Gun ban sa NCR at Davao City para sa inagurasyon nina P-BBM at VP Sara — PNP

ni Lolet Abania | June 15, 2022

Magpapatupad ng gun ban ang Philippine National Police (PNP) para sa magkahiwalay na inauguration rites nina President-elect Ferdinand “Bongbong” Marcos, Jr. sa Manila at Vice President-elect Sara Duterte sa Davao City.

Ayon kay PNP Director for Operations, Police Major General Valeriano de Leon, ang gun ban sa Davao Region ay magiging epektibo mula Hunyo 16 hanggang 21 para sa inaugural ceremony ni VP Sara sa Hunyo 19 habang sa Hunyo 27 hanggang Hulyo 2 sa Metro Manila para sa oathtaking ni P-BBM na nakatakda sa Hunyo 30.

“That [gun ban] is three days before [the event] and two days [after the event] because we have clearing areas... if ever there is an incident that warrants investigation,” pahayag ni De Leon sa isang press conference ngayong Miyerkules.

Ang June 19 event ay magaganap sa San Pedro Square sa Davao City, habang ang June 30 ceremony ay isasagawa sa National Museum sa Manila.

“The suspension (gun ban) covers the period of full preparations, deployment and implementation of the security measures for the oath-taking events of the two highest ranking officials of the country,” giit ni De Leon.

“That was our recommendation that was approved (by PNP officer in charge Police Lieutenant General Vicente Danao Jr.),” dagdag ng opisyal. Nang tanungin siya, kung ang gun ban ay senyales ng anumang nai-report na threat o banta kaugnay sa magaganap na mga inagurasyon, saad ni De Leon, mas makabubuting manatiling mapagbantay.

“We are validating raw information. We do not discount any information that reaches our office. We quickly send them to Directorate of Intelligence for validation,” sabi ni De Leon. “Be that as it may, we are ready for anything,” aniya.

Ayon pa kay De Leon, nasa tinatayang 3,700 pulis ang itatalaga sa seguridad ng oathtaking ni VP Sara habang humigit-kumulang sa 6,000 ang ide-deploy para sa oathtaking ni P-BBM.

Canvass ng 2022 election votes para sa pangulo at VP, tapos na.. Marcos at Sara, iprinoklama — NBOC

ni Lolet Abania | May 25, 2022

Tinapos na ng Congress, tumatayong National Board of Canvassers (NBOC), ang opisyal na tallying of votes para sa pangulo at pangalawang pangulo sa 2022 national and local elections.

Idineklara ng Joint Canvassing Committee (JCC), na co-chaired nina Senate Majority Leader Juan Miguel Zubiri at House Majority Leader Martin Romualdez, ang completion ng proseso ng certificates of canvass (COCs) ng alas-3:33 ng hapon ngayong Miyerkules.

Ang canvassing ay tinapos na nila kahit wala pa ang canvassing ng overseas absentee voting (OAV) ng mga boto mula sa Argentina at Syria, kung saan ang mga ballot boxes sa naturang mga bansa ay hindi pa dumating.

Isang report ng canvass ang ihahanda ng JCC at isusumite ito sa Joint Public Session ng House of Representatives at ng Senate of the Philippines. Batay sa rules, “the JCC report shall be approved by a majority of votes of all its members, each panel voting separately. The report shall be signed by the majority of the members of each panel.”

Matapos nito, ang mga chairpersons ng JCC ay ipiprisinta at i-sponsor ang report, habang sinasamahan ito ng Resolution of Both Houses na magpoproklama sa duly-elected president at vice president.

Sa adoption ng Resolution of Both Houses, sina Senate President Vicente Sotto III at Speaker Lord Allan Velasco ay ipoproklama na ang mga nahalal at iluluklok na pangulo at pangalawang pangulo.

Base sa partial at unofficial tally, si dating Senator Ferdinand “Bongbong” Marcos Jr. ang nanguna sa 2022 elections sa presidential race na may 31,104,175 votes, kasunod ni Vice President Leni Robredo na may 14,822,051 votes.

Para sa vice-presidential race nanguna si Davao City Mayor Sara Duterte, ang anak ni outgoing President Rodrigo Duterte, na may 31,561,948 votes, kasunod si Senator Francis Pangilinan na may 9,232,883 votes.

