Mga plastik na kutsara, tinidor at iba pa, bawal na ulit sa Quezon City

ni Lolet Abania | July 1, 2021

Muling ipapatupad ng gobyerno ng Quezon City ang pababawal sa single-use na mga plastik at iba pang disposables.

Batay sa City Ordinance No. 2876-2019, lahat ng hotels at restaurants sa Quezon City ay hindi na papayagang mamigay para sa kanilang dine-in customers ng mga disposables simula sa Huwebes, July 1, 2021.

Kabilang sa ipinagbabawal ay plastik na kutsara at tinidor, kutsilyo, plastic/paper cups, plato, plastik/paper straws, coffee stirrers, soap sachets, shampoo sachets, condiment cups na may lids, ketchup/soy sauce packets, at ibang katulad na plastik at disposable materials.

Nasa nakasaad na anunsiyo ng Quezon City government na kanilang nai-post sa social media, ang mga hindi susunod sa ordinansa ay maaaring mapatawan ng penalties na 1st offense: P1,000 fine; 2nd offense: P3,000 fine at revocation ng environmental clearance at issuance ng cease and desist order; 3rd offense: P5,000 fine at revocation ng business permit at issuance ng closure order.

Matatandaang ibinalik ng QC government ang pagbabawal ng paggamit ng mga plastic bags nitong Marso matapos na pansamantalang i-lift ito noong May, 2020 sa pamamagitan ng pag-isyu ng Localized Guidelines ng lungsod para sa Modified Enhanced Community Quarantine (MECQ).

Pulis na namaril sa 52-anyos na ginang, sinibak na!

ni Lolet Abania | June 24, 2021

Pirmado na ni Philippine National Police (PNP) chief Police General Guillermo Eleazar ang dismissal order ng pulis na nahuli sa video ng pagbaril sa isang 52-anyos na ginang na ikinamatay nito sa Quezon City noong May 31.

Sa isang statement, sinabi ni Eleazar na titiyakin ng PNP na masusunod ang mga proseso para sa summary dismissal proceedings upang maiwasan ang mga technicalities na maaaring mag-reinstate sa akusadong police officer sa kanilang organisasyon.

“Today, I signed the dismissal order of Police Master Sergeant Hensie Zinampan who was found guilty of Grave Misconduct and Conduct Unbecoming of a Police Officer,” ani Eleazar.

Una rito, nag-waive si Zinampan na magsumite ng isang counter-affidavit para sa naihaing administrative case.

Ayon kay Eleazar, si Zinampan ay kasalukuyang nakadetine habang kinakaharap ang kasong pagpatay.

Ipinunto ng PNP chief na ang pagkakasibak kay Zinampan ay pagpapakita lamang na hindi kinukunsinte ng PNP ang mga mapang-abuso at masamang gawain ng kanilang personnel, habang nagpapatunay ito na nananatili ang mekanismo ng disiplina sa kanilang hanay.

“Let this incident be a warning to all PNP personnel that I will not tolerate wrongdoings in our beloved organization, and a constant reminder for each and everyone of us to live up to what the three important and meaningful words in the PNP Seal — Service, Honor and Justice,” sabi ni Eleazar.

Matatandaang noong May 31, ang biktimang si Lilibeth Valdez ay nasa isang tindahan nang lapitan ng lasing umano na pulis, hinila ang buhok at pinaputukan ng baril sa leeg.

Bago ang insidente, ang anak ng biktima at ang police officer ay nagkaroon ng suntukan.

Una nang itinanggi ni Zinampan ang pagpatay sa biktima kahit pa kitang-kita sa video ang nangyaring insidente ng pamamaril.

Panggabing turukan ng Covid vaccine, sinimulan na

ni Ronalyn Seminiano Reonico | June 17, 2021

Naglunsad ang pamahalaan ng Quezon City ng panggabing COVID-19 vaccination services para sa mga manggagawang hindi magawang lumiban sa trabaho sa umaga.

Saad pa ng QC local government unit, “Layon nitong mabakunahan ang mga essential workers na hindi makapagliban sa kanilang trabaho sa umaga, lalo na ang mga no work-no pay personnel.”

Alas-6 nang gabi nagsisimula ang pagbabakuna hanggang 10 PM.

Umabot na rin umano sa 2,000 pre-registered essential workers na kabilang sa A4 priority group ang nabakunahan na sa Quezon City Hall Grounds kagabi.

Saad pa ni QC Mayor Joy Belmonte, "Ngayon, hindi na nila kailangang mamili kung arawang kita ba muna o bakuna. We will inoculate them at a time most convenient to them.”