Community pantries, hihigpitan bago mamigay ng pagkain

ni Mary Gutierrez Almirañez | April 24, 2021

Nagpatupad na ng guidelines ang lokal na pamahalaan ng Quezon City hinggil sa mga dinarayong community pantries sa iba’t ibang lugar sa lungsod. Ito'y upang maiwasan ang hawahan ng COVID-19.

Ayon sa inilabas na memorandum ng lungsod, kailangang makipag-coordinate muna ang organizer sa barangay para mabigyan sila ng written notice. Nakasaad sa notice ang pangalan ng responsable sa pantry at ang magiging lokasyon nito.

Kailangan ding sumunod sa health protocols ang mga staff ng pantry, partikular na ang ‘no face mask, no service’ policy.' Mahigpit ding oobserbahan ang one-meter distance o social distancing.

Lilimitahan din mula alas-5 nang madaling-araw hanggang alas-8 nang gabi ang operasyon ng pantry. Higit sa lahat, dapat ay sariwa at malayo pa sa expiration date ang mga ihahandang pagkain.

Ang mga nabanggit na guidelines ay mula sa napagmitingan ng bawat departamento sa Kyusi kasama si Maginhawa Community Pantry Organizer Anna Patricia Non.

Paliwanag pa ni Mayor Joy Belmonte, "While reiterating the city’s full support for such endeavors that promote the spirit of 'bayanihan' to overcome difficulties due to the COVID-19 pandemic... Law enforcement shall refrain from intervening except in cases of manifest breach of health or safety protocols."

Sumang-ayon naman si Department of the Interior and Local Government (DILG) Undersecretary Martin Diño sa pagpapatupad ng koordinasyon sa pagitan ng organizer at barangay upang maiwasan ang mahabang pila, katulad ng nangyari sa inorganisang community pantry ng aktres na si Angel Locsin, kung saan isang senior citizen ang namatay.

“Dahil talagang maraming nangangailangan lalung-lalo na ‘pag nai-announce mo 'yan, meron mang stub o wala, talagang magpupuntahan at magbabaka-sakali. Kung nand'yan ang ating mga barangay tanod, tapos meron tayo sa Quezon City na Task Force Disiplina, papauwiin na natin 'yung hindi talaga mabibigyan,” giit pa ni Diño.

Angel Locsin, todo-sorry sa pamilya ng senior na namatay sa community pantry

ni Ronalyn Seminiano Reonico | April 23, 2021

Kinumpirma ni Angel Locsin ang balitang may namatay na senior citizen habang nakapila sa binuksan niyang community pantry sa Quezon City ngayong Biyernes at humingi rin ng paumanhin ang aktres sa insidente.

Post ni Angel sa kanyang Instagram account, “Sa tingin ko, tama lang po na sa akin ninyo na marinig na totoo po ang balita na may inatake at namatay habang nasa pila ng community pantry. Senior citizen po siya na pumila raw po nang 3 AM at may nakainitan sa pila.”

Kinilala ng station commander ng Holy Spirit Police Station na si Lt. Jeffrey Bilaro ang naturang senior citizen na si Rolando dela Cruz, 67-anyos at residente rin ng naturang barangay.

Hindi pa malinaw ang sanhi ng pagkamatay ni Dela Cruz.

Ayon naman kay Angel, pinuntahan niya sa ospital ang pamilya ni Dela Cruz at personal siyang humingi ng tawad sa nangyari.

Aniya pa, “Bago po ang lahat, humihingi po ako ng tawad sa pamilya. Kanina po, pinuntahan at nakapag-usap po kami nang personal ng mga anak n’ya sa ospital.

“Habang buhay po akong hihingi ng patawad sa kanila.”

Ayon kay Angel, masipag na ama si Dela Cruz at nagtitinda ng balut. Saad pa ng aktres, “Si tatay po ay isang masipag na ama na nagtitinda ng balut. Hindi ko man po siya nakilala, pero sa pagkakakilala ko sa mga anak niya ay mabuti po siyang ama at maayos niyang napalaki ang mga anak niya.”

Dahil sa dami ng mga senior citizens na nagpunta sa community pantry ng aktres ay nagtayo sila ng fast lane na tent na may mga upuan.

Aniya pa, “Pero hindi naman po ibig sabihin na ini-encourage po namin ang mga seniors na lumabas at alam po natin na bawal po according sa IATF rules.”

