U.S. Pres. Biden, may pangako sa 'Pinas – P-BBM

ni Mylene Alfonso | May 3, 2023

Inihayag ni U.S. President Joseph Biden nitong Lunes na magpapadala siya ng "first of its kind" presidential trade and investment mission sa Pilipinas.

Ginawa ni Biden ang pahayag kasunod ng kanyang bilateral na pagpupulong kay Pangulong Ferdinand R. Marcos, Jr. sa Washington.

Binanggit ng pinuno ng US ang "matibay na partnership" ng Manila at Washington at malalim na pagkakaibigan

Nakatuon din si Biden na palakasin ang suporta ng Amerika sa malawak na hanay ng mga isyu, kabilang ang pagpapagaan ng pagbabago ng klima at ekonomiya.

Pinasalamatan ng pinuno ng Pilipinas si Biden para sa tulong ng Amerika at hinahangad na palakasin ang mga alyansa at pakikipagtulungan sa harap ng bagong ekonomiya na kinakaharap pagkatapos ng pandemya.

Kabilang sa mga opisyal ng Pilipinas na dumalo sa pinalawak na bilateral meeting ay sina National Security Adviser Eduardo Ano; Defense Sec. Carlito Galvez, Jr.; Environment and Natural Resources Sec. Antonia Yulo Loyzaga; Trade and Industry Sec. Alfredo Pascual; Information and Communications Technology Se. Ivan John Uy; Justice Sec. Jesus Crispin Remulla; Migrant Workers Department Sec. Maria Susana “Toots” Ople at Foreign Affairs Sec. Enrique Manalo.

Mga talunang kandidato, pasok sa Gabinete — Marcos

ni Mylene Alfonso | May 2, 2023

Ikinukonsidera ni Pangulong Ferdinand Marcos, Jr., ang pagtatalaga ng mga bagong miyembro ng kanyang Gabinete.

Sa isang panayam habang patungo sa Estados Unidos, tinanong si Marcos kung magtatalaga ng mga bagong miyembro ng Gabinete dahil matatapos na ang appointment ban sa mga tumakbo noong nakaraang halalan na bigong manalo.

“Well, we’ll see. But yeah, ‘yung first year, that really was — we have to look at… Marami talagang — marami namang magaling na hindi nanalo sa eleksyon na gustong tumulong. So we will certainly look into that in different positions. Pero yeah,” pahayag ni Marcos sa mga mamamahayag.

“More or less, for the beginning of siguro the — the beginning of the second year of my term, palagay ko mayroong mga ano. Not a shuffle but we will add people to Cabinet, to strengthen the Cabinet,” wika ng Pangulo.

Nang tanungin kung mayroon siyang shortlist, sinabi ni Marcos na hindi siya mag-aanunsyo ng anuman.

“No, I will not announce anybody. No, they should not hear it naman from the press. They should hear it from me. Kami muna mag-usap,” dagdag pa ng Chief Executive.

Nabatid na sa Mayo 9 matatapos ang one year ban.

COVID cases kahit tumataas.. Mandatory face mask, 'di pa kailangan — P-BBM

ni Mylene Alfonso | May 2, 2023

Hindi pa nakikita ni Pangulong Ferdinand Marcos, Jr., na kailangang ibalik ang mandatoryong pagsusuot ng face mask sa gitna ng pagtaas ng COVID-19 cases kamakailan.

Ayon kay Marcos, bagama’t tumataas ang COVID cases sa bansa maliit pa rin aniya ang baseline o bilang ng mga kaso bago nakita ang muling pagtaas.

"We might have to think about it kung talagang… But ang ating -- ako ang tinitingnan ko is because although ‘yung rate of increase lumalaki, ang baseline natin na sinimulan eh maliit lang so hopefully we’re still ano -- we’re still going to be able to do it," sabi ni Marcos sa isang panayam habang lulan ng PR001 patungong Washington D. C.

Kaugnay nito, bukas din si Marcos na muling magsagawa ng vaccination drive laban sa COVID para sa mga bata lalo’t nakakaapekto rin aniya ang mainit na panahon sa kanilang kalusugan.

"But it looks like, we will have to conduct again, especially for young people, we’ll have to conduct again a vaccination push para mabawasan na ‘yan, para mabawasan ‘yan especially with people being a little bit, shall we say, nahihirapan na nga eh dahil sa init, that brings down -- humihina ang katawan and that will make them more vulnerable to COVID again," paliwanag ng Pangulo.

Una nang ipinag-utos ni Marcos na opsyonal ang paggamit ng face mask noong Oktubre noong nakaraang taon sa pamamagitan ng Executive Order No. 7.

Samantala, maghihintay ng guidance ang Pangulo mula sa Inter-Agency Task Force for the Management of Emerging Infectious Diseases at Department of Health kung kailangan bang ibalik ang mandatoryong pagsusuot ng face mask.

"So we’ll look at it. Tingnan natin kung may guidance ang IATF, may guidance ang DOH. I think -- I hope we don’t have to but we might but I hope not," saad pa ng Punong Ehekutibo.

Matatandaang iniulat ng DOH ang pagtaas ng kaso ng COVID sa bansa dagdag pa rito ang pagkaka-detect ng bagong Omicron subvariant XBB.1.16.