Hirit ni P-BBM.. Taas-presyo ng bilihin, sosolusyunan na

ni Mylene Alfonso | May 29, 2023

Ipinag-utos ni Pangulong Ferdinand "Bongbong" Marcos, Jr., ang pagbuo ng isang inter-agency committee, na siyang may tungkuling tugunan ang inflation at palakasin ang ekonomiya ng bansa.

Ayon sa Presidential Communications Office (PCO), nilagdaan ni Marcos ang Executive Order No. 28 noong Mayo 26 kung saan magsisilbing Economic Development Group’s (EDG) advisory body ang Inter-Agency Committee on Inflation and Market Outlook (IAC-IMO) na layuning mapanatili ang inflation partikular sa pagkain at enerhiya base sa inflation target ng gobyerno.

Nakasaad sa EO ang pagreorganisa at pagpapalit ng pangalan ng Economic Development Cluster (EDC) sa EDG upang matiyak na ang pagsasama-sama ng mga programa, aktibidad, at mga prayoridad tungo sa patuloy na paglago ng ekonomiya ay nananatiling mahusay at epektibo.

"In view of the increasing prices of key commodities, particularly food and energy resources, the creation of an advisory body to the EDC, tasked to directly address inflation, will strengthen the EDC, and reinforce existing government initiatives aimed to improve the economy and the quality of life of the Filipino people,” base sa EO.

Nabatid na ang IAC-IMO ay bubuuin ng National Economic and Development Authority (NEDA) secretary bilang chair; ang Finance secretary bilang co-chair; ang Budget secretary bilang vice-chair; at mga kalihim ng Agriculture, Energy, Science and Technology, Trade, and Interior bilang mga miyembro.

"Among the functions of the advisory body are to closely monitor the main drivers of inflation, particularly food, and energy, and their proximate sources and causes; assess the supply-demand situation for essential food commodities during the cropping period, allowing periodic updating as new information becomes available; assess the possible impact of natural and man-made shocks on the supply of key food commodities; and regularly monitor data necessary to assess food prices and the

supply and demand situation,” ayon pa sa PCO sa isang pahayag.

Bibili rin ng submarine.. 2 bagong barko, bantay sa WPS — Marcos

ni Mylene Alfonso | May 27, 2023

Gagamitin ni Pangulong Ferdinand Marcos, Jr., ang dalawang bagong barko ng Philippine Navy para magpatrolya sa West Philippine Sea (WPS).

Ani Marcos, ito ay para maipakita na patuloy na nagpapalakas ang Pilipinas sa kapabilidad sa usapin ng seguridad at depensa.

Gagamitin din aniya ang mga barko sa search and rescue operation pati na sa relief operations.

Sa pagdalo ng Pangulo sa ika-125 anibersaryo ng Philippine Navy, sinaksihan ng nito ang commissioning sa dalawang bagong Israeli made fast attack interdiction gun boat.

Ito ay ang BRP Gener Tinangag at BRP Domingo Deluana.

Nakikipagsabayan na aniya ang Pilipinas sa mga kapitbahay na bansa sa Asya sa pagpapalakas ng naval assets.

Samantala, balak din ni Marcos na bumili ng submarine para sa Philippine Navy.

Maraming bansa umano ang nag-aalok ng submarine sa Pilipinas.

"Marami tayong offer from different countries not only to acquire submarines but also to build them here in the Philippines. So, iyon ang tinitignan natin ngayon dahil malaking bagay 'yun if they are built here and we can actually build submarines here and provide those submarines to other countries and then that’s another source of jobs and of income and increase capability for our navy,” dagdag pa ng Pangulo.

Milyun-milyong pamilya, gutom.. Food stamp sa walang makain — P-BBM

ni Mylene Alfonso | May 23, 2023

Nais ni Pangulong Ferdinand "Bongbong" Marcos, Jr., na magtatag ng isang nationwide food stamp program sa ilalim ng kanyang administrasyon sa pakikipagtulungan sa Asian Development Bank (ADB).

Ayon kay Marcos, ito ay kabilang sa mga paksang tinalakay niya kay ADB President Masatsugu Asakawa at iba pang matataas na opisyal ng ADB.

Ani Marcos, ang naturang programa ay unang iminungkahi ng Department of Social Welfare and Development (DSWD) na kabilang sa nakahanay na proyekto ng gobyerno na lubos na makatutulong sa publiko.

Una nang inilutang ni DSWD Secretary Rex Gatchalian ang ideya noong unang bahagi ng taon, bilang tugon sa survey ng Social Weather Stations (SWS) kung saan tatlong milyong pamilyang Pilipino ang nakararanas ng gutom.

Layunin ng programa na mabigyan ng mga coupons ang mga pamilya at indibidwal na mababa lamang ang kita, na magagamit nila sa pag-avail ng mga pagkain.

Tinalakay din ni Marcos sa ADB ang pakikipagtulungan nito sa Civil Service Commission hinggil sa digital technology at iba pang “large-scale” projects.

"Now the scope of the ODA (official development assistance) that we get through ADB has now increased and we are now talking about agriculture, re-skilling and retraining, and climate change and its mitigation and adaptation,” wika ng Pangulo.