1.7 M Pinoy may national ID cards na — PSA

ni Lolet Abania | September 15, 2021

Umabot na sa 1.7 milyong national ID cards ang naipamahagi ng gobyerno sa mga Pilipino, ayon sa Philippine Statistics Authority (PSA) ngayong Miyerkules.

Sa Laging Handa press briefing, sinabi ni PSA Assistant Secretary Rosalinda Bautista na ang naturang datos ay nai-record ng ahensiya hanggang nitong Setyembre 10.

Ayon pa sa PSA, nasa 42 milyong Pilipino ang nakapag-register na para makakuha ng national ID. Kapag registered na ibig sabihin nito, ang isang indibidwal ay rehistrado na online via register.philsys.gov.ph at napunan o naibigay na sa online application form ang kailangang personal na impormasyon gaya ng buong pangalan, address, petsa ng kapanganakan, at iba pa.

Matapos naman ang online registration o ang Step 1, ang isang aplikante ay makatatanggap ng text message at email mula sa PSA ng kanyang appointment schedule para sa capturing o pagkuha ng biometric information gaya ng iris scans, fingerprint scans, at front-facing photograph, gayundin ang beripikasyon ng personal na detalye ng indibidwal na unang ginawa sa pamamagitan ng online registration o Step 2.

Lahat ng nag-a-apply para sa national ID ay bibigyan ng pagkakataon na magbukas ng kanilang bank account sa Landbank na pinamamahalaan ng gobyerno. Sinabi naman ni Bautista na dahil sa national ID program, nakapagbigay ito ng pagkakataon sa 5 milyong Pilipino na makapagbukas ng Landbank account.

Samantala, target ng gobyerno na makapagtala ng tinatayang 50 milyong Pinoy para sa national ID bago matapos ang taon na ayon sa National Economic Development Authority ay kinakailangan upang epektibong matukoy ang mga benepisyaryo para sa social protection programs at mas lumawak pa ang paggamit ng electronic payments habang mapapaunlad nito ang digital economy ng bansa.

42M Pinoy rehistrado na sa national ID

ni Lolet Abania | September 8, 2021

Aabot na sa 42 milyong Pilipino ang sinimulan ang proseso ng pagkuha ng kanilang national ID. Ayon sa report ni Socioeconomic Planning Secretary Karl Kendrick Chua kay Pangulong Rodrigo Duterte sa Cabinet briefing na ipinalabas ngayong Miyerkules, nasa 41,970,083 Pilipino na ang nakapag-register para sa Step 1 o ang demographic data collection hanggang Setyembre 3, 2021.

Nasa kabuuang 28,682,680 indibidwal naman ang nakakumpleto na para sa Step 2 registration o ang biometrics capture, habang 1,584,621 Pinoy ang nakatanggap naman ng kanilang PhilID cards.

Target ng pamahalaan na makapagrehistro para sa national ID ng tinatayang 50 hanggang 70 milyong indibidwal bago matapos ang taon.

“We aim to register 50 to 70 million Filipinos with the PhilSys and achieve 100% financial inclusion at the family level by the end of the year. This will help the government efficiently identify beneficiaries for social protection programs and spark the widespread use of electronic payments to accelerate the digital economy,” ani Chua sa isang statement noong nakaraang Hulyo.

Ayon pa kay Chua, hanggang nitong Agosto 22, nasa 5.2 milyong registrants ang nakapag-sign up na para sa kanilang bank accounts.

4.2 M Pinoy, nawalan ng trabaho — PSA

ni Ronalyn Seminiano Reonico | March 30, 2021

Pumalo na sa 4.2 million ang bilang ng mga Pinoy na nawalan ng trabaho ngayong Pebrero simula nang tumama ang COVID-19 pandemic sa bansa, ayon sa resulta ng isinagawang Labor Force Survey (LFS) ng Philippine Statistics Authority (PSA).

Ayon kay National Statistician Claire Dennis Mapa, ang unemployment rate na 8.8% ngayong Pebrero ay mas mataas noong January kung saan nakapagtala ng 8.7%.

Pumalo naman sa 18.2% ang underemployment rate ngayong Pebrero kumpara sa 16% noong nakaraang buwan, ayon sa PSA. Ang unemployment rate ngayong Pebrero ay itinuturing na ikatlo sa pinakamataas simula noong Abril, 2020 kung saan naitala ang 17.6% dahil sa kasagsagan ng strict nationwide lockdown na dulot ng COVID-19.

Saad pa ni Mapa, “Simula Pebrero, 2021, ang buwanang LFS ay isasagawa sa pagitan ng quarterly o regular na LFS upang magkaroon ng high frequency data on labor and employment bilang isa sa mga basehan sa paggawa ng polisiya at plano, lalo na iyong may kinalaman sa COVID-19.”

Ayon din kay Mapa, ang epekto naman ng bagong COVID-19 restrictions ay malalaman sa gagawing survey ngayong April, 2021.

Samantala, ang mga lugar na isinailalim sa enhanced community quarantine (ECQ) ay ang National Capital Region, Cavite, Bulacan, Laguna at Rizal dahil sa patuloy na pagtaas ng kaso ng COVID-19.