Mga tsuper, atras sa tigil-pasada.. Ayaw naming magutom

ni Mylene Alfonso | March 6, 2023

Karamihan sa mga transport group ay nagpahayag ng kanilang pagtutol sa planong isang linggong transport group strike ng Manibela sa Metro Manila simula ngayong araw.

Bukod sa ayaw umano nila ng gulo, nakapanghihinayang din ang ilang araw na walang pasada at magugutom ang pamilya.

Ang mga nagpahiwatig ng kanilang intensyon na huwag sumali sa protesta ang National Federation of Transport Cooperatives (NFTC), Alliance of Transport Operators' & Drivers' Association of the Philippines (ALTODAP), Liga ng Transportasyon at Operators sa Pilipinas (LTOP), Alliance of Concerned Transport Organization (ACTO) Pasang Masda (PM) Jeepney, Federation of Jeepney Operators and Drivers Association of the Philippines (FEJODAP), Stop and Go Coalition, Senate Employees Transport Service Cooperative (SETSCO), UV Express National Alliance of the Philippines (UV Express), at ACTO NA CORP.

Bukod sa mga grupong ito, ang NOVADECI Transport Cooperative, Novaliches Malinta Jeepney Transport Cooperative (NMJTC), Malabon Jeepney Transport Cooperative (MAJETSCO), Blumentritt Transport Service Cooperative (BTSC), Metro Valenzuela Transport Cooperative (MVTC), Valenzuela Bignay Meycauayan Transport Cooperative, at KARTUJODA Transport Cooperative ay hindi sasali sa transport group strike.

Sa antas ng rehiyon, tinutulan ng Iloilo City Alliance of Operators and Drivers Transport Cooperative (ICAODTC), Northern Mindanao Federation of Transport Service Cooperative (NOMFEDTRASCO), at Federation of Land Transportation of Zamboanga (Feltranz) ang panawagan ng isang transport group na welga ng Manibela.

Samantala, sisiguraduhin ng administrasyon ni Pangulong Ferdinand R. Marcos, Jr. na magkakaroon ng sapat na pampublikong transportasyon ang commuting public sa panahon ng planong welga ng isang transport group sa Metro Manila.

Maliban sa libreng sakay, libu-libong pulis at traffic personnel ang ipapakalat sa mga strategic areas sa Metro Manila para mapanatili ang kapayapaan at kaayusan at matiyak ang walang harang na daloy ng trapiko sa panahon ng transport group strike.

Sa ilalim ng AICS program ng DSWD... Mahigit 1K drivers sa Davao, tumanggap ng P3K ayuda

ni Zel Fernandez | May 8, 2022

Mahigit 1,000 public utility vehicle (PUV) drivers ang muling napagkalooban ng ayuda ng Department of Social Welfare and Development (DSWD) Field Office XI at City Social Welfare and Development Office (CSWDO) sa Davao City.

Tinatayang aabot sa 1,300 PUJ at taxi drivers ang tumanggap ng tig-P3,000 sa ilalim ng programa ng DSWD na Assistance to Individual in Crisis (AICS).

Ayon kay Mae Aquino, focal person ng Community Welfare Program ng CSWDO, ito na umano ang ikalawang payout ng mga PUV drivers sa Davao City na lubos na naapektuhan ng pagtaas ng presyo ng mga produktong petrolyo.

Paliwanag ni Aquino, idinaraan sa validation ng mga social workers ng mga barangay ang pagpili sa mga benepisyaryo ng naturang programa upang matiyak na karapat-dapat silang mapabilang sa listahan ng DSWD na mapagkalooban ng ayuda.

Dagdag pa ng focal person, patuloy pa rin aniya ang pagsasagawa ng pre-listing sa mga eligible PUV drivers sa lahat ng barangay sa lungsod ng Davao, kung saan nasa mahigit 3,000 pa lamang aniya ang nakapagpasa ng kanilang mga requirements.

Samantala, target ng AICS program sa Davao City na mabigyan ng tulong-pinansiyal ang halos 8,000 mga PUJ at taxi drivers sa lungsod.

Dagdag-pasahero sa PUVs, pinalagan ng i-ACT

ni Lolet Abania | June 17, 2021

Mariing tinutulan ng Inter-Agency Council for Traffic (i-ACT) ang panukala ng Department of Transportation (DOTr) na dagdagan ang kapasidad ng mga mananakay sa mga pampublikong transportasyon.

Ayon sa team leader ng i-ACT Special Unit Bravo na si Reynante Sagragao, hindi pa panahon para magdagdag ng mga pasaherong sumasakay sa mga public utility vehicle (PUV) gaya ng mga bus.

“Ang mga commuters, sasang-ayon ‘yan pero on our part, medyo malakas pa ang COVID ngayon, malakas pa ang hawahan,” ani Sagragao sa isang interview ngayong Huwebes.

“Baka mamaya, magpuno ka diyan, mag-uwi pa ng COVID sa pamilya ang mga ‘yan,” dagdag ni Sagragao.

Matatandaang sinabi ni DOTr Secretary Arthur Tugade na hiniling niya sa Inter-Agency Task Force on Emerging Infectious Diseases (IATF) ang 5% hanggang 10% na dagdag na capacity sa mga PUVs.

Ito ang naging tugon ni Tugade sa dumarami ngayong mga pasahero ng PUV, dahil na rin sa muling pagbubukas ng mga negosyo, kumpanya at establisimyento.

Ang i-ACT ay isa sa mga ahensiyang nakatutok sa mga kalsada at nagbabantay sa mga PUVs na mag-o-overloading.

Gayunman, patuloy na sinisilip ng i-ACT ang mga sitwasyon sa mga bus terminal sa Metro Manila, gaya ngayon sa Commonwealth Avenue sa Quezon City, kung saan wala naman silang nahuling nag-overloading.

Tiningnan din ng grupo ang EDSA Bus Carousel sa Monumento, Caloocan habang mino-monitor ang traffic at pila ng mga pasahero ng libreng sakay kung naipapatupad ang social distancing.

Sinabi rin ni Sagragao na maayos na minamanduhan ng mga enforcers ang mga drivers sa pagdating ng mga bus upang tuluy-tuloy ang sakay ng mga pasahero at hindi humaba ang pila ng mga ito.

Patuloy din ang paalala ng ahensiya sa mga pasahero sa pagsunod sa health and safety protocols tulad ng pagsusuot ng face mask at face shield kapag nasa loob na ng bus.