Every Sweat Counts champ sa Juvenile Race

ni Green Lantern @Renda at Latigo | December 5, 2023

Kalmadong tinawid ni Every Sweat Counts ang finish line matapos angkinin ang korona sa Cool Summer Farm Juvenile Stakes race na inilarga sa Metro Turf, Malvar - Tanauan City, Batangas noong Linggo ng hapon.

Humarurot sa largahan si Every Sweat Counts upang sabayan sa unahan ang matulin sa alisan na Artsev, bigayan ang dalawa subalit sa papalapit ng far turn ay unti-unting kumakalas ang winning horse.

Kaya naman pagsapit ng huling kurbada ay nasa tatlong kabayo ang agwat ng Every Sweat Counts sa Artsev.

Patuloy ang pamamayagpag ni Every Sweat Counts, hindi nagbago ang puwestuhan sa rektahan at nanalo ito ng walong kabayo ang lamang sa pumangalawang Artsev, tumersero si Unli Burn.

Nirendahan ni jockey CL Advincula, inirehistro ni Every Sweat Counts ang tiyempong 1:26,4 minuto sa 1,400 meter race.

Hinamig ng connections ni Every Sweat Counts ang P600,000 premyo at napunta sa second placer na Artsev ang P300,000 habang P200,000 ang iniuwi ng pumangatlong si Unli Burn.

May walong karera ang pinakawalan ng Metro Manila Turf Club Inc. (MMTCI) kaya naging masaya ang mga karerista sa kanilang paglilibang.

Isa sa hinangaan din ng mga karerista ay ang panalo ni Uncle Vhines sa PHILRACOM Rating Based Handicapping System na pinakawalan sa pangatlong karera.

Crossing Bell, umigkas ang lakas sa 3-YO Race

ni Green Lantern @Renda at Latigo | November 30, 2023

Nakilatis ang tikas ni Crossing Bell matapos ang pahirapang pagtawid sa finish line nang manalo sa 3-Year-Old & Above Maiden race na pinakawalan sa Metro Turf, Malvar sa Tanauan City sa Batangas noong Martes ng hapon.

Mabilis na lumabas sa aparato si Crossing Bell subalit kinapitan siya ni Star Of India para hawakan ang unahan.

Lamang ng leeg si Star Of India kay Crosing Bell habang nag-uubusan ng lakas sa unahan at nagpatuloy ang tagisan nila ng bilis na parang ayaw magpaiwan sa isa't-isa.

Balikatan ang labanan nina Crossing Bell at Star Of India na umabot hanggang far turn at sa huling kurbada ay halos magkapantay ang dalawang nabanggit na kabayo.

Hindi pa rin naghiwalay sina Crossing Bell at Star Of India sa rektahan, nag-ubusan ng lakas ang dalawa kaya naman pagdating sa meta ay close finish ang isinigaw ng race caller.

Idineklarang nanalo ang Crossing Bell na sinakyan ni Mark Angelo Alvarez makalipas ang ilang minuto.

Inilista ng Crossing Bell ang tiyempong 1:14.6 minuto sa 1,200 meter race sapat upang hamigin ng Bell Racing Stable ang P20,000 added prize.

Samantala, pitong races ang inilarga ng Metro Manila Turf Club Inc. (MMTCI) noong Martes, lahat ay suportado ng Philippine Racing Commission, (PHILRACOM) ni Chairman Reli de Leon.

The Kiss nagwagi sa 28th MARHO C'Ships

ni Green Lantern @Renda at Latigo | November 25, 2023

Hindi pinaporma ni The Kiss ang mga nakatunggali matapos manalo sa 28th MARHO Breeders' Championship - 2-Year-Old Juvenile Fillies na inilarga sa Metro Turf, Malvar - Tanauan City, Batangas, noong Linggo ng hapon.

Nakitaan ng magandang diskarte si former Philippine Sporstwriters Association, (PSA) - Jockey of the Year awardee Patricio Ramos Dilema matapos nitong ipuwesto si The Kiss sa segundo sa largahan at hayaang makalayo ng bahagya ang matulin na Victorious Angel.

Pagdating ng half mile ay saka nilapitan ni The Kiss si Victorious Angel kaya naman pagsapit ng far turn ay naagaw ng winning horse ang bandera.

Sa huling 200 metro sa rektahan ay bumibibo na sa unahan si The Kiss kaya naman tinawid nito ang finish line ng may tatlong kabayo ang agwat sa pumangalawang si Maid For Trouppei.

Inilista ni The Kiss ang tiyempong 1:28.4 sa 1,400 meter race sapat upang hamigin ng winning horse owner na si M.V. Tirona ang P600,000 premyo.

"May magandang hinaharap si The Kiss, tingin ko magiging champion horse yan," saad ni Johnny Del Castillo, veteran karerista.

Nasikwat ni Maid For Trouppei ang second place prize na P225,000 habang ang third placer na Over Azooming ay nag-uwi ng P125,000 sa event na suportado ng Philippine Racing Commission, (PHILRACOM).

Samantala, hinahanda si The Kiss sa susunod niyang sasalihang stakes race kaya aabangan ito ng kanyang mga tagahanga.