Zambales at Davao, niyanig ng lindol

ni Mary Gutierrez Almirañez | May 23, 2021

Niyanig ng magnitude 5.2 na lindol ang Zambales pasado 12:41 nang hapon, batay sa tala ng Philippine Institute of Volcanology and Seismology (PHIVOLCS) ngayong araw, May 23.

Ayon sa ulat, namataan ang tectonic origin at episentro ng lindol sa 14.73°N, 119.25°E - 094 km S 75° W ng San Antonio, Zambales.

Nagdulot ang lindol ng halos 2 metrong lalim sa kalupaan, kung saan magpahanggang sa Quezon City ay naramdaman din ang ugong.

Kaugnay nito, niyanig din ng magnitude 5.5 na lindol ang Davao Occidental kaninang umaga.

Sa ngayon ay walang iniulat na pinsala.

Gayunman, nakaantabay naman ang mga awtoridad sa posibleng aftershocks.

Toni Fowler, dinumog ng fans, protocols nalabag

ni Mary Gutierrez Almirañez | May 19, 2021

Dinumog ng fans ang ‘meet and greet’ ng vlogger na si Toni Fowler sa Cubao, Quezon City kagabi, kung saan iniulat na hindi nasunod ang social distancing at iba pang health protocols laban sa COVID-19.

Paliwanag naman niya, “Nagpa-reserve po kami para sa 50 tao lang, maximum. Hindi po namin expected na dadami ‘yung mga tao sa labas."

Gayunman, hindi pa rin nakalusot ang kanyang paliwanag, sapagkat lagpas pa rin iyon sa 10 indibidwal na ipinatutupad sa ilalim ng guidelines ng Quezon City Task Force Disiplina at Inter-Agency Task Force (IATF).

Aminado naman si Fowler na hindi siya nakipag-ugnayan sa mga otoridad hinggil sa pagdaraos ng event.

Sa ngayon ay humihingi siya ng paumanhin at sinabing handa niyang bayaran ang multa na ipapataw sa kanya.

Higit P15-M ecstasy, buking dahil sa x-ray result

ni Ronalyn Seminiano Reonico | May 13, 2021

Nasabat ng awtoridad ang mahigit P15-million halaga ng hinihinalang ecstasy tablets sa Central Post Office, Quezon City noong Martes nang hapon.

Sa pagtutulungan ng Bureau of Customs NAIA, Philippine Drug Enforcement Agency (PDEA), at NAIA Inter-Agency Drug Interdiction Task Group (NAIA-IADITG), nakumpiska ang 9,243 ecstasy tablets o party drugs na nakalagay sa tatlong parcels na may label na “baby clothes,” “handbag and shoes,” at “clothes”.

Inaresto ng awtoridad ang claimant ng naturang parcel na sina Michael De Guzman at Rowena Canapit. Si Canapit ay authorized representative ng consignee na si Glory Joy Buzeta.

Ayon sa record, sina Agner Buzeta at Victor Martis ang nag-ship ng mga produkto mula sa Netherlands.

Nadiskubre ang ecstasy tablets dahil sa kahina-hinalang resulta ng x-ray sa mga parcels kung kaya’t nagsagawa ng 100% physical examination ang awtoridad.

Pahayag naman ng Bureau of Customs (BOC), “The said discovery and seizure of illegal drugs were promptly coordinated with the Philippine Drug Enforcement Agency (PDEA) for the conduct of controlled delivery operation against the consignee and other responsible individuals for possible prosecution for violation of the Comprehensive Dangerous Drugs Act of 2002 in relation to Section 1401 of the Customs Modernization and Tariff Act.”