RFID, binantaang ayusin, dahil sa traffic... Gatchalian sa NLEX: Bawal maningil!

ni Lolet Abania | December 7, 2020

Pinagsabihan ni Valenzuela City Mayor Rex Gatchalian ang pamunuan ng North Luzon Expressway (NLEX) na dapat humingi ng paumanhin o magdeklara na lamang ng isang toll holiday ang kumpanya dahil sa kaguluhang idinulot ng pagpapatupad ng kanilang RFID cashless payment system.

"The least NLEX can do is one, publicly apologize to the riding general public. Two, while fixing its RFID system --- toll holiday muna," post sa Facebook ni Gatchalian ngayong Linggo. "Walang singilan hanggang mai-deliver nila ang maayos na service sa mga toll plaza nila," sabi pa ng alkalde.

Matinding traffic ang nangyari sa mga toll plazas sa NLEX simula nang ipinatupad ang cashless payment system noong December 1 kasabay ng ibinigay na mandato ng Department of Transportation (DOTr). Punumpuno ng mga sasakyan at napakahabang traffic sa mga lugar na malapit sa Karuhatan sa Valenzuela City dahil sa RFID sa toll gate ng lungsod.

Ayon naman sa Toll Regulatory Board, ang dami ng mga sasakyan na naipon sa expressway ay tinatawag nilang “birth pain.” Anila, ang ilang lanes ng NLEX toll plaza ay para sa mga sasakyang mayroon nang RFID, habang ang iba ay sa installation ng RFID stickers.

Gayunman, noong Biyernes, nagpadala ng sulat si Gatchalian sa NLEX Corporation chief operating officer na si Raul Ignacio, kung saan binibigyan ng lokal na pamahalaan ng Valenzuela ang kumpanya ng 24-oras matapos na matanggap nila ang sulat, upang magsumite ng kopya ng kanilang gagawing plano para agad na malutas ang kaguluhan sa RFID.

Nakasaad din sa sulat na hinihingan ang NLEX Corp. ng 72-oras pagkatanggap nito ng paliwanag kung bakit ang kanilang business permit ay hindi dapat suspendihin. Sinagot naman ng kumpanya kahapon, December 5, ang sulat na pinirmahan ng presidente at general manager na si J. Luigi Bautista, kung saan humihingi ito ng 15-araw upang matugunan ang hinihiling na ito ni Gatchalian.

Ayon kay Bautista, nagtalaga na sila ng grupo na magsusumite ng rekomendasyon para maisaayos ang problema sa RFID sa lungsod. Inimbitahan din ng kumpanya si Gatchalian sa isang structured observation at bibisita sa toll plazas sa NLEX kasama ang mga TRB representatives.

RFID system sa NLEX, binantaang sususpendihin

ni Thea Janica Teh | December 5, 2020

Binalaan ni Valenzuela City Mayor Rex Gatchalian na sususpendihin nito ang business permit ng North Luzon Expressway (NLEX) kung hindi nito aayusin ang RFID installation drive na nagdudulot ng traffic sa kanilang lugar.

Sa inilabas na sulat nitong Biyernes, sinabihan ni Gatchalian si Engr. Abraham Sales, ang executive director ng Toll Regulatory Board na nagdudulot ng malubhang traffic sa kanilang lugar ang isinasagawang RFID system.

Dagdag pa ni Gatchalian, kung walang permit ay hindi ito papayagang kumolekta ng toll. Aniya, “Remember, ang isang company na walang business permit or suspended ang business permit, ibig sabihin, hindi puwedeng magnegosyo o mag-collect sa city jurisdiction… makakadaan pero walang collection dapat.”

Bukod pa rito, nakakasama umano ang dulot na traffic sa peace and order and welfare na ipinalalaganap sa mga residente ng kanilang siyudad. Kaya naman, binigyan na ni Gatchalian ng 24-oras na deadline ang NLEX upang makagawa at makapagpasa ng action plan at 72 oras upang makapag-isip ng dahilan kung bakit hindi dapat suspendihin ang kanilang business permit.

Matatandaang inanunsiyo ng Metro Pacific Tollways Corp. na siyang nag-o-operate ng NLEX at SCTEX na magiging 100% cashless na ang pagbabayad sa toll sa pamamagitan ng RFID system simula ngayong Disyembre upang makaiwas sa pagkalat ng COVID-19.

Walang huli sa walang RFID – DOTr

ni Lolet Abania | November 24, 2020

Walang dapat na ikabahala ang publiko sa kanilang mga sasakyan na wala pang radio frequency identification (RFID) tags kahit pa umabot nang hanggang January 11, 2021, ayon sa Department of Transportation (DOTr).

Sa inilabas na advisory ngayong Martes, ayon sa DOTr, hindi dapat mangamba ang mga motorista dahil ang RFID installation sa mga toll lanes at booths ay mananatiling bukas 24/7 hanggang January 11, at kahit pa magpalit ng tollway system at maging isang fully-digital cashless system ito sa December.

"Wala pong mangyayaring hulihan mula December 1 hanggang January 11, 2021 para sa mga sasakyang walang RFID," ayon sa DOTr.

"Matapos ang January 11, hindi lahat ng lanes sa toll gate ay iko-convert bilang stickering lane. Magtatalaga na lamang ng isa o dalawang stickering lane, o kaya naman isang installation tent bago pumasok sa toll gate kung saan maaaring kabitan ng RFID ang mga sasakyan," paliwanag ng ahensiya.

Parehong ang Autosweep at Easytrip systems na gagamitin sa mga expressways na kumokonekta sa Metro Manila ay nakatakdang maging fully contactless sa December.

"Kung wala kang RFID by December 1, DOON KA MISMO SA TOLL GATE KAKABITAN. May nakaabang na RFID installation lanes ang mga toll gates, at may mga tauhan po ang toll operators na mag-a-assist sa pagkabit ng RFID stickers," dagdag pa ng DOTr.

Ang Autosweep tags ay inisyu ng San Miguel Group para sa Skyway, South Luzon Expressway (SLEx), STAR Tollway, Tarlac-Pangasinan-La Union Expressway (TPLEx), NAIA Expressway (NAIAx), at Muntinlupa-Cavite Expressway (MCX).

Ang Easytrip System naman ay para sa North Luzon Expressway (NLEx), Subic-Clark-Tarlac Expressway (SCTEx), Manila-Cavite Expressway (CAVITEx), C5 Southlink, at Cavite-Laguna Expressway (CALAX).