Deployment ng healthcare workers sa ibang bansa, stop muna — POEA

ni Jasmin Joy Evangelista | November 6, 2021

Pansamantalang ititigil ng Philippine Overseas Employment Administration (POEA) ang pagpoproseso ng mga papeles ng mga nurses at iba pang mga healthcare workers na nagnanais na magtrabaho sa ibang bansa.

Ito ay dahil naabot na ang itinakdang deployment cap ng Inter-Agency Task Force (IATF) o bilang ng mga health care workers na maaaring magtrabaho abroad.

Dahil dito ay hindi muna mag-i-issue ng Overseas Employment Certificate (OEC) sa mga healthcare workers na nagbabalak na mag-abroad.

Matatandaang 6,500 lamang ang bilang ng mga healthcare workers na papayagang mangibang-bansa sa taong ito batay sa patakaran ng IATF.

“Pursuant to POEA Governing Board Resolution No. 17, Series of 2020 and POEA Advisory No. 79, Series of 2021 on the lifting of the moratorium or temporary suspension on the deployment of nurses, nursing aides and nursing assistants, and increasing the annual deployment cap from 5,000 to 6,500, the Administration hereby announces that the said ceiling has been reached as of date,” ani POEA head Bernard Olalia sa Advisory No. 144.

Magpapatuloy ang pagpapatupad sa nasabing suspensiyon hanggang wala pang panibagong inilalabas na anunsyo ang Inter-Agency Task Force.

Samantala, nilinaw naman ng POEA na papayagang makabiyahe ang mga nakakuha na at nakapagproseso na ng kanilang mga papeles bago pa man ilabas ng ahensiya ang nasabing kautusan.

Mga OFW na minaltrato ng kanilang employer, pwedeng magsumbong sa pamamagitan ng mobile app

ni Jasmin Joy Evangelista | September 6, 2021

Hinikayat ng Philippine Overseas Employment Administration ang mga OFW na minamaltrato ng kanilang mga employer na agad magsumbong sa kanila sa pamamagitan ng isang mobile app.

Ayon sa POEA, maaaring i-download nang libre ang Abizo OFW App.

Ito ay isang Global Monitoring System na idinisenyo para sa mga Pinoy na nagtatrabaho sa ibang bansa.

Kaya nitong ma-track ang lahat ng OFW na gumagamit ng app kabilang na ang kanilang deployment location, employer at working condition.

Maaari ring magpadala rito ng emergency alert, incident report at iba pa na makakatulong sa kanilang monitoring.

Kamakailan, ipinresinta ng ahensya ang kauna-unahang Pinoy na kanilang napauwi sa tulong ng nasabing app.

Siya ay si Almedo Lopez, 59-anyos at namasukan bilang Supervisor sa isang manufacturing company sa Fiji Islands.

Bukod umano sa verbal abuse at harassment, nalabag din ang kanyang kontrata dahil sa pagbibigay sa kanya ng mga gawain na hindi pasok sa kanyang pinirmahan.

Agad nagsumbong si Lopez sa pamamagitan ng app at sa loob lamang ng siyam na araw ay lumabas na ang kanyang repatriation notice at nasagip sa kanyang employer.

Samantala, nabanggit din ng POEA na nasa 13,000 OFW ang kanilang mino-monitor sa ngayon mula sa iba’t-ibang panig ng mundo.

Pagpapadala ng mga OFWs sa Saudi Arabia, stop muna

ni Ronalyn Seminiano Reonico | May 28, 2021

Sinuspinde ng pamahalaan ang deployment ng mga overseas Filipino workers (OFWs) sa Saudi Arabia.

Sa inilabas na memorandum ni Department of Labor and Employment (DOLE) Secretary Silvestre Bello III, ipinag-utos niya sa Philippine Overseas Employment Administration (POEA) ang pansamantalang suspensiyon ng deployment ng mga OFWs sa Saudi Arabia matapos makatanggap ang ahensiya ng ulat na pinasasagot umano ng mga employers/foreign recruitment agencies sa mga manggagawang Pilipino ang mga kailangan upang makapasok sa naturang bansa.

Saad pa ni Bello, “In the interest of the service, you are hereby instructed to effect the temporary suspension of deployment of OFWs to the Kingdom of Saudi Arabia effective immediately and until further notice.

"The department received reports that departing OFWs are being required by their employers/foreign recruitment agencies to shoulder the costs of the health and safety protocol for COVID-19 and insurance coverage premium upon their entry in the Kingdom."

Samantala, ayon sa DOLE, maglalabas sila ng official statement kung kailan muling magpapatuloy ang deployment ng mga OFWs sa Saudi Arabia kapag nalinaw na ang naturang isyu.