Price cap sa bigas, binawi na

ni Mylene Alfonso @News | October 5, 2023

Inanunsyo kahapon ni Pangulong Ferdinand Marcos, Jr. ang pagbawi sa price cap sa bigas.

"Well, I think it's the appropriate time since namimigay tayo ng bigas. Yes, as of today we are lifting the price caps on the rice both for the regular-milled rice and for the well-milled rice," pahayag ni Marcos sa panayam sa Taguig City.

"So, tinatanggal na natin 'yung mga control. Pero hindi ibig sabihin basta't ganoon na lang dahil kailangan pa rin natin ayusin ang agricultural sector," wika pa ni Marcos.

Ayon sa Pangulo, sa kabila ng pagbawi ng price cap, patuloy na magbibigay ng tulong ang pamahalaan sa mga magsasaka.

Sa ilalim ng Executive Order 39, ang mandated price cap para sa regular milled rice ay P41.00 kada kilo habang ang mandated price ceiling para sa well-milled rice ay P45.00 kada kilo na epektibo noong Setyembre 5.

Matatandaang nabigyan ng cash assistance na nagkakahalaga ng P15,000 ang mga apektadong retailer ng bigas sa gitna ng epekto ng price ceiling.

DA, DTI at DILG, nakabantay.. Presyo ng bigas, 'di na tataas

ni Mylene Alfonso @News | October 4, 2023

Inanunsyo ng mga opisyal ng Department of Agriculture (DA) na tumaas ang produksyon ng bigas kung saan nakakuha ang bansa ng 52 araw na suplay ng bigas sa pagtatapos ng Setyembre.

Ito ang iniharap ni DA Undersecretary Mercedita Sombilla kay Pangulong Ferdinand Marcos, Jr. sa isang sectoral meeting sa Malacañang para talakayin ang mga indikasyon na magiging batayan sa pagtataas ng price ceiling sa bigas na ipinataw sa ilalim ng Executive Order (EO) No. 39.

Sa kanilang presentasyon, tinukoy ng DA ang mga indikasyon na maghuhudyat ng pagtaas ng price cap, katulad ng pagbaba ng presyo ng bigas sa domestic market, pagtaas ng supply ng bigas at mga paborableng panlabas na salik tulad ng pagbaba ng presyo ng bigas sa buong mundo, at iba pa.

Sa press briefing ng Palasyo, sinabi ni DA-Bureau of Plant Industry (BPI) Director Gerald Glenn Panganiban na natugunan na ang lahat ng mga parameter kabilang na ang masaganang suplay at ang pagbaba ng presyo gayundin ang pagbaba ng presyo ng bigas sa mundo.

Sa pagtatapos ng Oktubre, sa puspusang pag-aani, ang supply ay katumbas ng 74 na araw.

Bumaba na rin ang presyo ng bigas malapit sa price ceiling na may average na presyo ng regular milled rice na humigit-kumulang P41.91 kada kilo at para sa well-milled na bigas ay P45.95.

"Kaya 'yun at inaasahan na magkaroon ng collaborations ang DA at DTI (Department of Trade and Industry) para mas ma-monitor at ma-survey ang mga presyo para hindi... muli, tumaas nang husto," pahayag ni Panganiban.

“So, iyon ang ginagawa namin at nakikipagtulungan kami sa lahat ng ahensya ng gobyerno – hindi lang ang DA kundi pati na rin ang DTI at DILG (Department of Interior and Local Government) para ipatupad ang anumang hakbang at guidelines na magagawa namin para ang mga mamimili at, siyempre, ang ating mga stakeholder, ang mga magsasaka, na nakinabang din (ito),” banggit pa ng opisyal.

'Di pa pinangalanan.. 3 rice smugglers, kinasuhan na

ni Mylene Alfonso @News | October 3, 2023

Nagsampa ang Bureau of Customs (BOC) ng apat na reklamong kriminal laban sa tatlong mangangalakal ng bigas noong Setyembre 29, 2023, kasunod ng mga pag-agaw at imbestigasyon kamakailan sa iba't ibang bodega sa Bulacan.

Noong Agosto 2023, natuklasan ng mga ahente ng BOC ang labag sa batas na inangkat na mga sako ng bigas sa Bulacan, na nagkakahalaga ng mahigit P260 milyon.

Sa pagtatatag ng probable cause, naglabas ang BOC ng mga warrant of seizure at detention laban sa mga subject warehouse para sa mga umano'y paglabag sa mga batas, panuntunan, at regulasyon ng Customs. Kasunod nito, noong Setyembre 29, ang BOC, sa pangunguna ng Bureau’s Action Team Against Smugglers, ay nagpresenta ng mga natuklasan nito at nagsampa ng kaukulang kasong kriminal sa Department of Justice (DOJ) laban sa mga may-ari at nagmamay-ari ng mga bodega dahil sa umano'y rice smuggling.

Kasama sa apat na reklamong kriminal ang mga paglabag sa Republic Act (R.A.) 10863, na kilala rin bilang Customs Modernization and Tariff Act (CMTA), at R.A. 11203 o ang Rice Tariffication Law.

Sa kabuuang mga kasong isinampa, tatlo ang nauukol sa large scale smuggling na lumalabag sa R.A. 10845, o kilala bilang Anti-Agricultural Smuggling Act.