Jeepney phaseout, tuloy.. P-BBM sa tsuper: Ako ang bahala

ni Mylene Alfonso | March 9, 2023

Tiniyak ni Pangulong Ferdinand R. Marcos, Jr., na walang isang tsuper o operator ang mawawalan ng trabaho kapag naisulong na ang modernisasyon sa mga pampublikong sasakyan.

Ito ang inihayag ni Marcos matapos ang pulong sa mga lider ng grupong Manibela at Piston kay Presidential Communications Operations Office Secretary Cheloy Garafil sa Palasyo at nagpasyang itigil na ang isang linggong tigil-pasada.

“Ang problema na kanilang sinasabi ay baka hindi sila mapautang para makapagbili ng bagong sasakyan kaya’t iyan ang tinitingnan namin ngayon na tiyakin na walang mawawalan ng trabaho dahil hindi nakapagbili ng electric vehicle pagdating ng panahon, wala pa tayo doon, pero sa ngayon ang ginagawa lang natin tiyakin lang natin na safe ang ating mga sasakyan, na hindi malagay sa alanganin ang mga pasahero, ang mga commuter,” sabi ng Pangulo.

Nauna nang nagdesisyon ang Land Transportation Franchising and Regulatory Board (LTFRB) na palawigin pa ito ng hanggang sa Disyembre 31.

Umaasa rin ang Pangulo na ang anim na buwang palugit ay sapat na upang ayusin ang sistema ng pag-inspeksyon at pagpapalit ng mga lumang jeepney.

“I’m glad that, ako’y nagpapasalamat naman sa kanila na sa palagay ko ay naramdaman nila. They have made their point very clearly na kailangan natin tingnan at pag-aralan nang mabuti. Ito ay sinabi ko na noon na balikan natin itong sistema sa pagpalit iyong sa jeepney at saka sa mga bus at saka sa iba’t ibang transport areas ay kailangan natin tingnan nang mabuti na hindi tayo nagbibigay ng dagdag na pahirap para sa ating mga transport workers. Of course, napakaimportante na safe ang kanilang mga sasakyan at kapag tayo nga ay papasok sa era ng electric vehicles ay dahan-dahanin natin,” dagdag pa ng Pangulo.

Pagpatay kay Degamo, pulitika.. Private army, buwagin — P-BBM

ni Mylene Alfonso | March 7, 2023

Ipinag-utos ni Pangulong Ferdinand Marcos, Jr., sa Department of the Interior and Local Government (DILG) at sa Philippine National Police (PNP) na buwagin ang private armies at pinatutukoy din niya ang mga hotspot na lugar tulad ng ginagawa kapag panahon ng eleksyon.

“Actually, ang sinabi ko sa ating [DILG] Secretary [Benhur] Abalos and then the PNP is to now make an examination, kagaya ng ating ginagawa kapag darating ang eleksyon,” tugon ni Marcos sa isang panayam sa Malacañang kaugnay ng pagpatay kay Negros Oriental Governor Roel Degamo.

“Gawin n’yo ulit ngayon, don’t think of the elections first but think ano ‘yung mga hotspots, ‘yung mga mainit na lugar tingnan natin,” sabi ni Marcos.

Dapat din aniya na kumpiskahin ang illegal firearms upang matigil ang patayan.

“Ang usual naman na dapat gawin d’yan ay hanapin ‘yung illegal firearms. Basta kakaunti ang illegal firearms, kakaunti ang ganyang klaseng krimen,” saad ng Pangulo.

“'Yang mga private army na ganyan, kailangan i-dismantle lahat ‘yan. That’s what we have asked them to do,” pahayag pa niya.

Hindi rin aniya katanggap-tanggap at kahindik-hindik ang ginawang pagpatay kay Degamo at talagang pulitika ang nakikita niyang motibo.

“It was shocking. I could not believe that this would still happen. Pinasok ba naman ‘yung sarili niyang bahay. When you see the video, talagang lahat na haharap sa kanila, babarilin nila. ‘Yung ibang pinatay nila walang kinalaman sa kanilang gulo,” ani Marcos.

“This one is particularly terrifying… This does not belong in our society. Hindi puwede ‘yung ganyan. Hindi natin pababayaan… Ito this is purely political, ‘yung kay Roel [Degamo],” diin ng Pangulo.

Sinabi rin ni Marcos na handa ang gobyerno na magbigay ng proteksyon sa mga lokal na opisyal na maaaring nag-iisip din na sila ang maging target ng assassination.

“Right now, everybody talagang binibigyan namin ng protection. We don’t have details yet kung sino man who feels aggrieved or whatever,” dagdag pa ng Chief Executive.

P-BBM, nakiisa sa mga nagpatalsik sa ama

ni Mylene Alfonso | February 26, 2023

Nag-alok ng reconciliation si Pangulong Ferdinand ‘Bongbong’ Marcos, Jr., bilang bahagi ng paggunita ng ika-37 anibersaryo ng EDSA People Power Revolution.

“I once again offer my hand of reconciliation to those with different political persuasions to come together as one in forging a better society, one that will pursue progress and peace and a better life for all Filipinos,” pahayag ng Pangulo.

Ayon kay Marcos, nakikiisa siya sa paggunita ng EDSA People Power kung saan napatalsik ang kanyang yumaong ama na si dating Pangulong Ferdinand Marcos, Sr., taong 1986.

“As we look back to a time in our history that divided the Filipino people, I am one with the nation in remembering those times of tribulation and how we came out of them united and stronger as a nation,” dagdag pa nito.

Samantala, nagpadala rin si Pangulong Marcos ng bulaklak sa People Power Monument sa EDSA, Quezon City.