Ngayong Labor Day.. PBBM: Kayod pa more para umasenso

ni Mylene Alfonso | May 1, 2023

Pinayuhan kahapon ni Pangulong Ferdinand Marcos, Jr. ang mga manggagawang Pilipino na huwag mawalan ng lakas ng loob, sipag, at pag-asa sa kabila ng mga hamon sa buhay bago ang pagdiriwang ng Araw ng Paggawa ngayong Mayo 1.

Sa kanyang talumpati, kinilala ni Pangulong Marcos ang hirap na kinakaharap ng mga manggagawa, tulad ng kawalan ng trabaho, pagtaas ng presyo ng mga bilihin, at kawalan ng access sa mga benepisyo ng gobyerno.

Dahil dito, ipinangako ng Pangulo ang proteksyon sa mga manggagawa na uunahin sa ilalim ng kanyang administrasyon.

"Sa kabila ng mga hamon ng buhay, 'wag kayong mawalan ng lakas ng loob, ng kasipagan, at ng pag-asa. Nawa’y panatilihin n'yo ang pagsisikap, integridad, at pagmamahal sa lahat ng inyong gawain. Ipamalas natin ito at ipamana sa ating mga anak at susunod na ating salinlahi," sabi ni Marcos.

"Ang ating pagsusumikap ay may kakayahang makapagtaguyod ng ating sarili, pamilya, at pamayanan. Ito rin ay may kakayahang magpapakita ng pagmamahal at naghahatid ng ginhawa, kapanatagan, at kasiyahan sa ating lahat na lalong mapaunlad ang ating mga buhay," wika pa niya.

Batay sa ulat ng Philippine Statistics Authority (PSA), nasa 2.47 milyon ang mga Pilipinong walang trabaho o ang bilang ng mga nasa labor force na walang trabaho o kabuhayan noong Pebrero 2023.

Nabatid na ang bilang ng mga jobless adults na edad 15 pataas ay mas mataas kaysa sa 2.37 milyong unemployed na naitala noong Enero, ngunit mas mababa kaysa sa 3.13 milyong walang trabaho noong Pebrero 2022.

Bago ang kanyang pagtulak patungong Washington, DC kahapon, pinangunahan muna si Marcos sa pagbubukas ng “Kadiwa ng Pangulo Para Sa Manggagawa” outlet sa Pasay City kung saan nagtipon ang higit sa 150 negosyo at nagbebenta mula sa mga kalahok na ahensya.

Bibiyahe sa Abril 30-Mayo 4.. Marami tayong hihingin sa U.S. — P-BBM

ni Mylene Alfonso | April 25, 2023

Inilatag ni Pangulong Ferdinand Marcos, Jr., ang mga posibleng talakayin nila ni US President Joe Biden sa kanyang official visit, ang Visiting Forces Agreement (VFA), Mutual Defense Treaty (MDT), climate change at investments.

"Hindi napapag-usapan ngayon, VFA natin and the treaty that we have, Mutual Defense Treaty that we have with the US. We have to evolve it," wika ni Marcos sa isang panayam.

"It has to evolve... Nagbabago rin ang sitwasyon sa hinaharap natin, sa South China Sea, gitna ng mga pangyayari sa Taiwan, North Korea, lahat ng mga ano na medyo umiinit ang sitwasyon dito sa atin," pahayag niya.

Ginawa ng Pangulo ang pahayag sa gitna ng tumataas na tensyon sa Southeast Asian Region.

"Kung ano itong partnership natin, kung ano ang mga pwede natin gawin upang bawasan naman ang rhetoric dahil medyo mabibigat ang usapan, nagkakabitawan ng maaanghang na salita na, siyempre inaalala natin 'yan," banggit ni Marcos.

Nakatakdang bumisita si Marcos sa Washington, D.C. sa Abril 30 hanggang Mayo 4 kung saan Mayo 1 nakatakda ang bilateral meeting ng dalawang lider.

Samantala, plano rin humingi ni Marcos ng iba pang tulong sa Amerika gaya ng kanyang ginagawa sa ibang biyahe niya.

"And siyempre, marami tayong hihingin na tulong dahil tayo lahat naman ay nagre-recover sa pandemya. At kung ano ‘yung mga -- ganun din kagaya nu'ng mga ibang biyahe na ginawa ko, kung ano ba mga partnership na puwedeng buuhin, ano bang mga puwedeng bagong teknolohiya na baka pwedeng dalhin dito sa Pilipinas na magagamit natin."

"All of these -- marami tayo… Kasi ang relationship natin sa America, sa maraming iba’t iba na pinag-uusapan. Hindi lamang militar. Hindi lang ekonomiya, pati ‘yung mga cultural exchange, pati ‘yun na nga ‘yung ngayon, ang matinding usapan is climate change. Lahat ay kailangan natin tingnan kung ano ba ang magandang partnership sa United States, ang magiging partnership natin. Pag-uusapan namin ni President Joe Biden kung ano ba talagang puwedeng -- paano pa tayo patuloy na magtulungan," dagdag pa niya.

Marcos, proud na proud.. Pinoy health workers, mabenta sa buong mundo

ni Mylene Alfonso | April 20, 2023

Muling pinuri ni Pangulong Ferdinand Marcos, Jr., ang kahalagahan ng mga Filipino health workers.

Sa kanyang talumpati sa groundbreaking ng St. Bernadette Children and Maternity Hospital sa San Jose Del Monte, Bulacan, inihayag ni Marcos na nagpapasalamat sa kanya ang mga nakikilala niyang mga lider ng iba't ibang bansa dahil sa mga Pinoy health worker.

"Alam n'yo po, 'pag nakikipag-meeting ako sa lahat ng mga leader, lahat ng mga presidente, mga prime minister ng kahit saan, kahit sa Amerika, kahit sa Canada, kahit sa Europe, lahat, lahat nagtatanong -- puwede ba kaming kumuha ng workers, ng health workers sa inyo?" pagmamalaki ni Marcos.

"Dahil sa buong mundo, ang kauna-unahang hinahanap nilang health workers ay ang mga Pilipino at ang mga Pilipina," wika pa ng Pangulo.

"Kaya tayo naman, tayo naman ang naging beneficiary sa kanilang pagsakripisyo, ay dapat lagi tayong nagpapasalamat at kilalanin natin nang mabuti ang kanilang ginawang sakripisyo," ayon pa sa Pangulo.