Physicians licensure exams sa NCR, kanselado – PRC

ni Lolet Abania | September 9, 2021

Inianunsiyo ng Professional Regulation Commission (PRC) ngayong Huwebes ang kanselasyon ng Physicians Licensure Examination (PLE) na nakatakda ng Setyembre sa National Capital Region (NCR).

Sa isang Facebook post, ayon sa PRC ang PLE na nakaiskedyul ng Setyembre 11, 12, 18, at 19 sa NCR ay kanselado.

“Affected examinees in NCR may take the next succeeding examination without forfeiture of their examination fees,” pahayag ng PRC.

Gayunman, ang mga exams na nakatakda ng Setyembre 11, 12, 18, at 19 sa Baguio, Cagayan de Oro, Cebu, Davao, Iloilo, Legaspi, Lucena, Tacloban, Tuguegarao, at Zamboanga ay magpapatuloy sa iskedyul.

“The PRC requests the public’s utmost understanding and cooperation as it complies with the guidelines set forth by Inter-Agency Task Force for the Management of Emerging Infectious Diseases,” ayon sa PRC.

Nananatili pa rin ang NCR sa modified enhanced community quarantine (MECQ) hanggang Setyembre 15, 2021.

Topnotcher sa nurse licensure examination, galing PWU

ni Ronalyn Seminiano Reonico | July 17, 2021

Mula sa Philippine Women's University (PWU), Manila ang topnotcher sa July 2021 Nurse Licensure Examination (NLE), ayon sa Professional Regulation Commission (PRC).

Nakakuha ng markang 89.40% si Haydee Soriano Bacani ng PWU na nanguna sa “5,008 passers out of 7,746 examinees” sa naturang eksaminasyon ngayong buwan, ayon sa PRC.

Sinundan ni Liezl Mercado Tuazon ng Angeles University Foundation si Bacani at nakakuha ng markang 89%.

Sina Marlchiel Nathan Sungahed Arreglado naman ng Saint Paul University sa Tuguegarao City at Ana Maria Kim Ramos Vallente ng Capitol University, Cagayan Capitol College ang pumangatlo sa markang 88.60%.

Pare-pareho namang nakakuha ng markang 88.40% para sa ika-apat na puwesto sina Gregg Philip Lirag Palabrica (Ateneo de Davao University), Francis Miguel Carreon Rosales (University of the East Ramon Magsaysay Mem Medical CTR), at Micah Junabel Munar Ventanilla (Urdaneta City University).

Nakakuha naman ng markang 88.20 para sa ika-limang puwesto sina Yuljohn Taperla Beriña II (University of the Philippines, Manila), Angelie Mae Sophia Rabago Bonifacio (Bulacan State University, Malolos), at Renzo John Phillip Orgo Cabagay (Silliman University).

Samantala, ang Saint Louis University sa Baguio City ang number 1 sa top performing schools ngayon na nakakuha ng perfect score na 100%.

Sinundan ito ng Saint Paul University-Tuguegarao at University of Pangasinan na nakakuha ng 96.08%.

Ang Capitol University (For. Cagayan Capitol Coll.) naman ang nakakuha ng ikatlong puwesto sa markang 93.42%.

Samantala, ayon sa PRC, isinagawa ang July 2021 NLE noong July 3-4 sa mga testing areas sa Metro Manila, Baguio, Cagayan de Oro, Cebu, Davao, Iloilo, Legaspi, Lucena, Pagadian, Pampanga, Rosales, Tacloban, Tuguegarao at Zamboanga.

Nagpapanggap na PRC board members... Mag-asawang scammer, arestado

ni Mary Gutierrez Almirañez | May 18, 2021

Arestado ang mag-asawang nagpanggap bilang board members ng Professional Regulation Commission (PRC) sa Calabash PCP Sampaloc, Maynila, ayon kay Sampaloc Police Lt. Joseph Villafranca ngayong umaga, May 18.

Ayon sa ulat, nabuking ang modus nina Armi Liquid at Mario Liquid nang makatanggap ang mga pulis ng tip mula sa isang anonymous caller na taga-Capiz at Zamboanga.

Ang sistema, nagpapabayad umano ang mga ito ng mahigit P4,000 hanggang P7,000 sa kada PRC taker, kapalit ang kopya ng answer sheets upang makapasa sa board exam.

Dagdag pa ni Villafranca, iba’t ibang pangalan ang ginagamit ng mga ito sa pambibiktima.

Nakumpiska rin sa mag-asawa ang ID ng isang lehitimong empleyado ng PRC, ngunit nang i-verify iyon ay hindi nag-match ang kanilang mga profile.

Sa ngayon ay kasong falsification by private individuals and use of falsified documents, usurpation of authority at using of fictitious name ang hinaharap nila.