Hindi nilinaw ni Angel kung muli pa bang bubuksan ang kanyang community pantry ngunit aniya, “Pagkatapos po, ido-donate na lang po namin ang mga natitirang goods sa ibang community pantries at barangay.

“Ang nangyari po ay akin pong pagkakamali. Sana po’y ‘wag madamay ang ibang community pantries na maganda po ang nangyari.”

Ayon din kay Angel ay tutulungan niya ang pamilya ni Dela Cruz. Saad pa ng aktres, “Sa ngayon po, I will prioritize helping the family and I will make it my responsibility to help them get through this.

“I am very, very sorry."

Angel, nag-sorry sa 'di nabigyan sa community pantry

ni Ronalyn Seminiano Reonico | April 23, 2021

Humingi ng paumanhin ang aktres na si Angel Locsin sa mga naabala ng binuksan niyang community pantry sa Quezon City matapos itong dagsain ng mga tao at hindi nasunod ang ilang health protocols.

Una nang inianunsiyo ni Angel na magbubukas ang community pantry nang alas-10 nang umaga ngunit aniya ay maaga silang nagbukas dahil sa dami ng mga tao.

Pahayag ni Angel, “Dapat po, magsisimula ang pagbubukas ng community pantry nang alas-10 nang umaga, pero nu’ng dumating kami nang 7 AM dito, nakita po namin na mahaba na po ‘yung pila. So, nagmadali po kami na mag-load ng mga gulay, kasi kinuha pa po namin ‘yun sa bagsakan.

“Dapat, ‘yung alas-10 namin na pagbubukas, nag-open po kami ng mga alas-8 pasado po at nagsimula naman po kami na maayos naman po.”

Ayon din sa aktres ay sinusunod ng mga nakapila ang social distancing at nagpamigay din umano sila ng mga stubs at listahan ng mga maaaring orderin upang mas mapabilis ang pila.

Ngunit saad ni Angel, “Then, parang habang ini-interview po ‘yung mga task force, parang ‘yung mga wala pong stubs, ang pagkakakuwento po sa akin… kasi busy po ako, nagbibigay po ako ng goods, eh… parang ‘yung mga walang stubs, sumingit sa pila.

“Naiintindihan ko naman po kasi kanina pa rin po sila naghihintay pero ‘yun po talaga ang dahilan kung bakit nagsiksikan. Pero nag-umpisa po kami na maayos po talaga.”

Aniya ay naglagay din sila ng mga markers upang masigurong nasusunod ang social distancing ng mga nakapila. Nagpatulong din umano sila sa munisipyo at barangay upang maging maayos ang sistema.

Saad pa ni Angel, “Nagpatulong din po kami sa munisipyo na mabilis din naman po ang pagtugon… sa aming barangay din po. May mga pumunta rin po ritong mga pulis saka military na tumulong din naman po, pero hindi lang po nila talaga makontrol ‘yung mga tao.”

Aniya pa, “Hindi po ito ang gusto ko. Nagsimula po kami na maayos po ang aming layunin. Pati po ang aming pagpaplano ng social distancing. Nagkataon lang po talaga na siguro, gutom lang po talaga ‘yung tao na kahit wala po sa pila, sumingit na po sila.”

Humingi rin ng dispensa si Angel sa insidente.

Aniya, “Sa mga nagambala ko po rito, pasensiya na po. Hindi po talaga ito ang intensiyon ko. Kahit ano’ng paghahanda naman po natin para ma-avoid ‘yung mga ganitong gulo, hindi lang po talaga siya makontrol kahit na nandito na po ‘yung munisipyo, military, pulis, barangay… lahat po nandirito na po. Hindi lang po talaga namin makontrol.”

Saad pa ni Angel, “Sa mga hindi po nabigyan, hindi po mabibigyan today, nais ko lang pong magsabi ng pasensiya po, gustuhin ko man pong mag-abot, I don’t think papayagan po ako ulit na gawin ‘to.”

Plano ni Angel na ipahatid na lamang sa mga hindi mabibigyan ang mga matitirang goods upang mapakinabangan pa.

Sa huli, muling humingi ng paumanhin si Angel at aniya ay nais lamang niyang ipagdiwang ang kanyang kaarawan sa pamamagitan ng pagtulong sa kapwa at hindi upang makagulo.