawa sa akin at naalis ako sa pagiging ‘laos’. Kasama rin sa highlight ng career ko ang paglaos ko. Ikinalungkot ko nang malaos ako. I felt unappreciated,” sabi ni Ice.

Sa tanong kung ano’ng favorite line niya sa song, “The bridge part ng song, actually (na kinanta nito). For me, that line, ‘di lang favorite ko, it sums up what the song is all about. When we are losing hope, malay natin, darating ‘yung mga pinapangarap natin,” sagot ni Ice.

Available na sa lahat ng major streaming platforms ang new version ng song. This is in partnership also with Viva Records.

“I’m thankful that after 25 years, people are still listening, still singing, and still finding themselves in this song. That’s something I will never take for granted,” sabi pa ni Ice Seguerra.

---

MASAYANG post ni Enrique Gil sa Instagram (IG), “From Prague to PH, with love from Mikoy and Chiara. We are now on Top 2 on @netflixph’s Top TV Shows in Philippines. Maraming salamat sa pagmamahal sa A Secret in Prague, mga kapatid.

“Mapapanood na rin sa Free TV, TV5’s #TodoMaxPrimetime this Monday, April 27, 8 PM.”

Magandang balita nga ito na subaybayan din ang airing ng romantic thriller sa TV5 to know more the two’s character. 

Marami ang naintriga sa team-up ng dalawa. May mga tanong kung hindi ba sila nagkailangan. Sagot dito ni Enrique, nakatulong na naging friends sila at na-develop pa lalo ang friendship nila habang nasa Prague sila.

Aabangan din ng mga fans ang nabanggit ni Enrique Gil na happy ang ending ng love story nina Mikoy (Enrique) at Chiara (Andrea Brillantes), pero kailangang subaybayan para mas ma-feel at malaman kung bakit happy ang ending ng love story nilang dalawa.

Impeachment kay VP Sara, ‘wag madiliin — Sen. Robin

ni Mylene Alfonso @News | April 26, 2026

Photo: File / Robin Padilla at Inday Sara Duterte - FB

Dapat sumunod sa tamang proseso ang isinasagawang impeachment proceedings laban kay Bise Presidente Sara Duterte at hindi rin ito dapat minamadali.

Ayon kay Senador Robinhood Padilla, wala dapat nilalaktawang hakbang sa proseso at dapat itong dumaan sa plenaryo ng Mababang Kapulungan at hindi ito dapat idiretso sa Senado. 

“Hindi puwedeng laktawan ang proseso. Kailangan dumaan sa tamang proseso. Paulit-ulit na sinabi ng Korte Suprema ang kahalagahan ng due process. Kapag nilundagan natin ito, wala na namang pupuntahan kundi sayang sa oras at pera ng taumbayan,” wika ng senador.

Kinuwestiyon din ni Padilla kung ang impeachment ba ang tamang sagot sa kinahaharap na suliranin ng bansa.

“Ang tanong—iyan ba talaga ang solusyon sa problema ng bayan? Bakit hindi natin pag-usapan ang sahod ng tao? Halimbawa ang minimum wage. ‘Yan ang tunay na problema ng mamamayan,” saad pa ng senador. 

Kaugnay nito, sinabi ni Padilla na tama lamang ang ginawa ni dating House Speaker Martin Romualdez na magsalita sa isang video upang ipagtanggol ang kanyang sarili. 

“Sa Pilipinas kasi, nauuna ang trial by publicity. Kapag nanahimik ka, magmumukhang ikaw ang may kasalanan. Sa nakita ko, ipinaliwanag lang niya ang proseso ng budget. Wala naman akong nakita na ipinahamak niya ang sarili niya,” ani Padilla. 

“Siguro naramdaman niya na kailangan na niyang magsalita. Kung hindi siya kikilos, baka siya ang tuluyang malubog,” paliwanag ng senador.

Nang tanungin sa hindi pa rin namamatay na usapin kung siya ang tatakbong bise-presidente ni Sara Duterte, sinabi ni Padilla na maraming tao ang magagalit sa kanya dahil magiging mas mahigpit pa siya kaysa kay dating Pangulong Rodrigo Duterte.

“Hindi ako gugustuhin ng marami na maging vice president. Dahil kung ako ang tatanungin, mas magiging mahigpit ako sa kriminalidad, baka mas higpit pa kaysa kay Pangulong Duterte.”

Ayon pa kay Padilla, masyado nang marami ang masasamang tao at ito rin ang dahilan kaya’t mahigpit niyang isinusulong ang death penalty. 

Nanawagan ang senador para sa mas malalim na pagtuon sa tunay na problema ng bansa kaysa sa labis na pulitikal na bangayan.

“Parang teleserye na ang pulitika ngayon. Maraming scriptwriter, maraming artista. Pero sana huwag nating kalimutan ang tunay na problema ng bayan,” pagtatapos ni Padilla.

