Nagkakatawaran pa — Sen. Tulfo.. Raid sa mga POGO hub, ginagawang gatasan

ni Mylene Alfonso @News | July 11, 2023

Tinawag ni Sen. Raffy Tulfo na moro-moro at hao-xiao ang raid ng mga awtoridad sa Philippine Offshore Gaming Operation facility sa Las Piñas City noong Hunyo 27, kung saan 2,714 ang na-rescue kabilang ang mga Pilipino at banyaga.

Ayon kay Tulfo, 13 araw na ang nakalipas ngunit hindi pa rin malinaw ang imbestigasyong ginagawa ng mga pulis tungkol sa POGO-related crimes at mga taong nasa likod nito.

Kaya naghain ng resolusyon si Tulfo upang imbestigahan ang nasabing raid at mapanagot ang lahat ng mga tao sa likod ng POGO-related illegal activities.

Mula umano sa isang reliable source ni Tulfo sa Camp Crame, ginagawang tila gatasan lang ng raiding team ang mga banyagang nahuli at hinuhuthutan ng pera bago pakawalan.

Nagkakatawaran pa aniya bago matubos ang mga nahuling foreigner kung saan aabot sa P250,000 para pakawalan ang isang Chinese national at P50,000 sa Vietnamese national at mas malaki pa kung mas mataas pa ang ranggo.

Kinuwestiyon din ang ginawa ng mga awtoridad na basta na lamang pinalaya ang lahat ng Pilipinong nahuli kahit walang maayos na imbestigasyon kung sila ay sangkot sa krimen, tulad ng human trafficking at love scam.

Sangla-ATM, ipagbawal — Tulfo

ni Mylene Alfonso | March 1, 2023

Dapat nang ipagbawal ng gobyerno ang modus ng ilang kumpanya na nagpa-pautang na may ‘sangla-ATM card’ modus.

Ayon kay Senador Raffy Tulfo, marami sa biktima ng naturang modus ay mga pensioner ng Social Security System (SSS) at Government Service Insurance System (GSIS).

“We must look if there is a need to regulate the use of the pension Automatic Teller Machine (ATM) card as collateral in the Sangla-ATM system. At the moment,there is no prohibition or regulation governing these Sangla-ATM transactions,” wika ni Tulfo.

“I am looking into proposing the prohibition or regulation of the use of Social Security System (SSS) and Government Service Insurance System (GSIS) pension ATMs as collateral and provide corresponding penalties,” aniya pa.

Sa kabila na aminado ang baguhang senador na pinapatulan ang mga ganitong istilo dahil sa labis na pangangailangan sa pera.

Ngayon wala aniyang batas na nagbabawal sa paggamit ng ATM card bilang collateral sa utang. Diin ni Tulfo kung may batas ay mapaparusahan na ang mga gumagamit ng ga-

nitong modus.

Nagpahayag naman ng suporta si Majority Leader Joel Villanueva kaugnay sa nais ni Tulfo sa katuwiran na mga nasa marginalized sector, tulad ng indigent senior citizens ang nabibiktima ng mga mapang-abusong kumpanya.

Iwas-aksidente, bawas-trapik.. Mandatory timer sa lahat ng traffic lights

ni Mylene Alfonso | February 16, 2023

Nais ni Senador Raffy Tulfo na gawing mandato ang paglalagay ng mga timer sa lahat ng traffic lights upang makatulong sa kaligtasan sa mga kalsada at mabawasan ang pagsisikip ng daloy ng trapiko.

Sa kanyang inihaing Senate Bill No. 1873 o kilala sa “Traffic Light Timer Act”, sinabi ni Tulfo ang kahalagahan ng mga traffic light timer upang i-regulate ang daloy ng mga sasakyan at ang mga pedestrians sa mga interseksyon na lugar.

Sa sandaling maging ganap na batas, oobligahin ang Department of Transportation na magtalaga ng mga timer sa lahat ng traffic lights sa siyudad sa loob ng dalawang taon mula nang magkabisa ang naturang panukala.

Iminungkahi rin sa panukala ang multa mula P50,000 hanggang P100,000 sa sinumang tao, entity o local government unit kada traffic light na walang functioning timer.