Darleb, hinangaan ang husay sa Turf

ni Green Lantern @Renda at Latigo | August 09, 2023

Hinangaan ng mga karerista si Darleb dahil sa ipinakita nitong husay nang manalo sa naganap na PHILRACOM Rating Based Handicapping System na nilarga sa Metro Turf, Malvar sa Tanauan City, Batangas noong Linggo ng hapon.

Umarangkada sa largahan si Darleb upang hawakan ang unahan at manalo ng banderang tapos kontra anim na tigasing kabayo.

Kakukuha pa lang ni Darleb ng unahan ay kinapitan naman agad siya ni Hamlet pero makalipas ang ilang metro ng karera ay si War Cannon na ang bumuliglig sa una.

Nagbakbakan sa unahan sina Darleb at War Cannon na umabot hanggang sa pagsungaw ng rekta ang tagisan nila ng bilis subalit nanatili ang tikas ng winning horse at umalagwa ito sa huling 100 metro ng labanan.

Nirendahan ni jockey JPA Guce, tinawid ni Darleb ang meta ng may isang kabayo ang agwat sa pumangalawang si War Cannon, tumersero si Bombay Nights habang pumang-apat si Hamlet.

Inilista ni Darleb ang tiyempong 1:39 minuto sa 1,600 meter race sapat upang hamigin ng winning horse owner na si Aristeo Puyat ang P10,000 karagdagang premyo.

"Mahusay kahit napahirapan sa unahan ay hindi nagpatinag hanggang sa pagtawid sa finish line," saad ni Benny Villahermosa, veteran karerista.

Nagbigay ng dibidendong P23.00 kada limang pisong taya sa forecast sa kombinasyong Darleb/War Cannon, (3/6) kaya maagang naka-boundary ang mga tumamang mananaya.

Samantala, nagsaya ng todo ang mga karerista dahil mahaba-haba ang kanilang paglilibang noong Linggo.

May 10 races ang pinakawalan ng Metro Manila Turf Club Inc. (MMTCI) lahat ay suportado ng Philippine Racing Commission, (PHILRACOM).

Badboy MJ, inangkin ang panalo sa 3-YO

ni Green Lantern @Renda at Latigo | August 08, 2023

Napanood ng mga karerista ang galing ng Badboy MJ sa pista matapos nitong angkinin ang panalo sa katatapos na 2023 PHILRACOM 3-Year-Old Sprint Race na inilarga sa Metro Turf, Malvar - Tanauan City sa Batangas, Linggo ng hapon.

Humarurot sa largahan pero pumuwesto lang muna sa tersero ang Badboy MJ na sinakyan ni jockey PJA Guce habang nasa unahan nila ang nagbabakbakan na Sandigan at Borrowed Heaven.

Papalapit ng far turn ay kumuha ng segundo puwesto ang Badboy MJ at papasok ng huling kurbada ay nasa unahan na ang winning horse.

Hindi naman basta naupos si Sandigan kaya nagpumilit pa itong makadikit sa unahan subalit ayaw magpa-awat sa pag-arangkada ng Badboy MJ at nanalo ito ng may anim na kabayo ang distansiya.

Inirehistro ng Badboy MJ ang tiyempong :59 segundo sa 1,000 meter race sapat upang hamigin ng winning horse owner na si FB Dela Cruz ang P900,000 premyo.

Nasikwat ng segundong Sandigan ang P337,500, napunta naman sa 3rd at 4th placers na Light Bearer at Boat Buying ang P187,500 at P75,000 ayon sa pagkakasunod.

Naibulsa naman ng breeder ng nanalong kabayo ang P75,000 habang tig-P45,000 at P30,000 ang second at third sa event na suportado ng Philippine Racing Commission, (PHILRACOM).

Samantala, inihahanda ang Badboy MJ sa kanyang susunod na laban kaya tiyak na aabangan ito ng mga karerista.

Boat Buying, Borrowed Heaven at Badboy MJ, mabibilis

ni Green Lantern @Renda at Latigo | August 06, 2023

Bistadong matutulin sa largahan ang Boat Buying, Borrowed Heaven at Badboy MJ kaya asahang mapapahirapan ang mga karerista sa pagpili ng kanilang tatayaan sa magaganap na 2023 PHILRACOM 3-Year-Old Sprint Race na ilalarga sa Metro Turf, Malvar - Tanauan City, Batangas ngayong araw.

Ayon sa mga liyamadista, pagalingan na rin ang mga hinete sa pagdadala sa kanilang mga sasakyang kabayo sa distansiyang 1,000 meter race.

Rerendahan nina Kelvin Abobo at Pabs Cabalejo sina Boat Buying at Borrowed Heaven ayon sa pagkakasunod habang si PJ Guce ang gagabay kay Badboy MJ. Hindi naman nagpapadaig ang mga dehadista sa balitaktakan sa social media, ipinagmamalaki naman nila ang Sandigan na rerendahan ni star jockey Jeffril Tagulao Zarate.

Ikakalat sa unang apat na kabayong tatawid sa meta ang guaranteed prize na P1.5M, ang ibang kalahok ay ang Deus Ex Machina at Light Bearer. Masusungkit ng mananalong kabayo ang P900,000, mapupunta sa second placer ang P337, 500 habang tig- P187,500 at P75,000 ang 3rd at 4th.

Magbubulsa rin ang breeder ng winning horse ng P75,000 habang tig-P45,000 at P30,000 ang second at third.

Samantala, 10 races ang pakakawalan ng Metro Manila Turf Club Inc. (MMTCI) ngayong araw ng Linggo, mag-uumpisa ang karera sa ala-2 ng hapon.

Mga Pili ni Green Lantern:

Race 1 - Darleb (3), War Cannon (6)

Race 2 - Magtotobetsky/Robin Hood (4), Blackburn (1)

Race 3 - Sandigan (1), Boat Buying (2)

Race 4 - Sun dance (6), Lucky Lucy (4), Advocacy (9)

Race 5 - Civics Class (3), Righteous Ruby (1)

Race 6 - Static (7), Iron Hook (3), Todo Pong (6)

Race 7 - Magnifico (2), Good reason (4)

Race 8 - Auspicious (4), All For Gee (9), Awesome Cole (6), Enno Teresa Chair (8)

Race 9 - Eutychus (2), Central Bank (9), Gintong Hari (7)

Race 10 - Most Grateful (5), Tiger Boy (6), Chrome Bell (2)