Righteous Ruby tututukan sa Turf Memorial Cup

ni Green Lantern @Renda at Latigo | November 11, 2023

Paniguradong nakatutok ang ibang karerista kay Righteous Ruby sa ikakasang "Ambassador Eduardo M. Cojuangco Jr. Memorial Cup na ilalarga sa Metro Turf, Malvar sa Tanauan City, Batangas sa Nobyembre 19, (Linggo).

Gagabayan ni former Philippine Sportswriters Association, (PSA) - Jockey of the Year awardee Jonathan Basco Hernandez si Righteous Ruby sa distansiyang 2,000 meter race.

Nakalaan ang garantisadong premyo na P5-M., ang ibang kalahok ay sina Civics Class, In Thje Zone, Shastaloo, Speed Fantasy at Treasure Hunting na kagagaling lang sa panalo.

Posibleng magbigay ng magandang laban kay Righteous Ruby ay sina Civics Class at Treasure Hunting na nanalo lang nakaraan sa Special Invitational Race II ayon sa komento ng mga karerista.

Inaasahang itotodo ang paghahanda ng mga nagsaad ng paglahok dahil kukubrahin ng mananalong kabayo ang tumataginting na P3-M sa event na pagbibigay-pugay kay Eduardo Cojuangco.

Magbubulsa rin ng P1,125,000 ang second placer habang tig-P625,000 at P250,000 ang third at fourth ayon sa pagkakasunod.

Samantala, may mga balanseng regular races ang pakakawalan din ng Metro Manila Turf Club Inc. (MMTCI) sa araw mismo ng stakes race kaya tiyak na masisiyahan ang mga karerista sa kanilang paglilibang. Ang nasabing stakes race ay suportado ng Philippine Racing Commission, (PHILRACOM) ni Chairman Reli de Leon.

Rule The World at Kindra lalarga sa 3-YO Race

ni Green Lantern @Renda at Latigo | November 10, 2023

Makikipagtagisan ng bilis sa pista ang magka-kuwadrang Rule The World at Kindra sa ilalargang 3-Year-Old & Above Maiden Race na pakakawalan sa Metro Turf, Malvar, Tanauan City, Batangas ngayong araw.

May distansiyang 1,200 meter race, ang ibang kasali ay sina Sunrider, Tulong Geisdaw, Tanging Ikaw, B Fit And Fabulous at Maayo Kaayo. Gagabayan ni former Philippine Sportswriters Association, (PSA), Jockey of the Year awardee Patty Ramos Dilema si Rule The World habang si Mark Angelo Alvarez ang kay Kindra.

Ipamimigay ang P20,000 added prize para sa winning horse owner sa event na suportado ng Philippine Racing Commission, (PHILRACOM). Posibleng makakuha ng suporta sa mga karerista ang mga kalahok na Sunrider at Tulong Geisdaw kaya asahang magiging kalat ang bentahan sa takilya.

"May kahirapan sa pagpili ng tatayaan, bukod sa mga batang kabayo ay hindi pa masyadong kilala ang mga tatakbo," saad ni Willy Cabello, veteran karerista.

Samantala, may walong races ang pakakawalan ng Metro Manila Turf Club Inc. (MMTCI) ngayong araw ng Biyernes kaya paniguradong masaya ang paglilibang ng mga karerista.

Isa sa aabangan din ng mga karerista ay ang bakbakan ng limang kabayo sa PHILRACOM Rating Based Handicapping System na ikakasa sa unang karera.

Ang mga kasali ay sina Meet Me In Dcorner, Stolen Moment, Heavenly Star, Run Yumi Run at Gee's Song sa distansiyang 1,200 meter race.

Mga Pili ni Green Lantern:

Race 1 - Run Yumi Run (4), Heavenly Star (3)

Race 2 - Rule The World/Kindra (2/2A), Sunrider (1)

Race 3 - Coal Digger (1), Cat's Whiskers (5), Bucasgrande Island (6)

Race 4 - So Humble (3), Private Dinning (4), Viscerion (7)

Race 5 - Sunny Side (4), Double Time (7), Golden Buzzer (12), Noir (8)

Race 6 - You Never Know (2), Go Gee Go (4), Tokyo Tokyo Rumba (6)

Race 7 - Kalanggaman Island (5), Sinag (2), Golden Eight (1)

Race 8 - Yabadabadur (4), Corona (1), Regal (6), Laparoscopy (3)

Mimbalot Falls Champ sa Special Race Turf

ni Green Lantern @Renda at Latigo | November 8, 2023

Nakipaglutsahan sa unahan si Mimbalot Falls para sikwatin ang titulo sa Special Invitational Race I na pinakawalan sa Metro Turf, Malvar - Tanauan City, Batangas noong Linggo ng hapon.

Humarurot agad paglabas ng aparato sina Mimbalot Falls at Secretary para magtagisan ng bilis sa unahan, nasa terserong malayo naman si Deus Ex Machina habang si Prime Billing ay naantala ang paglabas kaya naiwan ito sa largahan.

Patuloy ang kapitan sa unahan nina Mimbalot Falls at Secretary, halos mag-ubusan sila ng hininga habang nasa tersero pa rin si Deus Ex Machina.

Pagdating ng far turn ay nagkapanabayan pa rin sina Mimbalot Falls at Secretary pero pagsungaw ng rektahan ay umungos ng tatlong kabayo ang winning horse.

Hindi na maawat sa pag-arangkada si Mimbalot Falls, lalo pa itong lumayo sa rektahan kaya naman magaan na tinawid nito ang meta ng may limang kabayo ang agwat sa pumangalawang si Secretary.

Inilista ng Mimbalot Falls ang tiyempong 1:25 minuto sa 1,400 meter race sapat upang hamigin ng winning horse owner na si PKT Uy ang P180,000 premyo.

Nakopo ng Secretary ang P67,500 habang inuwi ng terserong Deus Ex Machina ang P37,500 sa event na suportado ng Philippine Racing Commission, (PHILRACOM) ni Chairman Reli de Leon.

Samantala, inihahanda ng trainer na si ES Roxas si Mimbalot Falls para sa susunod nitong takbo sa pista.