P20 bigas, posible — Sen. Villar

ni Eli San Miguel - Trainee @News | December 15, 2023

Posible ang P20 bawat kilo ng bigas sa 2024 sa ilalim ng ilang kondisyon, ayon kay Senador Cynthia Villar.

“Kapag na-implement ang Rice Tariffication Law [at yung Rice Competitiveness Enhancement Fund ng National Rice Program at saka yung ano….. [ay] kaya,” pahayag ni Villar ngayong Biyernes.

Sinabi ni Villar, ang chairperson ng Senate committee on agriculture, food, at agrarian reform, na nasa implementasyon ng nabanggit na mga hakbang ang problema.

Sinabi niya na upang mabawasan ang presyo ng bigas, kinakailangan ding magsanay ang mga magsasaka at bigyan ng mas magandang mga binhi.

“Kailangan mura ang puhunan. Kaya may perang binigay sa Landbank at Development Bank of the Philippines. Kaso kung hindi nila ‘yun ibibigay sa farmers ay mahihirapan tayo to be competitive. Pero kung maganda ang implementation of the law we can do it,” paliwanag niya.

Binigyang-diin ni Villar na kaya ng Vietnam na mag-produce ng palay, o kilala rin bilang "unhusked rice", sa halagang P6 kada kilo.

“Yun ang hinahabol natin eh. Sa P6 per kilo na palay times two para maging bigas so P12 ang puhunan. So kayang-kaya yung P20 kung tutuusin ‘di iba? Kaya lang kailangan ibaba. P12 [ang production rate] natin eh. Kailangan ibaba sa P6,” saad niya.

Hirit ni Marcos sa publiko.. Mga sangkot sa smuggling at hoarding, isumbong

ni Mylene Alfonso @News | October 7, 2023

Hinimok ni Pangulong Ferdinand Marcos, Jr., ang publiko na isumbong ang sinuman na malalaman nila na sangkot sa smuggling at hoarding ng mga agricultural products.

"Mga kababayan, gaano man kalaki ang kanilang sindikato… wala pong binatbat 'yan sa nagkakaisa nating lakas," ani Marcos sa isinagawang pamamahagi ng bigas sa Capiz.

"Kaya kung may nalalaman po kayong sangkot sa ganitong transaksyon, 'wag po kayong matakot na magsuplong," saad ni Marcos.

Una nang binigyan ng warning ni Marcos ang mga smuggler na hahabulin ng gobyerno ang malalaking sindikato na sangkot sa pananabotahe ng ekonomiya.

"Makilahok sa pagbabantay sa ating lipunan. Marami pa rin po tayong malalaking nakakapanloko ng kapwa. Tunay po na nakakagalit ang mga smuggler at hoarder na 'yan," ayon kay Marcos.

Ayon pa sa Pangulo, inaamyendahan na ng mga mambabatas para gawing kasong kriminal at bigatan ang parusa sa agricultural hoarding at smuggling.

Nabatid na inaprubahan na ng House of Representatives sa ikatlo at pinal na pagbasa ang bill na pabigatin ang parusa ng Anti-Agricultural Smuggling law.

Habang ilang agricultural group naman ang nagsulong sa paglikha ng special court na tututok lamang sa mga kaso ng smuggling.

Price cap sa bigas, binawi na

ni Mylene Alfonso @News | October 5, 2023

Inanunsyo kahapon ni Pangulong Ferdinand Marcos, Jr. ang pagbawi sa price cap sa bigas.

"Well, I think it's the appropriate time since namimigay tayo ng bigas. Yes, as of today we are lifting the price caps on the rice both for the regular-milled rice and for the well-milled rice," pahayag ni Marcos sa panayam sa Taguig City.

"So, tinatanggal na natin 'yung mga control. Pero hindi ibig sabihin basta't ganoon na lang dahil kailangan pa rin natin ayusin ang agricultural sector," wika pa ni Marcos.

Ayon sa Pangulo, sa kabila ng pagbawi ng price cap, patuloy na magbibigay ng tulong ang pamahalaan sa mga magsasaka.

Sa ilalim ng Executive Order 39, ang mandated price cap para sa regular milled rice ay P41.00 kada kilo habang ang mandated price ceiling para sa well-milled rice ay P45.00 kada kilo na epektibo noong Setyembre 5.

Matatandaang nabigyan ng cash assistance na nagkakahalaga ng P15,000 ang mga apektadong retailer ng bigas sa gitna ng epekto ng price ceiling.