Punong Ministro sa Iceland at libong kababaihan, nagwelga para sa pantay na sahod

ni Angela Fernando - Trainee @News | October 25, 2023

Iniwan ni Prime Minister Katrin Jakobsdottir ng Iceland, kasama ng libong kababaihan ang kanilang trabaho upang magprotesta para sa pantay-pantay na karapatan, sahod at labanan ang karahasan sa kababaihan nu'ng Martes, Oktubre 24.

Saad ng tagapagsalita ni Jakobsdottir, nakiisa ito sa kilos sa pamamagitan ng hindi pagdalo sa kanyang mga gawain.

Tinatalang nasa 10.2% ang itinaas sa sahod ng kalalakihan sa Iceland nu'ng 2021, na nagresulta sa pag-alis ng mga kababaihan sa kanilang trabaho.

Ayon kay Steinunn Rognvaldsdottir, isa sa organizers ng protesta, hindi pa talaga nila nakakamit ang pagkakapantay-pantay kahit pa mas maayos ang pagtrato sa kababaihan sa kanila kumpara sa ibang bansa.

Dagdag niya, ito pa lang ang pangalawang beses na tumagal ang ‘Kvennafri’ o Women's Day Off ng isang buong araw.

Protesta sa South Africa, 5 dedo

ni Mabel Vieron @Overseas News | August 11, 2023

Isang linggo na umano ang pagwewelga bilang tugon sa mga driver na tinutumbok at ini-impound para sa mga maliliit na pagkakasala.

Kasama sa mga paglabag ang hindi pagsusuot ng seatbelt at ilegal na pagmamaneho sa emergency lane.

Samantala, ang ibang nahaharap sa parehong paglabag ay pinagmumulta lamang.

Kahit ang mga operator ng minibus ay nagpakita rin ng pagkadismaya sa gobyerno dahil sa aksyon na kanilang ginagawa.

Noong nakaraang araw, ipinag-utos ng transport minister ng South Africa na si Sindisiwe Chikunga, ang agarang pagpapalaya sa mga minibus na na-impound ng City of Cape Town.

Ayon kay Ms. Chikunga, ang batas na ginamit ay naisagawa at naipatupad nang mali at ‘di umano ito umiiral sa ilalim ng kasalukuyang mga batas.

Mahigit 120 katao ang naaresto mula noong Agosto 3, at kinumpirma ni Police Minister Bheki Cele na kabilang sa mga namatay ang isang pulis.

Nanawagan si Mr. Cele para sa operasyon sa pagitan ng gobyerno ng Cape Town at mga operator ng taxi, kabilang aniya sa mga naapektuhan ng welga ang mga batang hindi na nakakapasok sa paaralan.

Kalayaang magprotesta, 'di pinipigilan... Apela ng PNP sa mga raliyista: 'Du'n kayo sa tamang lugar'

ni Zel Fernandez | May 11, 2022

Kasunod ng naging pag-aaklas ng ilang mga kabataan at manggagawa sa harap ng opisina ng Comelec bunsod ng kasalukuyang resulta ng halalan, nakiusap ang Philippine National Police (PNP) sa mga raliyista na gawin ang kanilang kilos-protesta sa tamang lugar.

Ani PNP Director for Operations at Deputy Commander ng Security Task Force for National and Local Elections, P/MGen. Valeriano de Leon, hindi anila pipigilan ang anumang uri ng pagkilos lalo na kung bahagi ito ng malayang paghahayag ng saloobin na naaayon sa pagiging demokratikong bansa ng Pilipinas.

Paliwanag pa ng PNP, iginagalang ng ahensiya ang karapatang maghayag ng saloobin ng bawat Pilipino, salig sa itinatadhana ng Saligang Batas.

Ngunit, apela ni De Leon sa mga nais masagawa ng mga kilos-protesta, maging mahinahon at tiyaking hindi ito magdudulot ng abala sa mas nakararami, lalo pa ngayon na halos normal na muli ang sitwasyon pagkaraan ng eleksiyon.

Kaugnay nito, nauna nang nagbabala si PNP Officer-In-Charge, P/LtG. Vicente Danao, Jr. na sakaling mayroong umanong magmatigas o magpumilit pa ring ipagsawalambahala at labagin ang batas ay gagamitin nito ang buong puwersa upang managot ang mga nasa likod ng anumang uri ng marahas na pamamaraan ng protesta.