43 residente, positive sa COVID-19, dormitoryo sa Kyusi, ini-lockdown

ni Lolet Abania | March 18, 2021

Isang dormitoryo sa Quezon City na ginamit ng manning agency ang isinailalim sa special-concern lockdown matapos magpositibo sa COVID-19 test ang 43 residente nito.

Sa inisyal na report, anim na residente lamang na nasa Barangay Roxas District dormitory ang nagpositibo sa test sa coronavirus. Subalit nang magsagawa ang Quezon City health officials ng test sa lahat ng 130 dorm residents, lumabas na 36 na iba pa ang positive sa virus.

"Kung nagsabi sila agad sa atin, naipa-monitor agad natin ang mga tao doon, na bigyan sila ng karapatang paggagamot at saka ‘yung quarantine, nagawa natin agad," ani Bgy. Chairman Dr. Carmela Gotladera. "Ang dating, parang no intention of reporting," dagdag ng kapitana.

Gayunman, ang mga nadiskubreng bagong COVID-19 cases ay mga asymptomatic at nananatiling naka-quarantine sa dormitory. Ang mga nagpakita naman ng sintomas ay nai-transfer na sa quarantine facilities.

Habang naghihintay ang ibang residente ng resulta ng kanilang COVID-19 tests, pinag-aaralan na ng mga opisyal na palawigin ang lockdown sa dormitoryo hanggang 14 na araw.

"This could have been avoided kung nagpa-follow sila ng minimum health protocol na ipinapasunod sa ating lahat," ani QC Epidemiology and Surveillance Unit head na si Dr. Rolly Cruz.

"So, obviously, meron silang kapabayaan sa kanilang ginagawang set-up sa kanilang agency," dagdag ni Cruz.

Wala namang ibinigay na pahayag at komento ang manning agency.

Mga empleyado, nagka-Covid, DSWD isasara

ni Lolet Abania | March 18, 2021

Isasailalim sa lockdown ang opisina ng Department of Social Welfare and Development (DWSD) sa Quezon City simula bukas (March 19) hanggang Linggo (March 21) dahil maraming mga empleyado nito ang nagpositibo sa test sa COVID-19.

Ipatutupad ang tatlong araw na lockdown upang magbigay-daan sa gagawing disinfection procedures sa lahat ng lugar sa loob ng DSWD compound.

Magbubukas naman ang kanilang opisina sa Lunes, March 22 habang ipatutupad na lamang ang 50% workforce.

Gayunman, patuloy na magkakaroon ng work-from-home arrangement sa mga empleyado.

Lahat din ng mga empleyado ay isasailalim sa anti-gen test bilang pagtugon ng ahensiya sa paglaban sa COVID-19 infections.

Kolorum at pasaway sa health protocols, huli sa checkpoint

ni Mary Gutierrez Almirañez | March 16, 2021

Dalawampu’t tatlo ang checkpoints na inilatag ng Quezon City Police District sa iba't ibang lugar ng lungsod simula kahapon, Marso 15, para manita ng mga motorista na lumalabag sa health protocol at upang masiguro na hindi kolorum o ilegal ang ilang sasakyan.

Ayon sa ulat, kabilang sa nilatagan ng checkpoint ang San Mateo-Batasan Road kung saan hindi na kukunin ang body temperature ngunit patuloy pa ring tinitingnan sa bawat pampublikong sasakyan kung nakakasunod sa minimum health standard ang mga pasahero katulad ng pagsusuot ng face mask, face shield at social distancing.

Kaugnay nito, nagsagawa rin ng special operations ang Inter-Agency Council for Traffic (I-ACT) sa Taft Avenue sa tabi ng Manila City Hall, kung saan 5 vans ang hinuli sapagkat walang maipakitang mga papeles ang drayber at ang iba nama’y expired na ang permit bilang UV Express.

May ilan ding nahuli dahil magnetic sticker lang ang idinikit sa sasakyan sa halip na pintura kaya puwede umanong gamitin 'yun bilang private car.

Ang mga nahuling sasakyan ay ii-impound sa Pampanga kung saan kailangang magbayad ng P200,000 para makuha ng may-ari. Maliban sa kolorum vans ay mahigit 50 pampublikong jeep at motorsiklo rin ang natikitan dahil sa iba't ibang violations.