Rider, patay sa pila ng P5K ayuda

ni Jeff Tumbado @News | April 20, 2026

Nasawi ang isang motorcycle taxi rider habang nakapila para kumuha ng ayuda o cash assistance ng gobyerno sa Quezon Memorial Circle, sa Quezon City nitong Sabado.

Nabatid kay Department of Social Welfare and Development (DSWD) Secretary Rex Gatchalian na nakipag-ugnayan na ang mga tauhan ng ahensya sa pamilya ng biktima.

Dagdag pa ni Gatchalian na nakausap na nila ang anak ng nasawi at tiniyak na tutulungan ang pamilya sa maayos na pagpapalibing.

Sasagutin din ng DSWD ang iba pang pangangailangan ng pamilya, kabilang ang gastusin sa ospital, burol at libing, transportasyon ng mga kaanak mula probinsya, at maging ang patuloy na pag-aaral ng anak ng rider.

Personal ding binisita ni Gatchalian ang pamilya sa ospital kahapon ng umaga at tiniyak ang tulong ng pamahalaan.

Matatandaang dagsa ang mga motorcycle taxi at delivery riders na pumila sa Quezon Memorial Circle upang tumanggap ng tig-P5,000 cash relief mula sa DSWD, na ipinamamahagi bilang tulong sa gitna ng pagtaas ng presyo ng langis dulot ng giyera ng US-Israel at Iran.

Makikitang mahaba ang pila ng mga rider sa paligid ng Circle, habang ang ilan ay gumagamit ng karton upang pansangga sa matinding init ng araw.

Hinikayat naman ng DSWD ang mga benepisyaryo na personal na magtungo upang kunin ang ayuda, ngunit sinabi rin ng ahensya na planong ilipat sa digital system ang distribusyon ng tulong sa hinaharap upang maiwasan ang ganitong insidente.

Food stamp, ilalarga na sa Tondo

ni Mai Ancheta @News | July 16, 2023

Sisimulan na sa Martes, July 18, ang food stamp program ng gobyerno para sa mga pinakamahihirap na Pilipino.

Ayon kay Department of Social Welfare and Development (DSWD) Secretary Rex Gatchalian, gagawing pilot area ang Tondo, Maynila, kung saan 50 pamilya ang unang makikinabang sa food stamp program.

Tatagal aniya ng anim na buwan ang programa para sa tatlong libong pamilya na may buwanang kita na P8,000 pababa.

"Magki-kick off na tayo sa Tuesday. 'Yung pilot, gradual phasing, sisimulan natin sa 50 pamilya sa Tondo. The trial project will run for six months," ani Gatchalian.

Ang mga napiling benepisyaryo ay tatanggap ng tap card na may katapat na halaga, kung saan gagamitin ito sa accredited na grocery o tindahan para sa kanilang mga pangangailangan.

Pag-aaralan aniya ng kanyang ahensya sa loob ng dalawang buwan ang programa at kung magiging matagumpay ay dadagdagan ng hanggang 300,000 pamilyang benepisyaryo kada taon hanggang sa maabot ang target na isang milyong benepisyaryo.

Ang food stamp program ay ginagawa na sa maraming bansa para tulungan ang kanilang mga mahihirap na mamamayan.

Sinabi ni Gatchalian na nagbigay ng $ 3 million ang Asian Development Bank (ADB) bilang donasyon sa programa kasama na ang ibang development partners ng Pilipinas.

DSWD Sec. Rex Gatchalian, lusot na sa CA

ni Mylene Alfonso | May 17, 2023

Kinumpirma na ng makapangyarihang Commission on Appointments (CA) ang ad interim appointment ni Rex Gatchalian bilang kalihim ng Department of Social Welfare and Development (DSWD).

Sa dalawang oras na pagdinig ng panel ng CA, sinalubong si Gatchalian ng suporta at paunang pagbati mula sa mga kongresista at senador.

Kasama sa mga isyung sinagot ni Gatchalian ang tungkol sa patuloy na tulong para sa mga benepisyaryo ng 4Ps at mahihirap na pamilya.

Sumang-ayon din siya sa mga pag-aaral na ang Sustainable Livelihood Program (SLP) ay nagsisilbing "saklay" ng mga mahihirap at halos mahihirap na pamilya.

Kaugnay nito, humihingi rin si Gatchalian ng P27 na badyet per head para sa feeding program ng ahensya, mula sa kasalukuyang alokasyon na P21 per head.

Matatandaang itinalaga ni Pangulong Ferdinand Marcos, Jr. si Gatchalian bilang DSWD secretary matapos ma-bypass ng CA ang kumpirmasyon ng noo'y DSWD chief broadcaster na si Erwin Tulfo.

Kinumpirma rin kahapon ng CA ang ad interim appointment ng 50 matataas na opisyal ng Armed Forces of the Philippines.