Mga babaeng staff nagwelga, Eiffel Tower, isinara

ni Justine Berganio @Overseas News | September 9, 2026

Photo: Circulated / Eiffel Tower sarado matapos magwelga ang mga empleyado - The Associated Press-File / Independent Co

Isinara ang Eiffel Tower sa Paris nitong Lunes matapos magwelga ang mga empleyado dahil sa insidenteng kinasangkutan ng mga babaeng staff na umano’y pinaalis sa kanilang work areas para sa pribadong pagbisita ng isang Hindu religious group.

Nasa 100 delegado ng BAPS ang bumisita sa landmark noong Sabado. Ayon sa union representative, hiniling umano ng grupo na limitahan ang pakikisalamuha sa mga babae, kaya inilipat ang ilang female workers at pinalitan ng mga lalaki.

Kinumpirma ng Société d’Exploitation de la Tour Eiffel (SETE) na hiniling ang naturang arrangement at inamin nitong hindi ito dapat tinanggap. Humingi rin ng paumanhin ang management sa mga empleyado.

Nagtipon ang staff upang hilingin ang isang pag-uusap sa management at tiyaking hindi na mauulit ang insidente. Iginiit naman ng SETE na hindi tugma sa kanilang values at prinsipyo ng gender equality ang naturang kondisyon.

Humingi rin ng paumanhin ang BAPS Paris Temple at sinabing isinagawa ang pagbisita sa pakikipag-ugnayan sa Eiffel Tower team upang hindi makaabala sa ibang bisita.

Samantala, iniutos ni Paris Mayor Emmanuel Grégoire ang imbestigasyon. Kinondena rin ng ilang French political leaders ang insidente at iginiit na hindi dapat limitahan ang papel ng kababaihan dahil sa kahilingan ng mga dayuhang bisita.

Sinabuyan na ng tear gas at water cannon... Libu-libong estudyante, nag-rally dahil sa dayaan sa exams

ni Justine Berganio @Overseas News | August 12, 2026

Photo: PTI / The Hindu

Gumamit ng tear gas, batuta at water cannon ang mga pulis sa Jharkhand, India upang dispersahin ang libu-libong kabataang nagmartsa patungo sa state legislature nitong Lunes dahil sa umano’y iregularidad sa civil service examinations.

Nagsimula ang protesta noong Hulyo 25 matapos akusahan ng mga estudyante at kabataang walang trabaho ang mga awtoridad ng umano’y pagkakaroon ng iregularidad sa recruitment exams, kabilang ang pagtagas ng mga test paper.

Nanguna rin ang isyu sa serye ng mga protesta sa New Delhi na nauwi sa pagbibitiw ni Education Minister Dharmendra Pradhan noong nakaraang buwan.

Sa Ranchi, kabisera ng Jharkhand, nagtulak at nakipagsagutan ang ilang demonstrante sa mga pulis matapos tangkaing lampasan ang mga barricade. Gumamit naman ang mga awtoridad ng tear gas, water cannon at batuta upang sila ay dispersahin.

Kabilang sa mga hinihingi ng mga nagpoprotesta ang pagbabago sa sistema ng pagsusulit, pagkansela sa ilang exams at imbestigasyon ng federal police.

Ayon sa pamahalaan ng Jharkhand, nakipagdayalogo na ito sa mga demonstrante at tinanggap na umano ang karamihan sa kanilang mga kahilingan. Bukas din umano ito sa karagdagang pag-uusap.

Labor Day, kaliwa't kanan ang protesta... Malacañang, bantay-sarado

by BRT @News | May 1, 2026

Photo: Akbayan Partylist

Malawakan at kaliwa't kanang kilos-protesta ang inaasahan mula sa iba't ibang grupo ngayong Mayo 1 o Labor Day.

Ito ay upang igiit ang nakabubuhay na suweldo ng mga manggagawa, mababang presyo ng mga bilihin, at sapat na subsidiya at ayuda.

Kaugnay nito, nakahanda na ang Philippine National Police (PNP) sa pagbabantay, kung saan mahigit 106,000 operatiba ang ipakakalat sa buong bansa upang matiyak ang kaayusan sa gitna ng mga inaasahang kilos-protesta.

Kahapon, pahirapan na rin ang pagdaan ng mga tao sa barikadang maagang inilatag sa General Solano St., Maynila na isa sa mga daanan papasok ng Malacañang. Bahagi ito ng paghahanda sa mga kilos-protesta.

Ayon naman kay PNP Spokesperson Brig. Gen. Randulf Tuaño, ilalagay ang buong puwersa ng pulisya sa heightened alert simula Huwebes hanggang Sabado. Bagama’t walang natatanggap na seryoso o direktang banta sa seguridad, binigyang-diin ni Tuaño na hindi dapat maging kampante ang hanay ng kapulisan.