Ayon sa GMA News Research, ang napipintong proklamasyon ni Marcos, ang pinakamabilis na presidential proclamation matapos ang 1986 EDSA Revolution.

Noong 1992, ang proklamasyon ni dating Pangulong Fidel V. Ramos ay inabot ng 42 araw matapos ang eleksyon; 18 araw para sa proklamasyon kay dating Pangulong Joseph Estrada noong 1998; 45 araw para sa proclamation ni dating Pangulo Gloria Macapagal-Arroyo; 30 araw para sa proklamasyon ng yumaong dating Pangulong Benigno Aquino III; at 21 araw para sa proklamasyon ni outgoing President Rodrigo Duterte. Umabot lamang ng 16 araw ang proklamasyon ni Marcos matapos ang May 9 national at local elections.

Para sa president at VP canvassing.. Congress, nagpasa ng panuntunan — Comelec

ni Lolet Abania | May 22, 2022

Asahan na ang Senate at ang House of Representatives na magpapasa ng guidelines para sa kanilang sariling canvassing ng mga certificates of canvass (COC) sa katatapos na 2022 elections kapag nagpatuloy na ang kanilang mga sessions, ayon sa Commission on Elections (Comelec).

Sa isang radio interview ngayong Linggo, sinabi ni Comelec Commissioner George Garcia na ang 172 mula sa 173 COCs na na-canvass na ng Comelec, tumatayo bilang National Board of Canvassers (NBOC), ay maaaring naipasa na sa Congress sa oras ng pagsisimula ng official count ng mga votes para sa pagka-pangulo at pagka-pangalawang pangulo.

“Sa aking palagay, ang una nilang gagawin, ang first agenda nila, siguradong sigurado ‘yung pagpasa ng rules, ‘yung guidelines ng canvassing nila. Hindi po nila siyempre ia-adopt ‘yung rules namin ng canvass at sa pagkakaalam natin, nag-draft na sila ng kanilang rules at for approval bukas ng Senado at saka Mababang Kapulungan,” saad ni Garcia.

Sa ilalim ng 1987 Constitution, ang mga election returns (ER) ng bawat halalan para sa pangulo at bise presidente, na duly certified ng board of canvassers ng kada probinsiya o lungsod, ay kailangang i-transmit ang mga ito sa Congress, direkta sa Senate President.

Nakasaad pa rito, “Upon receipt of the certificates of canvass, the Senate president shall, not later than 30 days after the day of the election, open all the certificates in the presence of the Senate and the House of Representatives in joint public session, and the Congress, upon determination of the authenticity and due execution thereof in the manner provided by law, will canvass the votes.”

Sa Mayo 23, nakatakda naman ang Senate at ang House of Representatives na mag-resume ng kanilang mga sessions.

Matapos nito, ang Congress ay magko-convene na NBOC para simulan ang opisyal na bilangan ng mga boto sa pagka-pangulo at pagka-pangalawang pangulo.

Gayunman, ayon kay Garcia, teknikal na magsisimula ang Congress ng kanilang canvassing sa Martes, mula alas-10:00 ng umaga hanggang alas-10:00 ng gabi.

Samantala, nakatakda ang Comelec na magsagawa ng special elections sa Tubaran, Lanao del Sur – ang nag-iisang lugar na nakatakda namang magsumite ng kanilang COC sa Mayo 24, matapos na mai-report ng failure of elections na unang sinabi ni acting poll spokesperson John Rex Laudiangco.

Kaugnay nito, naghahanda na ang Senado para sa paglilipat sa Batasang Pambansa ng mga COC at ER sa pag-canvass nito at sa napipintong proklamasyon ng mga nagwagi sa presidential at vice presidential race. Bukas nakatakdang dalhin sa Batasang Pambansa ang mga naturang COC at ER, habang ihahanda muna ng mga tauhan ng Office of the Senate Sergeant-at-Arms ang mga ballot boxes na naglalaman ng mga ito.

Ayon kay Senate Sergeant-at-Arms Gen. Rene Samonte, alas-4:00 ng madaling-araw ng Lunes, ililipat sa Kamara ang mga ballot box.

Tutulong naman ang Philippine National Police (PNP) sa kanila para matiyak ang seguridad ng paglilipat ng mga ballot boxes habang isinasakay ang mga ito sa mga trak ng militar.