Speed Fantasy umariba sa PHILRACOM Rating

ni Green Lantern @Renda at Latigo | December 11, 2023

Kumaripas sa rektahan si Speed Fantasy upang sikwatin ang panalo sa PHILRACOM Rating Based Handicapping System na inilarga sa Metro Turf, Malvar - Tanauan City, Batangas noong Sabado ng hapon.

Kalmadong lumabas ng aparato si Speed Fantasy na nirendahan ni jockey Pabs Cabalejo, pumuwesto sa pang-apat upang panoorin ang nagbabakbakan sa unahan na Palauig at Platinum Frolic habang nasa tersero ang Euroclydon.

Sa kalagitnaan ng karera ay kumuha na ng tersero puwesto si Speed Fantasy kaya papalapit ng home turn ay nasa pangalawa na ito. Dikitan ang naging labanan sa rektahan pero sa huling 150 metro ng karera ay nakaungos na ang Speed Fantasy at tinawid nito ang meta ng may tatlong kabayo ang agwat sa pumangalawang si Cat Bell.

Inilista ni Speed Fantasy ang tiyempong 1:24.6 minuto sa 1,400 meter race sapat upang hamigin ang added prize na P10,000 ng winning horse owner na si Paolo Mendoza. "Magaling ang ipinakitang takbo ni Speed Fantasy, tingin ko kahit sa mas mahabang distansya kaya niyang manalo," saad ni Jeffrey Villahermosa, veteran karerista.

Terserong dumating sa finish line si Euroclydon habang pumang-apat si Palauig na sinakyan ni former Philippine Sportswriters Association, (PSA) - Jockey-of-the-Year awardee Patricio Ramos Dilema.

May P4,000 naman ang nasungkit ng breeder ng Speed Fantasy sa event na suportado ng Philippine Racing Commission, (PHILRACOM) ni Chairman Reli de Leon. 

Samantala, atat na ang mga karerista na maglabas ang PHILRACOM ng opisyal na lineup na kasali sa Presidential Gold Cup championship race sa Disyembre 17 sa parehong lugar. 

Boss Emong, mang-aagaw ng titulo kay Big Lagoon

ni Green Lantern @Renda at Latigo | December 7, 2023

Pakay ni Boss Emong na agawin ang titulo na hawak ng defending champion Big Lagoon pagharap nila sa 2023 PCSO Presidential Gold Cup na ilalarga sa Metro Turf, Malvar - Tanauan City sa Batangas sa Disyembre 17.

Makikipagkampihan si Boss Emong kay Sophisticated upang masungkit ang inaasam na korona sa presitihiyosong karera ng taon kung saan ay may P10-M na ikakalat sa unang anim na kabayong tatawid sa meta.

Ang ibang nagdeklara ng paglahok ay si Ambisioso, Don Julio, Enigma Uno, Istulen Ola, Magtotobetsky at War Cannon sa distansiyang 2,000 meter race.

Sasakyan ni star jockey Jeffril Tagulao Zarate si Boss Emong habang si Claro S. Pare ang gagabay sa ka-kuwadrang Sophisticated para harapin ang pinapaborang Big Lagoon na rerendahan naman ni John Paul Guce.

Paniguradong magiging mainitan ang bakbakan dahil sa P6-M na nakalaan na premyo sa mananalong kabayo sa inisponsoran ng Philippine Charity Sweepstakes Office, (PCSO).

Susungkitin ng second placer ang P2-M, P1-M ang mapupunta sa pangatlong puwesto habang tig-P500,000, P300,000 at P200,000 ang fourth hanggang sixth ayon sa pagkakahilera.

Tatanggap naman ang breeder ng winning horse ng P500, 000, tig-P300,000 at P200,000 ang second at third sa event na suportado ng Philippine Racing Commission, (PHILRACOM) ni Chairman Reli de Leon.

Samantala, maliban sa nabanggit na stakes race, inaasahang maglalarga ang Metro Manila Turf Club Inc. (MMTCI) ng mga balanseng karera sa mismong araw ng laban sa PGC championship.

Always Impressive nakabibilib sa Aids Month

ni Green Lantern @Renda at Latigo | December 6, 2023

Bumilib ang mga karerista sa ipinakitang performance ni Always Impressive matapos manalo sa "National Aids Awarness Month" 3-Year-Old & Above Maiden Race na inilarga sa Metro Turf, Malvar - Tanauan City, Batangas noong Linggo ng hapon.

Hinawakan agad ni Always Impressive ang unahan paglabas ng aparato habang nasa pangalawang puwesto na may tatlong kabayo ang agwat na si Maayo Kaayo.

Naka-puwesto sa pangatlo si Beautiful Day pero humahangos si Hellguy para habulin ang namamayagpag sa unahan na Always Impressive.

Hindi naman pinansin ni Always Impressive ang pagremate ni Hellguy, nagpatuloy sa pag-arangkada kaya naman tinawid nito ang meta ng may siyam na kabayo ang bentahe sa katunggali.

Tersero si Beautiful Day habang pang-apat ang Maayo Kaayo sa event na suportado ng Philippine Racing Commission, (PHILRACOM) ni Chairman Reli de Leon.

Nirendahan ni jockey Jomer Estorque, inirehistro ng Always Impressive ang 1:26.6 sa 1,400 meter race sapat upang hamigin ng winning horse owner na si Sandy Javier ang P20,000 added prize.

Dahil sa panalo, nagsaya ang mga liyamadista at mga nag- single bet sa unang Pick 5, para sa kanila ay nakatipid sila sa puhunan.

Samantala, walong races ang pinakawalan ng Metro Manila Turf Club Inc. (MMTCI) noong Linggo kaya medyo masaya ang mga karerista sa kanilang paglilibang.