Pinagbabawalan sa paggamit ng socmed… SEN. ROBIN: KABATAAN NGAYON, MAHIHINA!

ni Mercy Lejarde @Showbiz Talkies | February 13, 2026

Photo: FB Robin Padilla

“Ang mga bata ngayon, sad to say, you are weak,” ang pahayag ng aktor na si Sen. Robin Padilla sa ginanap na pagdinig ng Senate Committee on Public Information and Mass Media noong Wednesday, February 11, 2026.

Saad ni Sen. Robin, “Siguro naman, ‘yung iba rito, ‘di ko man kaedad, eh, naranasan n’yo ‘yung panahon ng ‘90s at ‘80s na tayo ay naglalaro pa, masaya pa. Ang mga bata po ngayon, sad to say, ‘wag kayong magagalit sa akin. Naku, maraming batang magagalit siguro, pasens’ya na kayo. You are weak.

“‘Di kayo katulad noong panahon namin na ‘di kami iyakin. Natuto kami sa kalsada, natuto kami na ‘wag umupo at umiyak. Noong panahon namin, ‘di uso ang salitang ‘depression’. ‘Di ko nga alam ‘yun. Ngayon, batang maliit sasabihin, ‘I’m depressed,’ magulo.”

Sa naganap na hearing, naka-focus ang usapin sa pagsusulong ng limitasyon ng mga bata sa paggamit ng social media upang protektahan sila sa cyberbullying, mental health issues, at online threats.

In fairness, Sen. Robin Padilla, isa ‘yan sa mga magagandang batas na isinulong mo para sa mga kabataan.

---

Inamnn ng vlogger na si Boss Toyo sa kanyang social media post na nagkamali siya sa pagkakakilala sa TV host-aktor na si Willie Revillame.

Saad ni Boss Toyo, “Sobrang nagkamali ako sa taong ‘to. Dahil naniwala ako sa mga nakikita ko sa social media tungkol kay Kuya Wil. 

“Pero noong nakasama ko s’ya nang tatlong araw, lahat nakita ko, narinig ko ang mga kuwento ng buhay n’ya, ‘di mula sa kanya kundi sa mga taong nakapaligid sa kanya. Sa tatlong araw, du’n ko rin nakita kung gaano s’ya katotoong tao.

“‘Yung namimigay ng walang kamera dahil sarili n’yang pera, kaya sabi n’ya ‘di na n’ya kailangan ikamera o ipagsigawan ang pagtulong. ‘Yung napapanood sa telebisyon na pamimigay, dahil ‘yun ay trabaho at kailangan ng sponsors, pero ‘pag sarili n’ya, walang kamera, walang kahit ano. ‘Yung kuwento ng kanyang tagumpay na walang sinagasaan at walang halong anomalya, kaya malaya n’yang nabibili ang mga gusto n’ya.

“Nagtanong ako sa kanya kung paano n’ya naha-handle ‘yung mga ibang tao na namba-bash sa kanya. Sabi n’ya, una, ‘di s’ya nagso-social media. Pangalawa, ang katotohanan, kahit ano’ng gawin mo sa mundo, may masasabi at masasabi pa rin sila sa ‘yo. Kaya kung ano ang nagpapasaya sa ‘yo at sa ibang tao, ‘yun ang gawin mo.

“Oo, medyo may pagkaistrikto s’ya pagdating sa trabaho dahil mas mainam daw ‘yun, dahil disiplina ang gusto n’yang iparating sa lahat ng tao na nakapaligid sa kanya, lalo na pagdating sa trabaho.

“Isa pa, tao lang ako, marami tayong pagkakamali, pero ‘di ibig sabihin noon, eh, masama na dahil ang buhay ay isang malaking paaralan para sa lahat, at habang nararanasan mo ang lahat, natututo ka.

“Pinahanga ako ng taong dati ay ‘di ko hinahangaan. Mali ako, at tinanggap n’ya ‘yun. Salamat sa mga turo, Kuya Wil! Salamat sa pagbibigay ng pagkakataon na makakuwentuhan ka. Hihintayin ko na makasama ko kayo sa isang entablado.”

In fairness sa host ng Wilyonaryo na si Willie, matulungin naman talaga siya.

---

AYAW paawat sa pag-arangkada ang career ng Pinoy Big Brother Celebrity Collab Edition (PBBCCE) Kapuso Big Winner na si Mika Salamanca dahil matapos i-launch bilang bida sa seryeng The Secrets of Hotel 88 (TSOH88), ganap na siyang music artist sa pag-release ng kanyang bagong awiting Kasalanan, na bahagi ng kanyang inaabangang debut album sa ilalim ng Star Music.

Sa loob lamang ng dalawang araw, nanguna ito sa iTunes Philippines at napasama rin sa New Music Friday list ng Spotify at Billboard Philippines. Sinulat ng Star Music artists na sina Jeremy G, Ishiro Incapas, at Russu Laurente ng P-pop group na WRIVE ang Kasalanan na tungkol sa pag-ibig na malaya, walang takot, at walang pakialam sa sasabihin ng iba.

“Ito rin po ay nagsisilbing love letter ko sa mga fans ko na simula’t sapul ay ‘di ako iniwan at patuloy akong sinusuportahan sa kabila ng mga panghuhusga sa akin sa social media,” pagbabahagi ni Mika Salamanca.