Nahahawa sa matatanda… 318 bata sa Kyusi, may COVID

ni Lolet Abania | August 13, 2021

Halos apat na beses ang itinaas ng bilang ng mga batang tinamaan ng COVID-19 sa Quezon City sa loob lamang ng isang buwan, matapos na makapagtala ng 318 menor-de-edad na infected ng virus mula nu'ng Agosto 1 hanggang 7.

Batay sa datos ng City Epidemiology and Disease Surveillance Unit (CESU), lumabas na 169 kabataan na nasa 0 hanggang 11-anyos ang infected ng COVID-19, habang 149 bata naman na nasa edad 12 hanggang 17 ay nakuha rin ang virus na ang ibig sabihin, siyam na porsiyento ng kabuuang kaso ng lungsod sa pareho ring panahon ay mga bata.

Ayon sa lokal na pamahalaan ng Quezon City, ang pinakabagong kabuuang bilang ng COVID-19 cases ng mga kabataan ay 293 percent na mas mataas kumpara noong nakaraang buwan, kung saan mula Hulyo 1 hanggang 7 ay 81 bata lamang ang nagpositibo sa virus.

Ayon kay CESU chief Dr. Rolando Cruz, “One factor that causes these infections… could be the improper way by which COVID-19 positive adults quarantine themselves.” Sinabi rin ni Cruz na ang ilang matatanda raw kasi ay nananatili sa bahay kahit pa kinakitaan na ng sintomas ng COVID-19, bukod sa ang iba ay “(They) Do not self-report to CESU.”

Una nang nag-isyu ang local government ng lungsod ng guidelines na ipinagbabawal ang home quarantine para sa COVID-19 cases at symptomatic close-contacts habang kinakailangan silang i-transfer sa mga accredited quarantine facilities, gaya ng HOPE community caring facilities at mga barangay isolation facilities.

Tiniyak naman ni Cruz sa mga residente na patuloy ang Quezon City sa pagsasagawa ng masidhing contact tracing. “So every household will be safe, especially young children who are not yet able to follow minimum health protocols on their own,” ani Cruz. “But ultimately, we need everyone’s cooperation. We are appealing to anyone who is experiencing symptoms to please inform CESU immediately,” sabi ni Cruz.

1K palakang bukid ikinalat sa Kyusi kontra-dengue

ni Lolet Abania | August 9, 2021

Nagpakalat ng mga palakang bukid bilang pangontra sa mga lamok na may dalang dengue ang isang barangay sa Quezon City.

Ayon kay Barangay Bagong Balara Chairman Allan Franza, nasa tinatayang 1,000 palakang bukid ang kanilang pinakawalan na nanggaling pa umano sa Baras, Rizal.

Ang mga palaka ay ikinalat nila sa mga creek o sapa na nasasakop ng kanilang barangay.

Sinabi pa ni Franza na ginagawa nila ang pagpapakawala ng mga palakang bukid taun-taon, bilang panlaban sa mga lamok na nagdadala ng sakit na dengue, kung saan aniya, sinimulan nila ang naturang programa noong 2018.

Binanggit din ng chairman na bago pa umano nila inumpisahan ang pagpapakawala ng mga palakang bukid ay mataas ang dengue cases sa kanilang barangay.

Naniniwala si Franza na malaking tulong ang hakbang na ito dahil ang pangunahing pagkain ng mga palaka ay mga lamok.

OFW at construction worker sa QC, positibo sa Delta variant

ni Lolet Abania | July 26, 2021

Kinumpirma ng lokal na pamahalaan ng Quezon City ngayong Lunes ang isang kaso ng Delta variant ng COVID-19 sa lungsod na isang returning overseas Filipino worker.

Ayon sa Quezon City government, ang 34-anyos na lalaki mula sa Saudi Arabia na dumating sa bansa noong Hunyo 24 at nanatili sa isang hotel sa Makati City nang 10-araw para sa kanyang mandatory quarantine bago nai-transfer sa isang hotel sa Manila mula Hulyo 4 hanggang 11 ay nagpositibo sa Delta variant.

Sa isang pahayag ng lokal na pamahalaan, ang nasabing pasyente na nakarekober na noong Hulyo 11 ay symptomatic. “He experienced a slightly itchy throat on June 28 and was swabbed on June 30. He was considered recovered and was allowed to go home to his family on July 11,” batay sa statement ng Quezon City.

Gayunman, ang kanyang sequenced sample ay naipaalam lamang sa Epidemiology and Surveillance Disease Unit (CESU) ng Quezon City nu'ng Linggo nang gabi, kung saan agad na sumailalim sa swab test ang pasyente at kanyang pamilya ngayong Lunes. Isinailalim na rin ang pasyente at ang kanyang pamilya sa mahigpit na home quarantine para maiwasan ang tinatawag na chain of transmission.

“He will undergo another swab test, along with his family, as part of our protocol even if he is considered a recovered patient. We are doing extensive contact tracing on his close contacts just to make sure,” ani CESU head Dr. Rolly Cruz.

Tiniyak naman ni Mayor Joy Belmonte sa mga residente na nakapaghanda ang lokal na pamahalaan ng extensive measures upang maiwasan ang pagtaas ng COVID-19. “What is important is that we are intensifying testing and aggressive contact tracing,” ani Belmonte.

Samantala, nakikipag-ugnayan na rin ang Quezon City government sa isa pang local government unit (LGU) matapos na isang construction worker ang magpositibo rin sa Delta variant. Sa ulat, naninirahan ang pasyente sa ibang siyudad subalit nagtatrabaho sa isang factory sa Quezon City na tinamaan ng mas nakahahawang Delta variant.

Gayundin, ang buntis na asawa ng construction worker ay na-diagnose ng pagkakaroon ng severe respiratory ailment. “CESU has been conducting contact tracing and swabbing at his place of work since Saturday. There are no reported cases yet at his place of work but we are doing this as a preventive measure to make sure we contain any possible transmission early,” ani Cruz.

Sinabi pa ng QC government na ang construction worker ay nakaranas ng mahirap na paghinga, sipon, lagnat at sore throat noong Hulyo 4, habang kinabukasan ay nagpositibo ito.

Agad na na-admit ang pasyente sa Philippine General Hospital at na-discharge naman noong Hulyo 18. Ang kanyang asawa, kahit na walang naging sintomas, ay nagpositibo sa test noong Hulyo 8 at positibo uli noong Hulyo 17. Ang mag-asawa ay nananatili sa isang quarantine facility sa ibang siyudad hanggang sa katapusan ng Hulyo.