Solusyon sa kapos na tubig at kuryente.. P-BBM: Tipid pa more

ni Mylene Alfonso | May 22, 2023

Umapela si Pangulong Ferdinand "Bongbong" Marcos, Jr., sa mga Pilipino at sa local government units na magtipid sa tubig at kuryente habang naghahanda ang bansa para sa El Niño.

Ayon kay Marcos, kabilang dito ang pagtitipid ng tubig sa mga car wash, golf course at pagre-refill ng mga swimming pool.

"Ang DILG (Department of the Interior and Local Government), inatasan natin na paratingin sa mga LGU ang kampanya natin sa pag-mitigate ng impact ng El Niño gaya ng pagtitipid ng tubig sa bahay, sa mga car wash, sa mga pagdidilig ng golf course at pagre-refill ng mga swimming pool," pahayag ni Marcos sa kanyang pinakabagong vlog na pinamagatang "Ang Init" na inilabas noong Sabado ng gabi.

Ayon sa Pangulo, makatutulong ito sa pagpapanatili ng suplay at mahalaga ang partisipasyon ng bawat isa.

"Ito ay inaasahang makakatulong sa pagpapanatili ng ating supply,” wika pa ni Marcos.

Sinabi rin ni Marcos na ang mainit na panahon kasi sa bansa ay lumikha ng pangangailangan ng kuryente na lampas sa suplay.

Bumaba rin aniya ang ulan ng 35 porsyento na nakakaapekto sa mga hydroelectric power plant, dam at irigasyon.

Aniya, matagal nang sinusuportahan ng gobyerno ang mga proyektong makakatulong sa pagbuo o pag-imbak ng higit na enerhiya para sa Pilipinas.

“Ang energy production ay pinapaigting sa pagbubukas ng mas maraming renewable energy sources,” ani Marcos.

“Kailan lang ay in-extend natin ang Malampaya service,” giit ng Punong Ehekutibo.

"Sinusuportahan din natin ang mga bagong teknolohiya tulad ng battery storage para maging sustainable at reliable pa ang ating renewable sources of energy," dagdag pa niya.

Bukod dito, inumpisahan na rin ng pamahalaan ang paghahanda para sa posibleng La Niña matapos ang tagtuyot.

"Sa kabila ng matinding tagtuyot ay naghahanda din tayo para naman sa La Niña o matinding tag-ulan na may dala-dala ring ibang problema," paliwanag ni Marcos.

“Ito ay nangangailangan ng partisipasyon ng bawat isang kababayan nating Pilipino,” pagtatapos ng Pangulo.

Pag-import ng 150K MT ng asukal, aprub kay P-BBM

ni Mylene Alfonso | May 16, 2023

Inaprubahan ni Pangulong Ferdinand Marcos, Jr., ang karagdagang pag-aangkat ng aabot sa 150,000 metriko tonelada (MT) ng asukal upang patatagin ang presyo ng mga bilihin at mapalakas ang stock ng bansa.

Ito ay nabuo kasunod ng pagpupulong ni Marcos sa Sugar Regulatory Administration (SRA) sa pamumuno ni SRA Acting Administrator Pablo Luis Azcona at Board Member Ma. Mitzi Mangwang, na kumakatawan sa mga miller.

Sa isang panayam, sinabi ni Marcos na hindi pa nila matukoy ang halaga ng asukal na aangkatin ng bansa.

Sinabi ng Punong Ehekutibo na bukas ang gobyerno sa pag-aangkat ng asukal sa lahat ng mga traders upang mapalakas ang produksyon nito kung saan inaprubahan din niya ang paglipat ng simula ng panahon ng paggiling o milling season mula Agosto hanggang Setyembre ngayong taon.

Base sa pagtaya ng SRA, magkakaroon ng negative ending stock ang bansa ng 552,835 metrikong tonelada pagsapit ng Agosto 2023 o ang pagtatapos ng milling season.

Bunsod nito, sinabi ng Pangulo na para hindi kapusin ang suplay, kailangan na mag-angkat ng asukal ng 100,000 hanggang 150,000 metrikong tonelada.

Ekonomiya, lumago.. Happy ako — P-BBM

ni Mylene Alfonso | May 12, 2023

Masaya umano si Pangulong Ferdinand 'Bongbong' Marcos, Jr. sa ulat na lumago ang ekonomiya ng bansa.

Ayon kay National Economic and Development Authority (NEDA) Secretary Arsenio Balicasan, lumago ang gross domestic product (GDP) ng Pilipinas ng 6.4 porsyento sa unang quarter ng 2023.

Sa kanyang talumpati sa Philippine Economic Performance for the First Quarter of 2023, sinabi ni Balicasan na ang GDP growth ay nasa median estimates ng mga analyst at nasa target ng gobyerno na 6.0 percent hanggang 7.0 percent para sa kasalukuyang taon.

“Bukod dito, sa mga pangunahing umuusbong na ekonomiya sa rehiyon na naglabas ng kanilang unang quarter 2023 real GDP growth sa ngayon, ang Pilipinas ang pinakamabilis na lumago, sinundan ng Indonesia (5.0%), China (4.5%), at Vietnam (3.3%).

Mas mabilis din umano ang paglago ng bansa kaysa sa tinatayang unang quarter growth rate para sa Malaysia (4.9%), India (4.6%), at Thailand (2.8%),” dagdag ni Balicasan, na sinipi ang datos mula sa Philippine Statistics Authority.

Idinagdag ni Balisacan na bagama't mas mababa ang growth figure sa quarter na ito kaysa sa 8.0 percent year-on-year growth rate na naitala noong unang quarter ng 2022, kailangang mag-ingat ang gobyerno sa pagbibigay kahulugan dito bilang isang pagbagal dahil ang paglago ng nakaraang taon ay nagmula sa isang mababang base.

Inamin ni Balicasan na ang mataas na inflation ay nananatiling isang hamon at ang hakbang ng Bangko Sentral ng Pilipinas na itaas ang mga pangunahing rate ng patakaran nito upang i-anchor ang mga inaasahan ng inflation at matiyak na ang katatagan ng presyo ay maaaring magpapahina sa paglago sa hinaharap.

"Ngunit ang pagpapabuti sa klima ng negosyo ay maaaring kontrahin ang hindi sinasadyang epekto," sabi pa niya.